ഉക്രെയ്ൻ നടത്തിയ ആക്രമണങ്ങളിൽ റഷ്യയിലെ ഊർജ്ജ അടിസ്ഥാന സൗകര്യങ്ങൾക്ക് വലിയ നാശനഷ്ടങ്ങൾ സംഭവിച്ചതിനെത്തുടർന്ന് രാജ്യം രൂക്ഷമായ ഇന്ധനക്ഷാമം നേരിടുന്നു. ഈ സാഹചര്യത്തിൽ ഇന്ത്യയിൽ നിന്ന് കടൽമാർഗ്ഗം പെട്രോൾ ഇറക്കുമതി ചെയ്യാൻ റഷ്യ തീരുമാനിച്ചതായി റിപ്പോർട്ടുകൾ (Russia India Fuel Imports). ഏകദേശം 60,000 മെട്രിക് ടൺ പെട്രോളാണ് ഇന്ത്യയിൽ നിന്ന് ഇതിനകം റഷ്യയിലേക്ക് അയച്ചതെന്നാണ് വ്യവസായ വൃത്തങ്ങൾ വ്യക്തമാക്കുന്നത്. ഇന്ധനക്ഷാമം പരിഹരിക്കാനായി പ്രതിമാസം 4,00,000 ടൺ പെട്രോൾ വിവിധ രാജ്യങ്ങളിൽ നിന്ന് ഇറക്കുമതി ചെയ്യാനാണ് റഷ്യയുടെ പദ്ധതി.
വേനൽക്കാലത്ത് റഷ്യയിൽ പ്രതിദിനം കുറഞ്ഞത് 1,10,000 ടൺ പെട്രോളാണ് ആവശ്യമായി വരുന്നത്. എന്നാൽ ഉക്രെയ്ൻ ഡ്രോൺ ആക്രമണങ്ങൾ എണ്ണ ശുദ്ധീകരണ ശാലകളെ ബാധിച്ചതോടെ റഷ്യയിലെ ഒട്ടുമിക്ക ഇടങ്ങളിലും ഇന്ധനക്ഷാമം രൂക്ഷമായി. പെട്രോൾ പമ്പുകളിൽ നീണ്ട ക്യൂവും ഇന്ധനവിലയിൽ വൻ വർധനവുമാണ് ഉണ്ടായത്. ബലാറസിൽ നിന്നുള്ള ഇന്ധന വിതരണം ഇതിനകം റഷ്യ വർദ്ധിപ്പിച്ചിട്ടുണ്ടെങ്കിലും ആവശ്യം നിറവേറ്റാൻ അത് മതിയാകാത്ത സാഹചര്യത്തിലാണ് ഇന്ത്യയെ സമീപിച്ചിരിക്കുന്നത്. ഇറക്കുമതി ചെയ്യുന്ന ഇന്ധനത്തിന് സബ്സിഡി നൽകാനും റഷ്യൻ സർക്കാർ തീരുമാനിച്ചിട്ടുണ്ട്.
റഷ്യയിൽ നിന്ന് റെക്കോർഡ് അളവിൽ ക്രൂഡ് ഓയിൽ ഇറക്കുമതി ചെയ്യുന്ന രാജ്യമാണ് ഇന്ത്യ. ജൂൺ മാസത്തിൽ ഇന്ത്യയുടെ മൊത്തം ക്രൂഡ് ഓയിൽ ഇറക്കുമതിയുടെ പകുതിയിലധികവും റഷ്യയിൽ നിന്നായിരുന്നു. നേരത്തെ റഷ്യൻ ക്രൂഡ് ഓയിൽ ഇന്ത്യ വാങ്ങിയിരുന്നെങ്കിൽ, ഇപ്പോൾ ഇന്ധനക്ഷാമം നേരിടുന്ന റഷ്യയ്ക്ക് ഇന്ത്യ പെട്രോൾ നൽകുന്ന അവസ്ഥയിലേക്ക് കാര്യങ്ങൾ മാറിയിരിക്കുന്നു. ഇന്ധനക്ഷാമം പരിഹരിക്കുന്നതിനായി റഷ്യൻ പ്രസിഡന്റ് വ്ളാഡിമിർ പുടിൻ സർക്കാർ തലത്തിൽ നടപടികൾ വേഗത്തിലാക്കി കഴിഞ്ഞു.
Summary: Facing severe fuel shortages due to Ukrainian drone strikes on its oil refineries, Russia has turned to India for gasoline imports. Moscow is reportedly planning to import 400,000 tons of fuel monthly from various countries, with at least 60,000 metric tons already dispatched from India. While Russia is also increasing supplies from Belarus and implementing tax subsidies to manage the crisis, this move highlights the shifting dynamics in energy trade between New Delhi and Moscow.
