ഹവാന: ക്യൂബൻ തീരത്ത് കടലിൽ 6.1 തീവ്രത രേഖപ്പെടുത്തിയ ശക്തമായ ഭൂചലനം അനുഭവപ്പെട്ടു. തിങ്കളാഴ്ച പ്രാദേശിക സമയം ഉച്ചയ്ക്ക് 2 മണിയോടെയാണ് പ്രകൃതിക്ഷോഭം ഉണ്ടായത്. ഭൂചലനത്തെത്തുടർന്ന് ക്യൂബയുടെ തലസ്ഥാനമായ ഹവാനയിലും സമീപ പ്രദേശങ്ങളിലും കെട്ടിടങ്ങൾ ശക്തമായി കുലുങ്ങിയത് ജനങ്ങളിൽ പരിഭ്രാന്തി പടർത്തി. ആളപായമോ വലിയ നാശനഷ്ടങ്ങളോ റിപ്പോർട്ട് ചെയ്തിട്ടില്ല.(Cuba earthquake, Strong 6.1 Magnitude Earthquake Hits Off Cuban Coast)
ക്യൂബയിലെ മാന്റുവ നഗരത്തിൽ നിന്ന് ഏകദേശം 65 മൈൽ പടിഞ്ഞാറ്-വടക്കുപടിഞ്ഞാറായി കടലിലാണ് ഭൂചലനത്തിന്റെ പ്രഭവകേന്ദ്രം. ഭൂനിരപ്പിൽ നിന്ന് 10 കിലോമീറ്റർ മാത്രം താഴ്ചയിലാണ് പ്രകമ്പനം ഉണ്ടായത്. അമേരിക്കയിലെ ഫ്ലോറിഡ സംസ്ഥാനത്തെ മിയാമി, ഒർലാൻഡോ, ടാമ്പ, ജാക്സൺവിൽ തുടങ്ങിയ പ്രമുഖ നഗരങ്ങളിലും ഭൂചലനത്തിന്റെ പ്രകമ്പനം അനുഭവപ്പെട്ടു. മെക്സിക്കോയുടെ ചില തീരദേശങ്ങളിലും ഭൂചലനം ചെറിയ രീതിയിൽ ബാധിച്ചിട്ടുണ്ട്.
ഉയർന്ന കെട്ടിടങ്ങളിൽ ഉണ്ടായിരുന്നവർ പരിഭ്രാന്തരായി പുറത്തേക്ക് ഓടി. തുടക്കത്തിൽ സുനാമി മുന്നറിയിപ്പ് നൽകിയിരുന്നെങ്കിലും, പിന്നീട് പസഫിക് സുനാമി മുന്നറിയിപ്പ് കേന്ദ്രവും യുഎസ് അധികൃതരും സുനാമി ഭീഷണിയില്ലെന്ന് സ്ഥിരീകരിച്ചു. പ്രദേശത്തെ സ്ഥിതിഗതികൾ അധികൃതർ നിരീക്ഷിച്ചുവരികയാണ്.
Story Summary
A powerful 6.1 magnitude earthquake struck off the coast of Cuba on Monday, causing tremors in Havana and parts of Florida. While the quake sparked initial panic and led to minor evacuations, US authorities have confirmed that there is no tsunami threat and no significant damage has been reported.
