കടലൂർ: തമിഴ്നാട്ടിലെ കടലൂരിൽ മരുമകളും കാമുകനും ചേർന്ന് 64-കാരനായ ഭർതൃപിതാവിനെ നടുറോഡിൽ വെച്ച് തീകൊളുത്തി കൊന്നു. കടംപുലിയൂർ സ്വദേശി രാജേന്ദ്രനാണ് ക്രൂരമായ ആക്രമണത്തിന് ഇരയായി കൊല്ലപ്പെട്ടത്. വ്യാഴാഴ്ച നടന്ന സംഭവത്തിൽ 70 ശതമാനത്തിലേറെ പൊള്ളലേറ്റ് ചികിത്സയിലായിരുന്ന രാജേന്ദ്രൻ ശനിയാഴ്ച കടലൂർ സർക്കാർ ആശുപത്രിയിൽ വെച്ചാണ് മരണമടഞ്ഞത്.(Daughter-in-law and lover set father-in-law on fire in the middle of the road)
രാജേന്ദ്രന്റെ മരുമകൾ ജയപ്രിയയും (28) മണികണ്ഠൻ (39) എന്നയാളും തമ്മിലുള്ള അവിഹിത ബന്ധത്തെ രാജേന്ദ്രൻ ചോദ്യം ചെയ്തിരുന്നു. ഇത് കുടുംബത്തിൽ വലിയ തർക്കങ്ങൾക്ക് കാരണമായി. ഈ വിരോധം തീർക്കാനാണ് ജയപ്രിയയും കാമുകനും ചേർന്ന് രാജേന്ദ്രനെ വകവരുത്താൻ പദ്ധതിയിട്ടത്.
സംഭവദിവസം ബൈക്കിൽ പോവുകയായിരുന്ന രാജേന്ദ്രനെ മണികണ്ഠനും കൂട്ടാളികളും വഴിയിൽ തടഞ്ഞുനിർത്തി. തുടർന്ന് എല്ലാവരും നോക്കിനിൽക്കെ ഇവർ രാജേന്ദ്രന്റെ ദേഹത്ത് പെട്രോളൊഴിച്ച് തീ കൊളുത്തുകയായിരുന്നു. കഴുത്തിലും ശരീരത്തിന്റെ പിൻഭാഗത്തും ഗുരുതരമായി പൊള്ളലേറ്റ രാജേന്ദ്രനെ നാട്ടുകാരാണ് ആശുപത്രിയിൽ എത്തിച്ചത്. നടപടി വേഗത്തിലാക്കിയ പോലീസ് പ്രധാന പ്രതിയായ മണികണ്ഠൻ, മരുമകൾ ജയപ്രിയ എന്നിവരുൾപ്പെടെ നാല് പേരെ അറസ്റ്റ് ചെയ്തു. ഇവരെ കോടതിയിൽ ഹാജരാക്കി റിമാൻഡ് ചെയ്തിരിക്കുകയാണ്.
