ഓസ്ലോ: കുപ്രസിദ്ധ ലൈംഗിക കുറ്റവാളിയും അന്തരിച്ച അമേരിക്കൻ വ്യവസായി ജെഫ്രി എപ്സ്റ്റീന്റെ പുറത്തുവന്ന രേഖകളുടെ അടിസ്ഥാനത്തിൽ നോർവേ മുൻ പ്രധാനമന്ത്രി തോർബ്ജോൺ ജാഗ്ലൻഡിനെതിരെ (Thorbjoern Jagland-Epstein investigation) പോലീസ് അന്വേഷണം ആരംഭിച്ചു. നോർവീജിയൻ സാമ്പത്തിക കുറ്റാന്വേഷണ വിഭാഗമായ ‘ഓക്കോക്രിം’ ആണ് ജാഗ്ലൻഡിനെതിരെ അഴിമതി ആരോപണത്തിൽ അന്വേഷണം പ്രഖ്യാപിച്ചത്. നോബൽ കമ്മിറ്റി അധ്യക്ഷനായും കൗൺസിൽ ഓഫ് യൂറോപ്പ് സെക്രട്ടറി ജനറലായും സേവനമനുഷ്ഠിച്ചിരുന്ന കാലയളവിൽ എപ്സ്റ്റീനിൽ നിന്ന് സമ്മാനങ്ങളോ ലോണുകളോ കൈപ്പറ്റിയിട്ടുണ്ടോ എന്നാണ് പ്രധാനമായും പരിശോധിക്കുന്നത്.
അന്താരാഷ്ട്ര സംഘടനയുടെ തലവനായിരുന്നതിനാൽ ജാഗ്ലൻഡിന് ലഭിച്ചിരുന്ന നിയമപരമായ പരിരക്ഷ നീക്കം ചെയ്യാൻ നോർവീജിയൻ വിദേശകാര്യ മന്ത്രാലയം തീരുമാനിച്ചിട്ടുണ്ട്. സംഭവത്തിലെ വസ്തുതകൾ പുറത്തുവരേണ്ടത് അനിവാര്യമാണെന്ന് വിദേശകാര്യ മന്ത്രി എസ്പെൻ ബാർത്ത് ഈഡ് വ്യക്തമാക്കി. അതേസമയം, അന്വേഷണത്തെ സ്വാഗതം ചെയ്യുന്നതായും പോലീസുമായി പൂർണ്ണമായി സഹകരിക്കുമെന്നും ജാഗ്ലൻഡിന്റെ അഭിഭാഷകൻ അറിയിച്ചു. നേരത്തെ, നോർവേയിലെ മെറ്റെ-മാരിറ്റ് രാജകുമാരിക്കും എപ്സ്റ്റീനുമായുള്ള ബന്ധം വെളിപ്പെട്ടത് വലിയ വിവാദമായിരുന്നു.
Summary: Norway’s economic crime police have launched an investigation into former Prime Minister Thorbjoern Jagland for suspected corruption following revelations in newly released Jeffrey Epstein files.
