ഭാര്യയെയും മകളെയും കാണാനായി നിയമവിരുദ്ധമായി ഇന്ത്യ-ബംഗ്ലാദേശ് അതിർത്തി കടന്ന 42-കാരൻ അസമിലെ ഹൈലാകണ്ടിയിൽ പിടിയിലായി. ബംഗ്ലാദേശിലെ സിൽഹെറ്റ് ജില്ലയിലുള്ള റസൂൽപൂർ ഗ്രാമവാസിയായ സാഹിദ് അഹമ്മദാണ് പോലീസ് പിടിയിലായത് (Bangladeshi National Detained). ജൂലൈ 5-ന് ലഭിച്ച രഹസ്യ വിവരത്തെത്തുടർന്ന് നടത്തിയ പോലീസ് ഓപ്പറേഷനിലാണ് ഇയാൾ പിടിയിലായതെന്ന് ഹൈലാകണ്ടി എസ്.പി അമിതാഭ് സിൻഹ അറിയിച്ചു.
എട്ടു വർഷം മുൻപ് മേഘാലയയിൽ വെച്ചാണ് ഇയാളും അസമിലെ ഹൈലാകണ്ടി സ്വദേശിയായ യുവതിയും പരിചയപ്പെടുന്നത്. പിന്നീട് ഇവർ വിവാഹിതരായി. തുടർന്ന് കുറച്ചുകാലം മേഘാലയയിലും ബംഗ്ലാദേശിലും താമസിച്ചുവെങ്കിലും, കഴിഞ്ഞ രണ്ടര വർഷമായി ഭാര്യയും മകളും ഹൈലാകണ്ടിയിലാണ് താമസം. കുടുംബത്തെ ബംഗ്ലാദേശിലേക്ക് കൊണ്ടുപോകുന്നതിനാണ് താൻ അതിർത്തി കടന്നെത്തിയതെന്ന് ഇയാൾ ചോദ്യം ചെയ്യലിൽ പോലീസിനോട് സമ്മതിച്ചു. ഇയാൾ അതിർത്തി കടക്കാൻ ഉപയോഗിച്ച വഴി, മറ്റാരുടെയെങ്കിലും സഹായം ലഭിച്ചിട്ടുണ്ടോ തുടങ്ങിയ കാര്യങ്ങളിൽ പോലീസ് വിശദമായ അന്വേഷണം നടത്തിവരികയാണ്.
Summary: A 42-year-old Bangladeshi national, Sahed Ahmed, was detained in Assam’s Hailakandi district for illegally crossing the border to reunite with his Indian wife and daughter. Police are currently investigating how he entered the country and whether he received assistance, while he remains in custody pending further legal action.
