ലണ്ടൻ: കൗമാരക്കാരായ ഉപഭോക്താക്കൾക്കിടയിൽ സോഷ്യൽ മീഡിയ ഉപയോഗം നിയന്ത്രിക്കുന്നതിനായി പുതിയ സുരക്ഷാ മാനദണ്ഡങ്ങൾ പ്രഖ്യാപിച്ച് ബ്രിട്ടീഷ് സർക്കാർ. 16-ഉം 17-ഉം വയസ്സുള്ള കൗമാരക്കാർക്കായി രാത്രികാലങ്ങളിൽ ഡിഫോൾട്ട് ‘കർഫ്യൂ’ ഏർപ്പെടുത്താനാണ് സർക്കാർ ലക്ഷ്യമിടുന്നത്. 16 വയസ്സിന് താഴെയുള്ള കുട്ടികൾക്ക് സോഷ്യൽ മീഡിയ പൂർണ്ണമായി നിരോധിക്കാനുള്ള പദ്ധതി പ്രഖ്യാപിച്ച് ഒരു മാസത്തിന് ശേഷമാണ് പുതിയ നീക്കം.(UK social media curfew, UK Government Plans Social Media Curfew For Older Teenagers)
പുതിയ നിയമപ്രകാരം അർദ്ധരാത്രി 12 മണി മുതൽ പുലർച്ചെ 6 മണി വരെ ഈ പ്രായത്തിലുള്ളവർക്ക് സോഷ്യൽ മീഡിയ ആപ്പുകളുടെ ഉപയോഗം ഡിഫോൾട്ടായി തടയപ്പെടും. ആപ്പുകളിലെ സെറ്റിങ്സിൽ മാറ്റം വരുത്തിയാൽ മാത്രമേ ഈ സമയത്ത് അവർക്ക് ആപ്പുകൾ ഉപയോഗിക്കാൻ സാധിക്കൂ. കൂടാതെ, ഉപഭോക്താക്കളെ ആപ്പുകളിൽ തന്നെ തളച്ചിടുന്ന തരത്തിലുള്ള പ്രത്യേക ഫീച്ചറുകളും ഡിഫോൾട്ടായി ഓഫാക്കി വെക്കും. സാങ്കേതികവിദ്യാ കമ്പനികൾ ഈ കർഫ്യൂ നിയമപരമായി നടപ്പിലാക്കാൻ ബാധ്യസ്ഥരാണെന്നും, പ്രായപരിശോധനയിൽ വീഴ്ച വരുത്തുന്ന കമ്പനികൾക്കെതിരെ കർശനമായ നിയമനടപടികൾ സ്വീകരിക്കുമെന്നും ഓൺലൈൻ സുരക്ഷാ മന്ത്രി കനിഷ്ക നാരായൺ വ്യക്തമാക്കി.
കൗമാരക്കാർക്ക് ആവശ്യത്തിന് ഉറക്കം ലഭിക്കുന്നതിനും പഠനത്തിൽ ശ്രദ്ധ കേന്ദ്രീകരിക്കുന്നതിനും കുടുംബത്തോടൊപ്പം സമയം ചിലവഴിക്കുന്നതിനും ഈ നടപടികൾ സഹായിക്കുമെന്ന് സാങ്കേതികവിദ്യാ മന്ത്രി പറഞ്ഞു. പുതിയ നിയന്ത്രണങ്ങളുടെ ആദ്യ ഘട്ടം ഈ വർഷാവസാനത്തോടെ പാർലമെന്റിൽ അവതരിപ്പിക്കും. 2027 വസന്തകാലത്തോടെ നിയമം പ്രാബല്യത്തിൽ വരുമെന്നാണ് സർക്കാർ പ്രതീക്ഷിക്കുന്നത്.
Story Summary
The UK government has announced plans to introduce a default overnight curfew (midnight to 6 AM) on social media apps for 16 and 17-year-olds to protect their health and well-being. Under the new rules, tech companies will be legally required to enforce these limits and implement robust age-verification checks. The regulations are expected to be presented in parliament by the end of this year and come into force by spring 2027.
