ജയ്പൂർ: ഐപിഎൽ 2026 സീസണിൽ റൺവേട്ട നടത്തി ഓറഞ്ച് ക്യാപ് സ്വന്തമാക്കിയിട്ടും ടീമിനെ ഫൈനലിൽ എത്തിക്കാൻ കഴിയാത്തതിൽ കടുത്ത നിരാശ പ്രകടിപ്പിച്ച് രാജസ്ഥാൻ റോയൽസിന്റെ 15 വയസ്സുകാരൻ യുവവിസ്മയം വൈഭവ് സൂര്യവംശി (Vaibhav Sooryavanshi). പ്രായത്തെ വെല്ലുന്ന തരത്തിലുള്ള ഭയമില്ലാത്ത ബാറ്റിംഗ് ശൈലിയിലൂടെ കഴിഞ്ഞ രണ്ട് മാസമായി ക്രിക്കറ്റ് ലോകത്തെ പ്രധാന ചർച്ചാവിഷയമാണ് ഈ കൗമാരക്കാരൻ. ടൂർണമെന്റിലെ എലിമിനേറ്റർ മത്സരത്തിൽ രാജസ്ഥാൻ റോയൽസ് പരാജയപ്പെട്ടതിന് പിന്നാലെ ഫ്രാഞ്ചൈസി പങ്കുവെച്ച അഭിമുഖത്തിലാണ് താരം തന്റെ വലിയ ലക്ഷ്യങ്ങളെക്കുറിച്ചും ആരാധകരോടുള്ള നന്ദിയെക്കുറിച്ചും മനസ്സ് തുറന്നത്.
രാജസ്ഥാന് രണ്ടാമതൊരു ഐപിഎൽ കിരീടം നേടിക്കൊടുക്കാൻ സാധിക്കാത്തതിൽ തനിക്ക് വലിയ വിഷമമുണ്ടെന്ന് വൈഭവ് സൂര്യവംശി പറഞ്ഞു. തന്നെ വിശ്വസിച്ച് ടീമിനെ ഫൈനലിൽ എത്തിക്കുമെന്ന് പ്രതീക്ഷിച്ച ആരാധകരുടെ ആഗ്രഹം നിറവേറ്റാൻ കഴിയാത്തതിൽ വലിയ സങ്കടമുണ്ട്. എന്നാൽ ആ ദിവസം വളരെ വേഗത്തിൽ തന്നെ വരുമെന്നാണ് പ്രതീക്ഷ. രാജസ്ഥാൻ റോയൽസിന്റെ രണ്ടാം കിരീടത്തിനായി കാത്തിരിക്കുന്ന ആരാധകരോട് തനിക്ക് പറയാനുള്ളത്, തങ്ങളുടെ ലക്ഷ്യം വെറും ഒരു കിരീടം മാത്രമല്ല എന്നാണ്. വരും വർഷങ്ങളിൽ മൂന്നും നാലും അഞ്ചും കിരീടങ്ങൾ ഒന്നിച്ച് നേടുകയാണ് ലക്ഷ്യമെന്നും വൈഭവ് വ്യക്തമാക്കി.
കളിക്കളത്തിലും സോഷ്യൽ മീഡിയയിലും തനിക്ക് ലഭിച്ച വലിയ ജനപിന്തുണയ്ക്ക് കൈകൂപ്പി നന്ദി പറയുന്നതായും താരം കൂട്ടിച്ചേർത്തു. താൻ ഔട്ടാകുമ്പോൾ വീട്ടമ്മമാർ സങ്കടപ്പെടുന്നതും, തന്റെ ബാറ്റിംഗ് കുടുംബസമേതം ഇരുന്ന് കാണുന്നതുമായ ദൃശ്യങ്ങൾ സോഷ്യൽ മീഡിയയിൽ കണ്ടപ്പോൾ വാക്കുകൾക്കതീതമായ സന്തോഷമാണ് തോന്നിയതെന്നും ഈ 15-കാരൻ പറഞ്ഞു. ഐപിഎല്ലിലെ റെക്കോർഡ് പ്രകടനത്തിന് പിന്നാലെ അടുത്തിടെ വൈഭവിന് ഇന്ത്യൻ ടീമിലേക്ക് വിളിവന്നിരുന്നു.
Summary: Rajasthan Royals’ 15-year-old batting sensation Vaibhav Sooryavanshi expressed deep disappointment despite winning the prestigious Orange Cap in IPL 2026, following his team’s heartbreaking exit in the Eliminator match. In an official interview shared by the franchise, the teenage prodigy stated that he felt immense guilt for not being able to guide the team to the finals to secure their second historic title.
