ന്യൂഡൽഹി: ദേശീയ തലസ്ഥാനമായ ഡൽഹിയിൽ തുടരുന്ന കടുത്ത കുടിവെള്ള ക്ഷാമത്തിന് കാരണം കഠിനമായ ചൂടുമൂലം പൈപ്പ് ലൈനുകളിലെ വെള്ളം ആവിയായിപ്പോകുന്നതാണെന്ന മുഖ്യമന്ത്രി രേഖാ ഗുപ്തയുടെ പ്രസ്താവന സോഷ്യൽ മീഡിയയിൽ വലിയ വിവാദത്തിനും പരിഹാസത്തിനും വഴിവെക്കുന്നു ( Rekha Gupta Evaporation Water Crisis). ബിജെപി സംഘടിപ്പിച്ച ഒരു പരിപാടിയിൽ സംസാരിക്കവെയായിരുന്നു മുഖ്യമന്ത്രിയുടെ ഈ വിചിത്രമായ വാദം. കടുത്ത ഉഷ്ണതരംഗം കാരണം വിതരണം ചെയ്യുന്ന വെള്ളത്തിന്റെ ഒരു ഭാഗം വഴിമധ്യേ തന്നെ ആവിയായിപ്പോകുന്നുണ്ടെന്നും അതുകൊണ്ടാണ് ഡൽഹിയിൽ ജലക്ഷാമം നേരിടുന്നതെന്നുമാണ് മുഖ്യമന്ത്രി വീഡിയോയിൽ പറയുന്നത്. ഈ വീഡിയോ ദൃശ്യങ്ങൾ എക്സ് ഉൾപ്പെടെയുള്ള പ്ലാറ്റ്ഫോമുകളിൽ വ്യാപകമായി പ്രചരിച്ചതോടെ പ്രതിപക്ഷ നേതാക്കളും നെറ്റിസൺസും രംഗത്തെത്തി.
മുൻ ഡൽഹി മന്ത്രി സൗരഭ് ഭരദ്വാജ്, കോൺഗ്രസ് വക്താവ് രാഗിണി നായക് എന്നിവർ മുഖ്യമന്ത്രിയുടെ ശാസ്ത്രീയ വിവേചനമില്ലാത്ത പ്രസ്താവനയെ പരിഹസിച്ച് രംഗത്തെത്തിയിട്ടുണ്ട്. നിലവിൽ ദക്ഷിണ ഡൽഹിയിലെ ദക്ഷിൺപുരി ഉൾപ്പെടെയുള്ള ചേരിപ്രദേശങ്ങളിൽ അയ്യായിരത്തിലധികം ആളുകളാണ് കുടിവെള്ളമില്ലാതെ വലയുന്നത്. 45 ഡിഗ്രിക്ക് മുകളിൽ ചൂട് ഉയർന്ന സാഹചര്യത്തിൽ പ്രദേശത്തെ സ്ത്രീകൾ തങ്ങൾ ജോലി ചെയ്യുന്ന വീടുകളിൽ പോയി കുളിക്കേണ്ടി വരുന്ന ദുരവസ്ഥ പോലും മാധ്യമങ്ങൾ റിപ്പോർട്ട് ചെയ്തിരുന്നു. യമുനാ നദിയിലെ വസിരാബാദ് ബാരേജിൽ ജലനിരപ്പ് സാധാരണ അളവിലും അഞ്ച് അടിയിലധികം താഴ്ന്നതാണ് ഡൽഹിയിലെ പ്രധാന ജലശുദ്ധീകരണ പ്ലാന്റുകളുടെ പ്രവർത്തനം തടസ്സപ്പെടാനും ജലക്ഷാമം രൂക്ഷമാകാനും കാരണമെന്നിരിക്കെയാണ് മുഖ്യമന്ത്രിയുടെ ഈ പുതിയ പ്രസ്താവന.
Summary: Delhi Chief Minister Rekha Gupta has sparked intense online debate and mockery after claiming that the city’s severe water crisis is caused by water evaporating mid-way due to the intense heatwave. While addressing a BJP event, she stated that the extreme heat causes a portion of the supplied water to evaporate, leading to shortages. Opposition leaders, including Congress spokesperson Ragini Nayak and former Delhi minister Saurabh Bharadwaj, took a jibe at her remarks as residents in areas like Dakshinpuri struggle with water scarcity amid temperatures exceeding 45 degrees Celsius.
