ചെറുതുരുത്തി (തൃശ്ശൂർ): ഹോർത്തൂസ് മലബാറിക്കസ് ബൊട്ടാണിക്കൽ ഗാർഡൻ ആൻഡ് റിസർച്ച് ഇൻസ്റ്റിറ്റ്യൂട്ട് (HMBGRI) തങ്ങളുടെ ചെറുതുരുത്തി ക്യാമ്പസിൽ തദ്ദേശീയ ഔഷധസസ്യങ്ങളുടെ സംരക്ഷണവും പഠനവും ലക്ഷ്യമിട്ട് ഒരുക്കുന്ന ‘ആയൂർ ഉദ്യാനം’ (Ayur udhyan cheruthuruthy thrissur inauguration) പൊതുജനങ്ങൾക്കായി തുറക്കുന്നു. ഈ വരുന്ന തിങ്കളാഴ്ച (ജൂലൈ 27) രാവിലെ 11 മണിക്ക് നടക്കുന്ന ചടങ്ങിൽ ആയുർവേദ മെഡിക്കൽ അസോസിയേഷൻ ഓഫ് ഇന്ത്യ (AMAI) പ്രസിഡന്റ് ഡോ. കെ. എസ്. വിഷ്ണു നമ്പൂതിരി ഉദ്യാനത്തിന്റെ ഔദ്യോഗിക ഉദ്ഘാടനം നിർവ്വഹിക്കും. ആയുർവേദ പണ്ഡിതരും പ്രമുഖ ഗവേഷകരും പരിസ്ഥിതി പ്രവർത്തകരും ചടങ്ങിൽ സംബന്ധിക്കും.
ആയുർവേദ ശാസ്ത്രത്തിന്റെ അടിസ്ഥാന തത്വങ്ങളും പ്രകൃതി സംരക്ഷണവും കോർത്തിണക്കി സവിശേഷമായ രീതിയിലാണ് ‘ആയൂർ ഉദ്യാനം’ രൂപകൽപ്പന ചെയ്തിരിക്കുന്നത്. ആയുർവേദത്തിലെ പരമ്പരാഗത ‘സർവ്വതോഭദ്ര’ ശൈലി പിന്തുടരുന്ന ഈ ഗാർഡനിൽ സസ്യങ്ങളുടെ സ്വാഭാവിക ആവാസവ്യവസ്ഥ ഉറപ്പാക്കാൻ ജാംഗലം (വരണ്ട പ്രദേശം), അനൂപം (ജലസമൃദ്ധമായ പ്രദേശം), സാധാരണം (മിതപ്രദേശം) എന്നീ മൂന്ന് ആയുർ ദേശങ്ങൾ കൃത്രിമമായി പുനഃസൃഷ്ടിച്ചിട്ടുണ്ട് എന്നത് ശ്രദ്ധേയമാണ്.
ആയുർവേദത്തിലെ പ്രധാന ശാഖകളായ അഷ്ടാംഗങ്ങളെ പ്രതിനിധീകരിക്കുന്ന ഔഷധ സസ്യങ്ങളുടെ വിപുലമായ ശേഖരം, വിഷചികിത്സ, മർമ്മ ചികിത്സ തുടങ്ങിയ കേരളീയ തനത് ചികിത്സാ രീതികളിൽ ഉപയോഗിക്കുന്ന അപൂർവ്വ സസ്യങ്ങൾ, ഔഷധ സസ്യങ്ങളുടെ പ്രതിനിധി ദ്രവ്യങ്ങൾ എന്നിവയെല്ലാം ഈ ഉദ്യാനത്തിൽ സജ്ജീകരിച്ചിട്ടുണ്ട്. കേരളത്തിന്റെ തനത് ഔഷധ സസ്യ പാരമ്പര്യവും നാടൻ ചികിത്സാ രീതികളും വരുംതലമുറയ്ക്കായി സംരക്ഷിക്കുന്നതിനൊപ്പം അന്താരാഷ്ട്ര നിലവാരത്തിലുള്ള ഗവേഷണങ്ങൾക്കും പഠനങ്ങൾക്കുമുള്ള ഒരു പ്രമുഖ കേന്ദ്രമായി ഇത് പ്രവർത്തിക്കും.
