നലസോപാര: ടെലിവിഷൻ താരം സഞ്ചിത ഉഗാലെയുടെ (22) മരണത്തിന് പിന്നാലെ, ബോളിവുഡ് താരം സുശാന്ത് സിങ് രാജ്പുത്തിന്റെ മരണവുമായി ഇതിന് ബന്ധമുണ്ടെന്ന ആരോപണവുമായി സഹോദരൻ ആകാശ് സതീഷ് ഉഗാലെ (Sanchita Ugale Suicide). ജൂൺ 14-ന് സുശാന്ത് സിങ് രാജ്പുത്തിന്റെ ചരമവാർഷിക ദിനത്തിൽ തന്നെയാണ് സഞ്ചിതയും ജീവനൊടുക്കിയത് എന്നതാണ് കുടുംബത്തെ ഞെട്ടിക്കുന്ന പ്രധാന സാമ്യം. സിനിമാ-സീരിയൽ മേഖലയിലെ കടുത്ത സമ്മർദ്ദമാണ് സുശാന്തിനെ പോലെ തന്റെ സഹോദരിയെയും ഇത്തരമൊരു തീരുമാനത്തിലേക്ക് നയിച്ചതെന്ന് ആകാശ് ആരോപിക്കുന്നു.
തന്റെ ഇൻസ്റ്റാഗ്രാം റീലിൽ സുശാന്ത് സിങ് രാജ്പുത്തിന് ആദരാഞ്ജലി അർപ്പിച്ചുകൊണ്ട് “ഇറ്റ്സ് എഗെയ്ൻ 14 ജൂൺ” എന്ന് സഞ്ചിത കുറിച്ചിരുന്നു. ഈ പോസ്റ്റ് പങ്കുവെച്ച് തൊട്ടടുത്ത ദിവസം തന്നെ നടി ജീവനൊടുക്കിയത് വലിയ ദുരൂഹതയുണ്ടാക്കുന്നുണ്ടെന്ന് കുടുംബം പറയുന്നു. സംഭവത്തിൽ പ്രധാനമന്ത്രി നരേന്ദ്ര മോദി, രാഷ്ട്രപതി ദ്രൗപതി മുർമു, മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് എന്നിവർ ഇടപെട്ട് ഉന്നതതല അന്വേഷണം നടത്തണമെന്ന് സഹോദരൻ ആവശ്യപ്പെട്ടു.
ഞായറാഴ്ച രാത്രി 7 മണിയോടെയാണ് നലസോപാരയിലെ വസതിയിൽ സഞ്ചിതയെ മരിച്ച നിലയിൽ കണ്ടെത്തിയത്. മുറിക്കുള്ളിൽ പൂട്ടിയിട്ട നിലയിൽ ഫാനിൽ തൂങ്ങിമരിച്ച രീതിയിലാണ് മൃതദേഹം കണ്ടത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പിതാവ് മച്ചിന്ദ്ര ഉഗാലെയുടെ പരാതിയിൽ അച്ചോൾ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. ‘കുങ്കും ഭാഗ്യ’, ‘വാഗ്ലെ കി ദുനിയ’, ‘ദിൽവാലെ ദുൽഹ ലേ ജായേഗി’ തുടങ്ങിയ സീരിയലുകളിലെ വേഷങ്ങളിലൂടെ ശ്രദ്ധേയയായിരുന്നു സഞ്ചിത. മരണകാരണം കണ്ടെത്താനുള്ള അന്വേഷണം പോലീസ് ഊർജിതമാക്കി.
Summary: The death of 22-year-old television actor Sanchita Ugale, who died by suicide on June 14, has sparked controversy after her brother, Akash Satish Ugale, drew parallels between her death and that of actor Sushant Singh Rajput. Both individuals died on June 14, six years apart, and Sanchita’s final social media post was a tribute to Rajput.
