കണ്ണൂർ: വാഹനാപകടത്തിൽ ഗുരുതരമായി പരിക്കേറ്റ് മസ്തിഷ്ക മരണം സംഭവിച്ച യുവാവ് നാല് പേർക്ക് പുതുജീവനേകി യാത്രയായി. കണ്ണൂർ സ്വദേശിയായ അർജുൻ ആണ് സ്വന്തം ഹൃദയവും കരളും രണ്ട് വൃക്കകളും ദാനം ചെയ്ത് അവയവമാറ്റ ശസ്ത്രക്രിയ കാത്തുുകഴിഞ്ഞിരുന്ന രോഗികൾക്ക് പുതിയ ജീവിതം സമ്മാനിച്ചത് (Arjun Organ Donation Kannur). ഗുരുതര പരിക്കുകളോടെ കണ്ണൂർ ആസ്റ്റർ മിംസ് ആശുപത്രിയിൽ പ്രവേശിപ്പിക്കപ്പെട്ട അർജുന്റെ ജീവൻ രക്ഷിക്കാൻ ഡോക്ടർമാർ പരമാവധി ശ്രമിച്ചെങ്കിലും മെയ് 31-ന് വൈകുന്നേരത്തോടെ മസ്തിഷ്ക മരണം സ്ഥിരീകരിക്കുകയായിരുന്നു. മകന്റെ വേർപാടിന്റെ കഠിനമായ ദുഃഖത്തിനിടയിലും അവയവദാനമെന്ന ഉദാത്തമായ തീരുമാനമെടുത്ത് അർജുന്റെ മാതാപിതാക്കൾ മാതൃകയായി. സംസ്ഥാന സർക്കാരിന്റെ അവയവദാന ഏജൻസിയായ ‘കെ-സോട്ടോ’ (K-SOTTO) വഴിയാണ് അവയവ കൈമാറ്റ പ്രക്രിയകൾ പൂർണ്ണമായും ഏകോപിപ്പിച്ചത്.
ആസ്റ്റർ മിംസിലെയും മറ്റ് ആശുപത്രികളിലെയും വിദഗ്ദ്ധ സർജന്മാരുടെ നേതൃത്വത്തിൽ മണിക്കൂറുകൾ നീണ്ട സങ്കീർണ്ണമായ ശസ്ത്രക്രിയയിലൂടെയാണ് അവയവങ്ങൾ വിജയകരമായി എടുത്തത്. അർജുന്റെ ഹൃദയം എയർ ആംബുലൻസ് മാർഗ്ഗം അതിവേഗം കൊച്ചി ആസ്റ്റർ മെഡ്സിറ്റിയിൽ ചികിത്സയിലുള്ള 48-കാരനായ മലപ്പുറം സ്വദേശിക്കായി എത്തിച്ചു. വൃക്കകളിൽ ഒന്ന് കണ്ണൂർ ആസ്റ്റർ മിംസിലെ രോഗിക്കും, രണ്ടാമത്തെ വൃക്ക കോഴിക്കോട് ഗവൺമെന്റ് മെഡിക്കൽ കോളേജിലെ രോഗിക്കും, കരൾ കോഴിക്കോട് ബേബി മെമ്മോറിയൽ ആശുപത്രിയിലുള്ള രോഗിക്കുമാണ് നൽകിയത്. എയർ ആംബുലൻസും പോലീസിന്റെ നേതൃത്വത്തിലുള്ള ഗ്രീൻ ചാനൽ സംവിധാനവും ഉപയോഗിച്ച് അതീവ അടിയന്തര സാഹചര്യത്തിൽ അവയവങ്ങൾ കൃത്യസമയത്ത് ലക്ഷ്യസ്ഥാനങ്ങളിൽ എത്തിക്കാൻ കഴിഞ്ഞത് വലിയ കൂട്ടായ്മയുടെ വിജയമാണെന്ന് ആസ്റ്റർ മിംസ് അധികൃതർ വ്യക്തമാക്കി.
Summary: A 22-year-old youth named Arjun from Kannur gave a lease of life to four people by donating his heart, liver, and two kidneys after being declared brain-dead following a road accident. His heart was transported via an air ambulance using a green channel corridor from Kannur to Kochi Aster Medcity for a patient from Malappuram. The complex organ harvesting and transplantation processes were efficiently coordinated through the state government’s organ donation agency, K-SOTTO.