നൂറ്റാണ്ടുകളായി നിലനിൽക്കുന്ന പാരമ്പര്യ വിജ്ഞാനവും ആധുനിക ശാസ്ത്രവും തമ്മിലുള്ള അവിസ്മരണീയമായ ഒരു സംയോജനമാണ് ആയൂർ ഉദ്യാനമെന്ന് സൈജീനോം, മെഡ്ജീനോം, സൈജീനോം റിസർച്ച് ഫൗണ്ടേഷൻ സ്ഥാപകൻ സാം സന്തോഷ് പറഞ്ഞു. ജനിതകശാസ്ത്രം (Genomics), പ്രിസിഷൻ മെഡിസിൻ തുടങ്ങിയ ആധുനിക വൈദ്യശാസ്ത്ര മേഖലകളിലേക്ക് ലോകം അതിവേഗം കുതിക്കുമ്പോൾ, നമ്മുടെ ഔഷധ സസ്യ പാരമ്പര്യത്തെയും ജൈവവൈവിധ്യത്തെയും സംരക്ഷിക്കേണ്ടത് അനിവാര്യമാണെന്നും ആയുർവേദവും സസ്യശാസ്ത്രവും ആധുനിക ജീവശാസ്ത്രവും തമ്മിലുള്ള സഹകരണത്തിന് ഈ സംരംഭം വഴിയൊരുക്കുമെന്നും അദ്ദേഹം കൂട്ടിച്ചേർത്തു.
ഉദ്ഘാടനത്തോടനുബന്ധിച്ച് വിവിധ ആയുർവേദ കോളേജുകളിൽ നിന്നുള്ള വിദ്യാർത്ഥികൾക്കായി ‘ദ്രവ്യ ബോധിനി’ (Dravya Bodhini) എന്ന പേരിൽ മൂന്ന് ദിവസത്തെ തീവ്ര പ്രായോഗിക പരിശീലന പരിപാടിയും സംഘടിപ്പിച്ചിട്ടുണ്ട്. പ്രമുഖ ഗവേഷകരായ ഡോ. അജയൻ സദാനന്ദൻ, ഡോ. ലക്ഷ്മി എം. എസ്. എന്നിവരുടെ നേതൃത്വത്തിൽ നടക്കുന്ന ഈ പരിപാടിയിലൂടെ വിദ്യാർത്ഥികൾക്ക് ഔഷധ സസ്യങ്ങളെ തിരിച്ചറിയാനും അവയുടെ ഉപയോഗങ്ങളെക്കുറിച്ചും പ്രായോഗിക അറിവ് നേടാനാകും.
എച്ച്.എം.ബി.ജി.ആർ.ഐ സയന്റിസ്റ്റ്-ഇൻ-ചാർജ് ഡോ. അനൂപ് പി. ബാലന്റെ പൊതു മേൽനോട്ടത്തിൽ നടക്കുന്ന പരിപാടിയുടെ കോ-ഓർഡിനേറ്റർ കൺസൾട്ടന്റ് സയന്റിസ്റ്റ് ഡോ. അജയൻ സദാനന്ദനാണ്. ചടങ്ങിൽ വിവിധ പ്രമുഖ ആയുർവേദ കോളേജുകളിലെ പ്രിൻസിപ്പൽമാരായ ഡോ. കെ. മുരളി, ഡോ. പി. പി. കിരാതമൂർത്തി, ഡോ. കെ. പി. അഞ്ജു, ഡോ. ഗിജി മാത്യു, ഡോ. കെ. കെ. ലത എന്നിവർ സംബന്ധിച്ച് സംസാരിക്കും.
Story Summary: The Hortus Malabaricus Botanical Garden and Research Institute (HMBGRI) will inaugurate ‘Ayur Udhyan’ at its Cheruthuruthy campus in Thrissur on Monday, July 27. The garden, replicating traditional ecosystems like Jangalam, Anupam, and Sadharanam, aims to preserve medicinal plants used in Ayurveda, Vishachikitsa, and Marma chikitsa. Sam Santhosh, founder of SciGenom, highlighted it as a blend of traditional knowledge and modern genomics. A 3-day training program named ‘Dravya Bodhini’ for Ayurveda students will also commence alongside.
