രാജസ്ഥാന്റെ സാമ്പത്തിക ഭാവത്തിൽ പുതിയ അധ്യായം കുറിച്ചുകൊണ്ട് പച്ച്പദ്രയിലെ എച്ച്പിസിഎൽ (HPCL) റിഫൈനറി നാളെ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. ഇന്ത്യയുടെ ആദ്യത്തെ സംയോജിത റിഫൈനറി-കം-പെട്രോകെമിക്കൽ കോംപ്ലക്സാണിത്. പ്രതിവർഷം 9 ദശലക്ഷം മെട്രിക് ടൺ ശേഷിയുള്ള ഈ സംരംഭം ഇന്ത്യയുടെ ഊർജ്ജ സ്വാശ്രയത്വത്തിലേക്കുള്ള വലിയ ചുവടുവെപ്പാണ് ( Pachpadra Refinery Inauguration). രാജസ്ഥാനിലെ മംഗള ടെർമിനലിൽ നിന്നുള്ള 1.5 ദശലക്ഷം ടൺ അസംസ്കൃത എണ്ണയും ഇറക്കുമതി ചെയ്യുന്ന 7.5 ദശലക്ഷം ടൺ എണ്ണയുമാണ് ഇവിടെ സംസ്കരിക്കുന്നത്.
റിഫൈനറി പ്രവർത്തനം തുടങ്ങുന്നതോടെ രാജസ്ഥാൻ സർക്കാരിന് പ്രതിവർഷം 5,000 കോടി രൂപയുടെ വരുമാനമാണ് പ്രതീക്ഷിക്കുന്നത്. മുന്ദ്ര തുറമുഖത്തെ 487 കിലോമീറ്റർ നീളമുള്ള പൈപ്പ്ലൈൻ വഴി റഷ്യയിൽ നിന്നും ഗൾഫ് രാജ്യങ്ങളിൽ നിന്നും ക്രൂഡ് ഓയിൽ ഇവിടെ നേരിട്ടെത്തിക്കും. പെട്രോളിയം ഉൽപ്പന്നങ്ങൾക്ക് പുറമെ ബിറ്റുമെൻ, നാഫ്ത തുടങ്ങിയവയും ഇവിടെ ഉൽപ്പാദിപ്പിക്കും. ഈ പദ്ധതി മേഖലയിലെ തൊഴിലില്ലായ്മയ്ക്ക് വലിയൊരളവ് പരിഹാരമാവുകയാണ്.
റിഫൈനറി വന്നതോടെ പച്ച്പദ്രയും പരിസരപ്രദേശങ്ങളും വലിയ വികസനമാണ് കൈവരിച്ചത്. ഉപ്പളങ്ങളിൽ കഠിനാധ്വാനം ചെയ്ത് തുച്ഛമായ കൂലിക്ക് ജോലി ചെയ്തിരുന്ന നാട്ടുകാർക്ക് ഇന്ന് സ്ഥിരവരുമാനമുള്ള തൊഴിലുകൾ ലഭിച്ചു. ഗ്രാമങ്ങളിലെ റോഡുകൾ നവീകരിക്കപ്പെട്ടു, സ്കൂളുകൾ ഉയർന്നു, ആശുപത്രികളുടെ നിർമ്മാണം പുരോഗമിക്കുന്നു. ശുദ്ധജല വിതരണ സംവിധാനങ്ങൾ വീടുകളിലെത്തി. സ്ത്രീകളടക്കമുള്ളവർക്ക് സുരക്ഷിതവും സ്ഥിരവുമായ തൊഴിലവസരങ്ങൾ ലഭിച്ചത് പ്രദേശത്തെ കുടുംബങ്ങൾക്ക് വലിയ ആശ്വാസമാണ് നൽകുന്നത്. ആസൂത്രിതമായ വികസന പ്രവർത്തനങ്ങളിലൂടെ ഒരുപിടി ജനതയുടെ ജീവിതനിലവാരമാണ് ഈ പദ്ധതി മെച്ചപ്പെടുത്തുന്നത്.
Summary: Prime Minister Narendra Modi is set to inaugurate the HPCL refinery in Pachpadra, Rajasthan, tomorrow, marking the launch of India’s first integrated refinery-cum-petrochemical complex. With a capacity of 9 million metric tonnes, the facility is designed to bolster India’s energy self-reliance and provide a significant economic boost to Rajasthan, generating an estimated annual revenue of Rs 5,000 crore.
