ന്യൂഡൽഹി: ഇന്തോനേഷ്യ, ഓസ്ട്രേലിയ, ന്യൂസിലൻഡ് എന്നീ മൂന്ന് രാജ്യങ്ങളിലേക്കുള്ള ആറ് ദിവസത്തെ ഔദ്യോഗിക പര്യടനത്തിനായി പ്രധാനമന്ത്രി നരേന്ദ്ര മോദി ഇന്ന് പുറപ്പെടും. വിവിധ രാഷ്ട്രത്തലവന്മാരുമായുള്ള ഉഭയകക്ഷി ചർച്ചകൾ, പ്രവാസി സംഗമങ്ങൾ, ബിസിനസ്സ് പ്രമുഖരുമായുള്ള കൂടിക്കാഴ്ചകൾ എന്നിവ ഉൾപ്പെടുന്നതാണ് പ്രധാനമന്ത്രിയുടെ ഈ സുപ്രധാന സന്ദർശനം. മൂന്നു ദിവസത്തെ സീഷെൽസ് സന്ദർശനം പൂർത്തിയാക്കി ജൂൺ 29-ന് അദ്ദേഹം ഇന്ത്യയിൽ തിരിച്ചെത്തിയിരുന്നു.(PM Modi foreign visit, PM Modi Starts Six Day Visit To Indonesia Australia And New Zealand)
ഇന്തോനേഷ്യ പ്രസിഡന്റ് പ്രബോവോ സുബിയാന്തോയുടെ ക്ഷണപ്രകാരമാണ് പ്രധാനമന്ത്രിയുടെ ഇന്തോനേഷ്യൻ സന്ദർശനം. നരേന്ദ്ര മോദിയുടെ നാലാമത്തെ ഇന്തോനേഷ്യൻ സന്ദർശനമാണിത്. ഇരു രാജ്യങ്ങളും തമ്മിലുള്ള ബന്ധം സമഗ്ര തന്ത്രപരമായ പങ്കാളിത്തത്തിലേക്ക് ഉയർത്തിയ ശേഷമുള്ള അദ്ദേഹത്തിന്റെ ആദ്യ ഉഭയകക്ഷി സന്ദർശനം കൂടിയാണിത്. ജക്കാർത്തയിൽ ഇന്ത്യൻ സമൂഹത്തെ അഭിസംബോധന ചെയ്യുന്ന പ്രധാനമന്ത്രി, ഇരു രാജ്യങ്ങളും തമ്മിലുള്ള ആഴത്തിലുള്ള സാംസ്കാരിക ബന്ധം വിളിച്ചോതുന്ന യുനെസ്കോ പൈതൃക കേന്ദ്രമായ യോഗ്യകർത്തയിലെ പ്രംബാനൻ ക്ഷേത്ര സമുച്ചയവും സന്ദർശിക്കും.
ഇന്തോനേഷ്യയിൽ നിന്ന് പ്രധാനമന്ത്രി മോദി ഓസ്ട്രേലിയയിലെ മെൽബണിലേക്ക് തിരിക്കും. ഓസ്ട്രേലിയൻ പ്രധാനമന്ത്രി, ഗവർണർ എന്നിവരുമായി അദ്ദേഹം കൂടിക്കാഴ്ച നടത്തും. ഇന്ത്യ-ഓസ്ട്രേലിയ സിഇഒ ഫോറത്തിൽ പങ്കെടുത്ത് ഇരുരാജ്യങ്ങളിലെയും പ്രമുഖ വ്യവസായികളെ അദ്ദേഹം അഭിസംബോധന ചെയ്യും. മെൽബണിൽ ഇന്ത്യൻ പ്രവാസികളുമായുള്ള സംവാദവും പര്യടനത്തിന്റെ പ്രധാന ആകർഷണമാണ്.
പ്രധാനമന്ത്രി ക്രിസ്റ്റഫർ ലക്സന്റെ ക്ഷണപ്രകാരം ജൂലൈ 10, 11 തീയതികളിൽ പ്രധാനമന്ത്രി ന്യൂസിലൻഡ് സന്ദർശിക്കും. കഴിഞ്ഞ നാല് പതിറ്റാണ്ടിനിടെ ഒരു ഇന്ത്യൻ പ്രധാനമന്ത്രി നടത്തുന്ന ആദ്യ ഔദ്യോഗിക ന്യൂസിലൻഡ് സന്ദർശനമാണിത്. ഈ വർഷം ഇരുരാജ്യങ്ങളും ഒപ്പുവെച്ച ചരിത്രപരമായ സ്വതന്ത്ര വ്യാപാര കരാറിന്റെ പശ്ചാത്തലത്തിൽ വ്യാപാരം, വാണിജ്യം, പ്രതിരോധം എന്നീ മേഖലകളിലെ പുരോഗതി ഇരു നേതാക്കളും വിലയിരുത്തും. ഓക്ലൻഡിൽ പ്രമുഖ ബിസിനസ്സ്-കായിക പ്രമുഖരുമായും ഇന്ത്യൻ സമൂഹവുമായും പ്രധാനമന്ത്രി കൂടിക്കാഴ്ച നടത്തും.
Story Summary
Prime Minister Narendra Modi is embarking on a crucial six-day, three-nation tour to Indonesia, Australia, and New Zealand starting July 6 to deepen strategic, trade, and cultural ties. A major highlight of the trip is the historic visit to New Zealand, marking the first state visit by an Indian Prime Minister to the country in nearly forty years following a landmark Free Trade Agreement.
