കൊല്ലം: കൊല്ലം നഗരത്തിൽ സിറ്റി പോലീസ് കമ്മീഷണർ ഓഫീസിന് സമീപം റോഡരികിൽ കിടന്നുറങ്ങുകയായിരുന്ന വയോധികനെ ക്രൂരമായി കൊലപ്പെടുത്തിയ കേസിൽ പിടിയിലായ പ്രതി സീരിയൽ കില്ലറാണോ (Serial Killer) എന്ന് പോലീസ് സംശയിക്കുന്നു (Kollam murder case). തമിഴ്നാട് വാൽപ്പാറയിൽ വെച്ച് കൊല്ലം സിറ്റി പോലീസിന്റെ പിടിയിലായ തമിഴ്നാട് സ്വദേശി വിജു സുരേഷ് സ്ഥിരം കുറ്റവാളിയാണെന്നാണ് പുറത്തുവരുന്ന വിവരങ്ങൾ. വിവിധയിടങ്ങളിൽ അലഞ്ഞുതിരിഞ്ഞു നടന്ന് കുറ്റകൃത്യങ്ങൾ ചെയ്യുന്നതാണ് ഇയാളുടെ രീതി. വഴിപോക്കരോടും അഗതികളോടും പണം ആവശ്യപ്പെടുകയും, നൽകാത്ത പക്ഷം മാരകമായി ആക്രമിക്കുകയുമാണ് ഇയാളുടെ പതിവ് രീതി.
ആധുനിക അന്വേഷണ സംവിധാനങ്ങളെ കബളിപ്പിക്കാനായി ഇയാൾ മൊബൈൽ ഫോണുകൾ ഒട്ടും ഉപയോഗിക്കാറില്ലെന്ന് പോലീസ് കണ്ടെത്തിയിട്ടുണ്ട്. സൈബർ സെല്ലിന്റെ സഹായത്തോടെയുള്ള അന്വേഷണം തടയാൻ ഇത് സഹായിക്കുന്നത് കൊണ്ട് തന്നെ മുൻപ് ഇയാൾ ചെയ്ത പല കുറ്റകൃത്യങ്ങളും പോലീസിന്റെ ശ്രദ്ധയിൽപ്പെടാതെ പോയിട്ടുണ്ട്. ദൂരസ്ഥലങ്ങളിലേക്ക് സഞ്ചരിക്കാൻ ചരക്കുലോറികളിലും ബൈക്കുകളിലും ലിഫ്റ്റ് ചോദിച്ചാണ് ഇയാൾ യാത്ര ചെയ്യാറുള്ളത്.
ഈ സാഹചര്യത്തിൽ മാസങ്ങൾക്ക് മുൻപ് കൊല്ലം കല്ലുവാതുക്കലിൽ നടന്ന മറ്റൊരു വയോധികന്റെ കൊലപാതകത്തിലും ഇയാൾക്ക് പങ്കുണ്ടോ എന്ന് പോലീസ് അതീവ ഗൗരവത്തോടെ അന്വേഷിക്കുന്നുണ്ട്. കല്ലുവാതുക്കൽ പഞ്ചായത്ത് ഓഫീസിന് സമീപം നിർമ്മാണത്തിലിരുന്ന കെട്ടിടത്തിൽ പാരിപ്പള്ളി തൊളിക്കോട് സ്വദേശി രവീന്ദ്രൻ (65) എന്ന വയോധികനെ രക്തം വാർന്ന് മരിച്ച നിലയിൽ കണ്ടെത്തിയിരുന്നു. ഉറങ്ങിക്കിടക്കുമ്പോൾ തലയ്ക്കേറ്റ കനത്ത അടിയാണ് മരണകാരണമെന്ന് പോസ്റ്റ്മോർട്ടത്തിൽ വ്യക്തമായതിനെ തുടർന്ന് പോലീസ് കൊലപാതകത്തിന് കേസ് രജിസ്റ്റർ ചെയ്തിരുന്നു. ഈ രണ്ട് കൊലപാതകങ്ങളുടെയും രീതികൾക്ക് (Modus Operandi) തമ്മിൽ സാമ്യമുള്ളതിനാലാണ് പ്രതിയെ വിശദമായി ചോദ്യം ചെയ്ത് വ്യക്തത വരുത്താൻ കൊല്ലം സിറ്റി പോലീസ് തീരുമാനിച്ചിരിക്കുന്നത്.
Story Summary: The Kollam City Police suspect that Viju Suresh, a Tamil Nadu native arrested in Valparai for murdering an elderly man near the Kollam Commissioner’s office, could be a serial killer. The suspect, who travels by hitchhiking and completely avoids using mobile phones to evade track, is also being interrogated for his alleged involvement in another similar murder of an elderly man at Kalluvathukkal.
