ന്യൂഡൽഹി: ‘ഓപ്പറേഷൻ സിന്ദൂർ’ ദൗത്യത്തിനിടെ ഇന്ത്യൻ റാഫേൽ യുദ്ധവിമാനങ്ങൾ തകർന്നു എന്ന പാക്കിസ്ഥാന്റെ അവകാശവാദങ്ങൾ അടിസ്ഥാനരഹിതമെന്ന് തെളിയിക്കുന്ന ഔദ്യോഗിക രേഖ പുറത്ത്. ഇന്ത്യ വാങ്ങിയ 36 റാഫേൽ വിമാനങ്ങളും സുരക്ഷിതമാണെന്നും, അവയ്ക്കായുള്ള തുടർ അറ്റകുറ്റപ്പണികൾക്കായുള്ള കരാർ നടപടികൾ പുരോഗമിക്കുകയാണെന്നും വ്യക്തമാക്കുന്ന വ്യോമസേനയുടെ ‘റിക്വസ്റ്റ് ഫോർ പ്രൊപ്പോസൽ’ പുറത്തുവന്നു.(Indian Air Force Confirms All 36 Rafale Jets Are Safe After Pakistani False Claims)
ജൂണിൽ പുറത്തിറക്കിയ ഈ രേഖ പ്രകാരം, മുഴുവൻ വിമാനങ്ങൾക്കും അഞ്ചു മാസത്തെ അറ്റകുറ്റപ്പണികളും ലോജിസ്റ്റിക് സഹായവും ഉറപ്പാക്കാൻ വ്യോമസേന ടെൻഡർ വിളിച്ചിട്ടുണ്ട്. സെപ്റ്റംബർ 2026-ന് ശേഷമുള്ള പ്രവർത്തനങ്ങൾക്കായി 2,250 പറക്കൽ മണിക്കൂറുകളാണ് ഇതിൽ ലക്ഷ്യമിടുന്നത്. ഇന്ത്യ ഫ്രാൻസിൽ നിന്ന് വാങ്ങിയ അതേ 36 വിമാനങ്ങളുടെ കണക്കാണ് ഈ കരാറിലും ഉൾപ്പെടുത്തിയിരിക്കുന്നത്. വിമാനങ്ങൾ നഷ്ടപ്പെട്ടിട്ടുണ്ടെങ്കിൽ ഈ കണക്കിൽ വ്യത്യാസം വരണമായിരുന്നുവെന്ന് പ്രതിരോധ വിദഗ്ധർ ചൂണ്ടിക്കാട്ടുന്നു.
പഹൽഗാം ഭീകരാക്രമണത്തിന് മറുപടിയായി ഇന്ത്യ നടത്തിയ ഓപ്പറേഷൻ സിന്ദൂറിനിടെ തങ്ങൾ ഇന്ത്യൻ റാഫേൽ വിമാനങ്ങൾ വെടിവെച്ചിട്ടെന്നായിരുന്നു പാക്കിസ്ഥാന്റെ അവകാശവാദം. എന്നാൽ, പാക്കിസ്ഥാൻ ‘തകർത്തുവെന്ന്’ അവകാശപ്പെട്ട വിമാനങ്ങളുടെ ടൈൽ നമ്പറുകൾ പിന്നീട് വിവിധ ഓപ്പറേഷനുകളിൽ പങ്കെടുത്തതിന്റെ ദൃശ്യങ്ങൾ പുറത്തുവന്നതോടെ പാക് വാദങ്ങൾ പൊളിഞ്ഞിരുന്നു. പ്രതിരോധ സേനയുടെ വിജയത്തെ ഇകഴ്ത്താനുള്ള പാക്കിസ്ഥാന്റെ ബോധപൂർവമായ നീക്കമാണിതെന്ന് ഇന്ത്യ നേരത്തെ തന്നെ വ്യക്തമാക്കിയിരുന്നു.
ഇതിനിടയിൽ, ‘മേക് ഇൻ ഇന്ത്യ’ പദ്ധതിയുടെ ഭാഗമായി 114 റാഫേൽ വിമാനങ്ങൾ കൂടി വാങ്ങാനുള്ള നടപടികളുമായി ഇന്ത്യ മുന്നോട്ട് പോവുകയാണ്. പ്രധാനമന്ത്രി നരേന്ദ്ര മോദിയും ഫ്രഞ്ച് പ്രസിഡന്റ് ഇമ്മാനുവൽ മാക്രോണും തമ്മിൽ നടത്തിയ ചർച്ചയിൽ സഹകരണാടിസ്ഥാനത്തിലുള്ള ഉൽപ്പാദനത്തിന് ധാരണയായിരുന്നു. ഇതിൽ 18 എണ്ണം പൂർണ്ണ സജ്ജമായ വിമാനങ്ങളായും ബാക്കിയുള്ളവ ഇന്ത്യയിൽ തദ്ദേശീയമായി നിർമ്മിക്കാനുമാണ് പദ്ധതി.
Story Summary
An official Indian Air Force document has debunked Pakistan’s claims of destroying Indian Rafale aircraft during Operation Sindoor, confirming that all 36 jets are fully operational and under maintenance. This RFP for bridge support services reinforces India’s stance against Pakistani disinformation and highlights the ongoing plans to procure 114 additional Rafale jets under the ‘Make in India’ initiative.
