ജപ്പാനിലെ റിയൽ എസ്റ്റേറ്റ് വിപണിയിൽ ഇപ്പോൾ വിചിത്രമായ ഒരു തൊഴിൽ തരംഗമായി മാറിയിരിക്കുന്നു. അസ്വാഭാവിക മരണങ്ങളോ ദാരുണമായ സംഭവങ്ങളോ നടന്ന, ജപ്പാനിൽ ‘ജിക്കോ ബുക്കൻ’ എന്ന് വിളിക്കപ്പെടുന്ന വീടുകളിൽ ഒരു രാത്രി തങ്ങാൻ തയ്യാറുള്ളവർക്ക് ലഭിക്കുന്നത് 88,000 യെൻ (ഏകദേശം 52,000 രൂപ) ആണ്. ഇത്തരത്തിൽ ആ വീട്ടിൽ ഒരു രാത്രി താമസിച്ച് അസ്വാഭാവികമായി ഒന്നുമില്ലെന്ന് സാക്ഷ്യപ്പെടുത്തുക എന്നതാണ് ഇവരുടെ ജോലി. (Jiko Bukken Haunted House)
എന്തുകൊണ്ടാണ് ഇങ്ങനെയൊരു തൊഴിൽ?
ആത്മഹത്യ, കൊലപാതകം, അല്ലെങ്കിൽ ദീർഘകാലം ആരും അറിയാതെ മൃതദേഹം കിടന്ന വീടുകൾ തുടങ്ങിയ ‘കളങ്കപ്പെട്ട’ വീടുകളുടെ ചരിത്രം വെളിപ്പെടുത്താൻ ജപ്പാനിലെ നിയമം നിർബന്ധിക്കുന്നുണ്ട്. ഇത് പല വാടകക്കാരെയും വാങ്ങുന്നവരെയും അത്തരം വീടുകളിൽ നിന്ന് അകറ്റുന്നു. ഇത്തരം വീടുകൾ വർഷങ്ങളോളം ഒഴിഞ്ഞു കിടക്കുന്ന സാഹചര്യം ഒഴിവാക്കാനാണ് ഉടമസ്ഥർ ഈ സേവനം തേടുന്നത്. ഇവർ വീട്ടിൽ ക്യാമറകളും മറ്റ് സംവിധാനങ്ങളും സ്ഥാപിച്ച് ഒരു രാത്രി മുഴുവൻ നിരീക്ഷണം നടത്തുന്നു. അസ്വാഭാവികമായി ഒന്നും കണ്ടെത്തിയില്ലെങ്കിൽ, ആ വീട് ‘പ്രേതമുക്തമാണെന്ന്’ ഇവർ സർട്ടിഫിക്കറ്റ് നൽകുന്നു.
സാധാരണ വീടുകളെ അപേക്ഷിച്ച് ഇത്തരം വീടുകൾക്ക് 20 മുതൽ 50 ശതമാനം വരെ വിലക്കുറവുണ്ട്. ജപ്പാനിലെ വർദ്ധിച്ചുവരുന്ന ഭവനക്ഷാമവും അമിതമായ വിലക്കയറ്റവും കാരണം, പല യുവാക്കളും അന്ധവിശ്വാസങ്ങളെക്കാൾ കൂടുതൽ പ്രാധാന്യം വീടിന്റെ താങ്ങാനാവുന്ന വിലയ്ക്ക് നൽകുന്നു. അതിനാൽ, പ്രേതഭയം നീക്കം ചെയ്ത് ഇത്തരം വീടുകൾ വിപണിയിലേക്ക് തിരികെ കൊണ്ടുവരാനുള്ള ഒരു മാർഗ്ഗമായി ഈ വിചിത്രമായ തൊഴിൽ മാറിയിരിക്കുകയാണ്. അസ്വാഭാവിക സംഭവങ്ങൾ കണ്ടെത്തിയാൽ ചില കമ്പനികൾ നഷ്ടപരിഹാരം പോലും വാഗ്ദാനം ചെയ്യുന്നുണ്ട്.
Summary: Japan’s real estate market is increasingly hiring individuals for 88,000 yen to spend a night in ‘stigmatized’ properties (jiko bukken) to certify them as ghost-free. This initiative aims to revitalize interest in homes where tragic deaths occurred, helping landlords overcome superstitious buyer hesitation amidst Japan’s housing shortages and rising property prices.
