മാതാ വൈഷ്ണോദേവി ക്ഷേത്രത്തിലെ വെള്ളി കാണിക്കയുമായി ബന്ധപ്പെട്ട് കോടികളുടെ തട്ടിപ്പ് നടന്നതായി ആരോപണം. ക്ഷേത്രത്തിൽ നിന്ന് ശേഖരിച്ച 20 ടൺ വെള്ളിയിൽ 95 ശതമാനവും വ്യാജമാണെന്ന് കണ്ടെത്തിയതിനെ തുടർന്ന് ജമ്മു കശ്മീരിലെ കോടതി ക്രൈം ബ്രാഞ്ചിനോട് വിശദമായ രേഖകൾ ഹാജരാക്കാൻ നിർദ്ദേശിച്ചു (Vaishno Devi Temple Silver Offering Scam). ഈ മാസം 29-നകം എല്ലാ രേഖകളുമായി അന്വേഷണ ഉദ്യോഗസ്ഥൻ നേരിട്ട് ഹാജരാകാനാണ് കോടതിയുടെ ഉത്തരവ്.
മെയ് മാസത്തിൽ ക്ഷേത്ര ബോർഡ് ഏകദേശം 550 കോടി രൂപ വിലമതിക്കുന്ന 20 ടൺ വെള്ളി ശേഖരം ഉരുക്കി സൂക്ഷിക്കുന്നതിനായി സർക്കാർ മിന്റിലേക്ക് അയച്ചിരുന്നു. എന്നാൽ പരിശോധനയിൽ ഇതിൽ 5 ശതമാനം മാത്രമാണ് യഥാർത്ഥ വെള്ളിയെന്നും ബാക്കി 95 ശതമാനവും കാഡ്മിയം, ഇരുമ്പ് തുടങ്ങിയ ലോഹങ്ങളാണെന്നും കണ്ടെത്തി. ഭക്തർ അറിയാതെ വ്യാജ വെള്ളി നൽകിയതാണെന്ന് ആദ്യം കരുതിയെങ്കിലും, ഇത് വലിയൊരു തട്ടിപ്പാണെന്ന് ആരോപിച്ച് അഭിഭാഷകൻ ദീപക് ശർമ്മ ക്രൈം ബ്രാഞ്ചിൽ പരാതി നൽകുകയായിരുന്നു.
വിഷയത്തിൽ എഫ്ഐആർ രജിസ്റ്റർ ചെയ്ത് അന്വേഷണം നടത്തണമെന്നാവശ്യപ്പെട്ട് അഭിഭാഷകൻ ജമ്മു ചീഫ് ജുഡീഷ്യൽ മജിസ്ട്രേറ്റ് കോടതിയെ സമീപിക്കുകയായിരുന്നു. കൃത്യമായ അന്വേഷണം നടത്തുന്നതിനും സിസിടിവി ദൃശ്യങ്ങൾ, ശേഖരണ-ഗതാഗത രേഖകൾ, പരിശോധനാ റിപ്പോർട്ടുകൾ എന്നിവ സുരക്ഷിതമാക്കുന്നതിനും കോടതി നിർദ്ദേശിച്ചു. 550 കോടി രൂപയുടെ വെള്ളി കാണിക്കയുടെ മൂല്യം പരിശോധനയിൽ വെറും 30 കോടി രൂപയായി കുറഞ്ഞത് ഗൗരവകരമായ കുറ്റകൃത്യമാണെന്നും സമഗ്രമായ അന്വേഷണം ആവശ്യമാണെന്നുമാണ് ഹർജിക്കാരന്റെ വാദം.
Summary: A Jammu and Kashmir court has directed the Crime Branch to produce records regarding the alleged misappropriation of Rs 550 crore worth of silver offerings at the Mata Vaishno Devi Shrine. Investigations revealed that 95% of the 20 tonnes of silver sent for melting was adulterated with cadmium and iron, sparking suspicions of a massive criminal conspiracy and substitution of genuine offerings.
