ലൊസാഞ്ചലസ്: ആവേശം അവസാന നിമിഷം വരെ നെഞ്ചിടിപ്പേറ്റിയ പോരാട്ടത്തിൽ ബെൽജിയത്തെ ഒന്നിനെതിരെ രണ്ട് ഗോളുകൾക്ക് വീഴ്ത്തി സ്പെയിൻ ലോകകപ്പ് സെമി ഫൈനലിൽ കടന്നു. പകരക്കാരനായി കളത്തിലിറങ്ങി കളി അവസാനിക്കാൻ രണ്ട് മിനിറ്റ് ബാക്കിനിൽക്കെ സ്പെയിന്റെ വിജയഗോൾ നേടിയ മൈക്കൽ മെറിനോയാണ് വീണ്ടും ടീമിന്റെ രക്ഷകനായത്. പ്രീ-ക്വാർട്ടറിൽ പോർച്ചുഗലിനെതിരെയും അവസാന നിമിഷ ഗോളിലൂടെ മെറിനോ സ്പെയിനെ രക്ഷിച്ചിരുന്നു. ഡാലസിൽ നടക്കുന്ന സെമി ഫൈനലിൽ കരുത്തരായ ഫ്രാൻസാണ് സ്പെയിന്റെ എതിരാളികൾ. ഈ വിജയത്തോടെ തോൽവിയറിയാതെ തുടർച്ചയായ 36 മത്സരങ്ങൾ പൂർത്തിയാക്കിയെന്ന ചരിത്ര നേട്ടവും സ്പെയിൻ സ്വന്തമാക്കി.(Spain beats Belgium to enter World Cup semifinal as Merino scores late winner)
ലൊസാഞ്ചലസ് സ്റ്റേഡിയത്തിൽ ഇരുടീമുകളും ഒപ്പത്തിനൊപ്പം പോരാടിയ മത്സരത്തിന്റെ 30-ാം മിനിറ്റിൽ ഫാബിയൻ റൂയിസിലൂടെ സ്പെയിനാണ് ആദ്യം മുന്നിലെത്തിയത്. ഡാനി ഓൽമോയുടെ ഗോൾശ്രമം ബെൽജിയം ഗോളി തിബോ കോർട്ടുവ തടുത്ത പന്ത് റീബൗണ്ടിലൂടെ റൂയിസ് വലയിലെത്തിക്കുകയായിരുന്നു. ലമിൻ യമാലിന്റെ വിംഗുകളിലൂടെയുള്ള മുന്നേറ്റങ്ങളും ബെൽജിയം പ്രതിരോധത്തെ വിറപ്പിച്ചു. എന്നാൽ ആദ്യപകുതി അവസാനിക്കാൻ നാല് മിനിറ്റ് ശേഷിക്കെ ചാൾസ് ഡി കെറ്റെലെയറിലൂടെ ബെൽജിയം സമനില പിടിച്ചു. കെവിൻ ഡി ബ്രൂയ്നെയുടെ പാസിൽ നിന്ന് തിമോത്തി കാസ്റ്റഗ്നെ നൽകിയ ക്രോസ് മനോഹരമായൊരു ഹെഡ്ഡറിലൂടെ കെറ്റെലെയർ സ്പാനിഷ് വലയിലാക്കുകയായിരുന്നു. ഈ ലോകകപ്പിൽ സ്പെയിൻ വഴങ്ങുന്ന ആദ്യ ഗോൾ കൂടിയായിരുന്നു ഇത്.
രണ്ടാം പകുതിയിൽ വിജയഗോളിനായി ഇരുടീമുകളും ആക്രമണം കടുപ്പിച്ചു. എന്നാൽ 71-ാം മിനിറ്റിൽ പരിക്കേറ്റ് ഒന്നാം നമ്പർ ഗോളി കോർട്ടുവയ്ക്ക് കളം വിടേണ്ടി വന്നത് ബെൽജിയത്തിന് തിരിച്ചടിയായി. പകരക്കാരനായി സെനെ ലമ്മെൻസാണ് തുടർന്ന് ഗോളിയായി എത്തിയത്. മത്സരം എക്സ്ട്രാ ടൈമിലേക്ക് നീങ്ങുമെന്ന് കരുതിയിരിക്കെ 88-ാം മിനിറ്റിൽ ബെൽജിയം കോട്ട തകർന്നു. പാബ്ലോ കുബാർസിയുടെ ലോങ് റേഞ്ച് ഷോട്ട് കൃത്യമായി കൈപ്പിടിയിലൊതുക്കുന്നതിൽ ഗോൾകീപ്പർ ലമ്മെൻസിന് പിഴച്ചു. പന്ത് ലമ്മെൻസിന്റെ കൈകളിൽ നിന്ന് തെറിച്ചുവീണത് കൃത്യമായി മുതലാക്കിയ മൈക്കൽ മെറിനോ പന്ത് വലയിലേക്ക് അടിച്ചുകയറ്റി സ്പെയിന് സെമി ടിക്കറ്റ് ഉറപ്പാക്കി നൽകി.
Story Summary
Spain advanced to the World Cup semifinals after a thrilling 2-1 victory over Belgium, courtesy of a late 88th-minute winner by Mikel Merino. Fabian Ruiz initially put Spain ahead before Charles De Ketelaere equalized for Belgium, but Merino’s clutch goal extended Spain’s unbeaten streak to 36 matches and set up a high-profile semifinal clash against France.
