കൊല്ലം: അയൽവാസികളിൽ നിന്നുള്ള നിരന്തര ശല്യം ഒഴിവാക്കാനായി സ്വന്തം വീട്ടിൽ സിസിടിവി ക്യാമറ സ്ഥാപിച്ച പെൺകുട്ടിക്ക് നേരെ അയൽവാസികളുടെ ക്രൂരമർദനം (Pathanapuram assault case). കൊല്ലം പത്തനാപുരത്താണ് മനസ്സാക്ഷിയെ ഞെട്ടിച്ച ഈ സംഭവം നടന്നത്. അയൽവാസികളായ അച്ഛനും അമ്മയും മകനും അടങ്ങുന്ന മൂന്നംഗ സംഘമാണ് പെൺകുട്ടിയെ വീട് കയറി അതിക്രൂരമായി മർദിച്ചത്. സംഭവവുമായി ബന്ധപ്പെട്ട് അയൽവാസി സുനിൽകുമാറിനെ പത്തനാപുരം പോലീസ് അറസ്റ്റ് ചെയ്തു. ആക്രമണത്തിൽ പങ്കാളിയായ ഇയാളുടെ മകൻ മിഥുൻ നിലവിൽ ഒളിവിലാണ്.
തങ്ങളെ നിരീക്ഷിക്കാനാണ് ക്യാമറ വെച്ചതെന്ന് ആരോപിച്ചായിരുന്നു അയൽവാസികൾ പെൺകുട്ടിയുടെ വീട്ടിലേക്ക് അതിക്രമിച്ചു കയറിയത്. തുടർന്ന് പെൺകുട്ടിയെ നിലത്തുതള്ളിയിട്ട് ക്രൂരമായി മർദിക്കുകയായിരുന്നു. പെൺകുട്ടിയെ സംഘം ചേർന്ന് മർദിക്കുന്നതിന്റെയും നിലവിളിക്കുന്നതിന്റെയും ദൃശ്യങ്ങൾ വീട്ടിൽ സ്ഥാപിച്ചിരുന്ന ഇതേ സിസിടിവി ക്യാമറയിൽത്തന്നെ വ്യക്തമായി പതിഞ്ഞിട്ടുണ്ട്. ഈ ദൃശ്യങ്ങൾ പുറത്തുവന്നതോടെയാണ് സംഭവം പുറംലോകമറിഞ്ഞത്. ഒളിവിൽ പോയ പ്രതി മിഥുനായും മർദനത്തിൽ പങ്കാളിയായ അമ്മയ്ക്കായും പോലീസ് അന്വേഷണം ഊർജിതമാക്കിയിട്ടുണ്ട്.
Story Summary: A young girl was brutally assaulted by her neighbors in Pathanapuram, Kollam, for installing a CCTV camera at her house to avoid their harassment. While one suspect, Sunil Kumar, has been arrested, his son Mithun remains at large, and the shocking incident was caught on the same CCTV camera.
