തിരുവനന്തപുരം: തലസ്ഥാനത്ത് സുഹൃത്തുക്കൾ തമ്മിലുണ്ടായ തർക്കത്തെയും സംഘർഷത്തെയും തുടർന്ന് 17 വയസുകാരൻ കൊല്ലപ്പെട്ടു (Teen killed Thiruvananthapuram) . പെരിങ്ങമല സ്വദേശിയായ ശിവസൂര്യയാണ് മരിച്ചത് . സംഭവവുമായി ബന്ധപ്പെട്ട് ശിവസൂര്യയുടെ രണ്ട് സുഹൃത്തുക്കളെ പോലീസ് കസ്റ്റഡിയിലെടുത്തിട്ടുണ്ട് . ലഹരി ഉപയോഗത്തെത്തുടർന്നുണ്ടായ തർക്കമാണ് കൊലപാതകത്തിൽ കലാശിച്ചതെന്നാണ് പോലീസിന്റെ പ്രാഥമിക നിഗമനം.
നരുവാമൂട് പോലീസ് സ്റ്റേഷൻ പരിധിയിലെ പുന്നുമൂട് ജംഗ്ഷനിലാണ് ഞെട്ടിക്കുന്ന ഈ സംഭവം അരങ്ങേറിയത് . ശിവസൂര്യയും സുഹൃത്തുക്കളായ അജിത്, കാർത്തിക് എന്നിവരും ഒരുമിച്ചാണ് ബൈക്കിൽ ഇവിടെയെത്തിയത്. തുടർന്ന് ഇവർ തമ്മിൽ വാക്കുതർക്കവും ഉന്തും തള്ളുമുണ്ടാകുകയായിരുന്നു.
സംഘർഷത്തിനിടയിൽ ശിവസൂര്യ സമീപത്തുള്ള ഒരു കടയുടെ ഗ്ലാസ് ഡോറിന് (ചില്ലിന്) മുകളിലേക്ക് തെറിച്ചുവീണു. ചില്ല് തകർന്ന് ശരീരത്തിലേക്ക് തുളച്ചുകയറുകയും മാരകമായി മുറിവേൽക്കുകയുമായിരുന്നു. ഉടൻ തന്നെ ഒപ്പമുണ്ടായിരുന്ന സുഹൃത്തുക്കൾ ശിവസൂര്യയെ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു. ശരീരമാസകലം മുറിവേറ്റ നിലയിലാണ് ശിവസൂര്യയെ ആശുപത്രിയിൽ എത്തിച്ചതെന്ന് ഡോക്ടർമാർ വ്യക്തമാക്കി .
തർക്കത്തിലേക്കും കൊലപാതകത്തിലേക്കും നയിച്ച കൃത്യമായ കാരണം എന്താണെന്ന് വ്യക്തമല്ലെങ്കിലും, മൂവരും ലഹരി ഉപയോഗിച്ച നിലയിലായിരുന്നുവെന്ന് പോലീസ് സ്ഥിരീകരിച്ചിട്ടുണ്ട് . സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് നരുവാമൂട് പോലീസ് അറിയിച്ചു.
Short Story Summary: A 17-year-old boy named Shivasurya from Peringamala was killed following a drug-fueled altercation with his friends in Thiruvananthapuram. The incident occurred at Punnumoodu Junction within the Naruvamoodu police station limits, where three friends arrived on a motorcycle and got into a physical fight. During the scuffle, Shivasurya was pushed and crashed into the glass door of a nearby shop, causing shards of glass to pierce his body and inflict fatal injuries. Although his friends immediately rushed him to the Medical College Hospital, he succumbed to his injuries and was declared dead upon arrival. The police have taken two of his friends, Ajith and Karthik, into custody, and preliminary investigations indicate that the tragic incident was triggered by a dispute under the influence of drugs.
