കൊച്ചി: സോഷ്യൽ മീഡിയയിലെ ചില ഓൺലൈൻ പേജുകളിൽ തനിക്കെതിരെ പ്രചരിക്കുന്ന അതിരുവിട്ട വ്യാജ വാർത്തകൾക്കും തമ്പ്നെയിലുകൾക്കുമെതിരെ ശക്തമായ പ്രതികരണവുമായി പ്രശസ്ത നടിയും ജനപ്രിയ അവതാരകയുമായ ജുവൽ മേരി (Jewel Mary cancer fake news). കാൻസർ ബാധിച്ച് ശബ്ദം പൂർണ്ണമായും നഷ്ടപ്പെട്ട് താരം അതീവ ഗുരുതരാവസ്ഥയിൽ മരണം കാത്തു കിടക്കുകയാണെന്ന രീതിയിൽ കഴിഞ്ഞ ദിവസങ്ങളിൽ പ്രചരിച്ച വ്യാജ പ്രചരണങ്ങളുടെ സത്യാവസ്ഥ ഒരു വീഡിയോയിലൂടെയാണ് താരം ആരാധകർക്ക് മുന്നിൽ തുറന്നു കാട്ടിയത്.
“രണ്ടു ദിവസമായി എന്റെ ശ്രദ്ധയിൽപ്പെട്ട ഒരു കാര്യത്തിന്റെ സത്യാവസ്ഥ നിങ്ങളെ ഒന്ന് ബോധ്യപ്പെടുത്താൻ വേണ്ടിയാണ് ഈ വീഡിയോ ഇടുന്നത്. ചത്തിട്ടില്ല മക്കളെ ഞാൻ ചത്തിട്ടില്ല!” എന്ന് ജുവൽ മേരി വീഡിയോയിലൂടെ സരസമായും എന്നാൽ ശക്തമായും പറഞ്ഞു. ‘എന്റെ ശബ്ദം നഷ്ടപ്പെട്ടു, ഞാൻ മരണം കാത്തു കിടക്കുകയാണ്, എനിക്ക് അനങ്ങാൻ പറ്റില്ല’ എന്നൊക്കെയുള്ള ക്യാപ്ഷനുകളുമായി ചിലർ തന്നെ ജീവനോടെ കൊന്ന് അടിയന്തരത്തിന്റെ കാർഡ് വരെ അടിച്ചു കൊണ്ടിരിക്കുകയാണെന്ന് ജുവൽ കുറ്റപ്പെടുത്തി.
താൻ പൂർണ്ണ ആരോഗ്യവതിയാണെന്ന് വ്യക്തമാക്കിയ ജുവൽ, വാർത്തകൾക്ക് പിന്നിലെ യഥാർത്ഥ പശ്ചാത്തലവും വിശദീകരിച്ചു. കഴിഞ്ഞ 2023-ലായിരുന്നു ജുവൽ മേരിക്ക് തൈറോയ്ഡ് കാൻസർ (Thyroid Cancer) കണ്ടെത്തുന്നത്. തുടർന്ന് നടന്ന വിജയകരമായ ശസ്ത്രക്രിയയ്ക്ക് ശേഷം താരം രോഗമുക്തി നേടിയിരുന്നു. പിന്നീട് പ്രശസ്തമായ ‘കേരള ക്യാൻ’ എന്ന മാധ്യമ പരിപാടിയിൽ അതിഥിയായി പങ്കെടുത്തപ്പോൾ തന്റെ ആ പഴയ കാൻസർ അതിജീവന അനുഭവങ്ങളെക്കുറിച്ച് സംസാരിച്ചിരുന്നു. അവിടെ പറഞ്ഞ കാര്യങ്ങൾ മാത്രം അടർത്തിയെടുത്ത്, ഇപ്പോൾ താരം കടുത്ത രോഗാവസ്ഥയിലാണെന്ന ധ്വനിയോടെ തെറ്റിദ്ധരിപ്പിക്കുന്ന ക്യാപ്ഷനുകൾ നൽകിയാണ് ചില ഓൺലൈൻ മാധ്യമങ്ങൾ വാർത്ത ചമച്ചതെന്ന് ജുവൽ തുറന്നടിച്ചു.
തന്റെ മരണം ആഘോഷിക്കാൻ നോക്കുന്ന ഓൺലൈൻ സഹോദരന്മാരോട്, എന്റെ മരിപ്പിനുള്ള ചായ കൊടുക്കാൻ ഒട്ടുമായിട്ടില്ലെന്ന് താരം ഓർമ്മിപ്പിച്ചു. താൻ നല്ല ജീവനോടെയും സന്തോഷത്തോടെയും ഇവിടെ തന്നെയുണ്ടെന്നും, വാർത്തകൾ കണ്ട് തന്നെ സ്നേഹിക്കുന്ന ഒരുപാട് പേർ ടെൻഷനടച്ച് വിളിക്കുന്നുണ്ടെന്നും താരം കൂട്ടിച്ചേർത്തു. സോഷ്യൽ മീഡിയയിലെ ഇത്തരത്തിലുള്ള വ്യാജ ക്ലിക്ക് ബൈറ്റ് (Clickbait) വാർത്തകൾ വിശ്വസിക്കരുതെന്നും താൻ പൂർണ്ണമായി ഹാപ്പിയാണെന്നും പറഞ്ഞാണ് താരം വീഡിയോ അവസാനിപ്പിച്ചത്.
Story Summary: Actress and TV host Jewel Mary has strongly hit back at fake online news claiming she is on her deathbed due to cancer. Clarifying her health status via a video, she stated she was diagnosed with thyroid cancer in 2023, is now fully cured, and is completely healthy.
