ടെക്സസ്: അപൂർവ ജനിതക രോഗം ബാധിച്ച് മരിച്ച മകന്റെ അന്ത്യകർമ്മങ്ങളിൽ പങ്കെടുക്കാൻ പിതാവിനെ അനുവദിക്കാതെ അമേരിക്കൻ എമിഗ്രേഷൻ വിഭാഗം (ICE Funeral Denial). ടെക്സസിലെ അർലിംഗ്ടണിൽ 30 വയസ്സുകാരനായ വെയ്ൽ തറാബിഷി മരിക്കുമ്പോൾ പിതാവ് മഹർ തറാബിഷി എമിഗ്രേഷൻ വിഭാഗത്തിന്റെ (ICE) തടങ്കലിലായിരുന്നു. പേശികൾക്ക് ബലക്ഷയം സംഭവിക്കുന്ന ‘പോംപെ ഡിസീസ്’ ബാധിച്ച മകനെ 30 വർഷമായി പരിചരിച്ചിരുന്നത് 62-കാരനായ മഹർ ആയിരുന്നു. മകനെ കാണാൻ അവസാന നിമിഷം പോലും ഇദ്ദേഹത്തെ അനുവദിച്ചില്ല. വ്യാഴാഴ്ച നടന്ന സംസ്കാര ചടങ്ങിൽ പങ്കെടുക്കാനുള്ള അപേക്ഷയും അധികൃതർ നിരാകരിച്ചു.
ട്രംപ് ഭരണകൂടം നടപ്പിലാക്കിയ കർശനമായ കുടിയേറ്റ നയങ്ങളുടെ ഭാഗമായാണ് വർഷങ്ങളായി നിയമപരമായി അമേരിക്കയിൽ കഴിഞ്ഞിരുന്ന മഹറിനെ കഴിഞ്ഞ ഒക്ടോബറിൽ തടങ്കലിലാക്കിയത്. 1994 മുതൽ ജോർദാൻ പൗരനായ ഇദ്ദേഹം അമേരിക്കയിൽ താമസിച്ച് വരികയായിരുന്നു. മകന്റെ ചികിൽസയ്ക്കായി പ്രത്യേക കോടതി ഉത്തരവ് പ്രകാരം ഇദ്ദേഹത്തിന് രാജ്യത്ത് തുടരാൻ അനുമതിയുണ്ടായിരുന്നു. എന്നാൽ കഴിഞ്ഞ ഒക്ടോബറിലെ പതിവ് പരിശോധനയ്ക്കിടെ ഇദ്ദേഹത്തെ എമിഗ്രേഷൻ ഉദ്യോഗസ്ഥർ അറസ്റ്റ് ചെയ്യുകയായിരുന്നു. താൻ മരിക്കുന്നതിന് മുൻപ് പിതാവിനെ ഒന്ന് കാണണമെന്നതായിരുന്നു വെയ്ലിന്റെ അവസാന ആഗ്രഹമെന്ന് കുടുംബാംഗങ്ങൾ വിതുമ്പലോടെ പറഞ്ഞു.
മഹർ തറാബിഷിക്ക് പാലസ്തീൻ വിമോചന സംഘടനയുമായി ബന്ധമുണ്ടെന്നാരോപിച്ചാണ് എമിഗ്രേഷൻ വിഭാഗം മാനുഷിക പരിഗണനകൾ നിഷേധിച്ചത്. എന്നാൽ ഈ ആരോപണങ്ങൾ മഹറിന്റെ അഭിഭാഷകർ നിഷേധിച്ചു. മഹറിനെ ജയിലിലാക്കിയത് വെയ്ലിന്റെ ആരോഗ്യത്തെയും മാനസികാവസ്ഥയെയും തകർത്തു എന്നും മകന്റെ മരണത്തിന് എമിഗ്രേഷൻ വിഭാഗമാണ് ഉത്തരവാദി എന്നും കുടുംബം ആരോപിക്കുന്നു. അമേരിക്കയിൽ കുറ്റകൃത്യങ്ങളിൽ ഒന്നും ഏർപ്പെടാത്ത ഒരാളോട് കാണിച്ച ഈ ക്രൂരതയ്ക്കെതിരെ വ്യാപക പ്രതിഷേധമാണ് ഉയരുന്നത്. മകന്റെ അവസാന ആഗ്രഹം നിറവേറ്റാൻ അനുവദിക്കാത്തത് ഈ രാജ്യത്തിന് തന്നെ നാണക്കേടാണെന്ന് മനുഷ്യാവകാശ പ്രവർത്തകർ പ്രതികരിച്ചു.
Summary
The U.S. Immigration and Customs Enforcement (ICE) has denied a Texas man, Maher Tarabishi, permission to attend his disabled son’s funeral. Maher, who had been the primary caregiver for his son Wael for 30 years, was detained as part of an immigration crackdown, and the family holds the agency responsible for the son’s subsequent physical and psychological decline.
