ഗലാറ്റി: യുക്രെയ്നുമായുള്ള അതിർത്തി പങ്കിടുന്ന നാറ്റോ സഖ്യരാജ്യമായ റൊമാനിയയിലെ ഒരു പത്തുനില ഫ്ലാറ്റിലേക്ക് റഷ്യൻ ഡ്രോൺ പതിച്ചു പൊട്ടിത്തെറിച്ചതിനെ തുടർന്ന് കിഴക്കൻ യൂറോപ്പിൽ യുദ്ധഭീതിയും നയതന്ത്ര പിരിമുറുക്കവും ശക്തമാകുന്നു (Russian Drone Hits Romania Apartment). റൊമാനിയൻ അതിർത്തിയോട് ചേർന്നുള്ള യുക്രെയ്നിന്റെ ഇസ്മായിൽ തുറമുഖത്തിന് നേരെ റഷ്യ നടത്തിയ വ്യോമാക്രമണത്തിനിടയിലാണ് റൊമാനിയൻ വ്യോമാതിർത്തി ലംഘിച്ച് ഡ്രോൺ ജനവാസ മേഖലയിൽ പതിച്ചത്. റൊമാനിയയിലെ ഗലാറ്റി നഗരത്തിലുണ്ടായ ഈ സ്ഫോടനത്തിൽ ഒരു സ്ത്രീക്കും കുട്ടിക്കും നിസ്സാര പരിക്കേൽക്കുകയും ഫ്ലാറ്റിലെ താമസക്കാരായ എഴുപതോളം പേരെ അടിയന്തരമായി ഒഴിപ്പിക്കുകയും ചെയ്തു. റഷ്യൻ അധിനിവേശം ആരംഭിച്ചതിന് ശേഷം ഒരു നാറ്റോ സഖ്യരാജ്യത്തെ ജനസാന്ദ്രതയേറിയ നഗരത്തിൽ റഷ്യൻ ഡ്രോൺ പതിച്ച് ആളപായമുണ്ടാകുന്നത് ഇതാദ്യമായാണ് എന്നതിനാൽ സംഭവം അതീവ ഗൗരവത്തോടെയാണ് പാശ്ചാത്യ രാജ്യങ്ങൾ കാണുന്നത്.
റഷ്യയുടെ ഈ നടപടി അവിവേകമാണെന്ന് കുറ്റപ്പെടുത്തിയ നാറ്റോ ജനറൽ സെക്രട്ടറി മാർക്ക് റുട്ടെ, സഖ്യകക്ഷികളുടെ ഒരിഞ്ച് ഭൂമി പോലും വിട്ടുകൊടുക്കാതെ സംരക്ഷിക്കാൻ നാറ്റോ സജ്ജമാണെന്ന് വ്യക്തമാക്കി. റഷ്യൻ ഡ്രോൺ അതിർത്തി കടന്നതിനെ തുടർന്ന് റൊമാനിയ രണ്ട് എഫ്-16 യുദ്ധവിമാനങ്ങൾ അടിയന്തരമായി വിന്യസിച്ചെങ്കിലും കുറഞ്ഞ ഉയരത്തിൽ പറന്നതിനാൽ റഡാറുകൾക്ക് ഡ്രോണിനെ കൃത്യമായി തടയാൻ സാധിച്ചില്ല. സംഭവത്തിൽ പ്രതിഷേധിച്ച് റൊമാനിയൻ പ്രസിഡന്റ് നിക്കോസർ ഡാൻ കോൺസ്റ്റാന്റയിലെ റഷ്യൻ കോൺസുലേറ്റ് അടച്ചുപൂട്ടാനും റഷ്യൻ കോൺസലിനെ രാജ്യത്ത് നിന്ന് പുറത്താക്കാനും ഉത്തരവിട്ടു. എന്നാൽ യൂറോപ്യൻ രാജ്യങ്ങളിലേക്ക് ഡ്രോണുകൾ ഇനിയും വഴിതെറ്റി വീഴുമെന്നും അവിടുത്തെ ജനങ്ങളുടെ ഉറക്കം നഷ്ടപ്പെടുമെന്നും റഷ്യൻ സെക്യൂരിറ്റി കൗൺസിൽ ഡെപ്യൂട്ടി ചെയർമാൻ ദിമിത്രി മെദ്വദേവ് മുന്നറിയിപ്പ് നൽകി. അമേരിക്കൻ പ്രസിഡന്റ് ഡൊണാൾഡ് ട്രംപ് നാറ്റോ സഖ്യത്തിന്റെ സുരക്ഷാ കരാറുകളിൽ സംശയം പ്രകടിപ്പിക്കുന്നതിനിടയിലാണ് നാറ്റോയുടെ ക്ഷമ പരീക്ഷിച്ചുകൊണ്ടുള്ള റഷ്യയുടെ ഈ നീക്കം എന്നത് പ്രതിരോധ മേഖലയിൽ വലിയ ആശങ്ക ഉയർത്തുന്നുണ്ട്.
Summary: NATO has pledged to defend every inch of allied territory after a Russian drone crashed into a 10-storey apartment block in Galati, Romania, during an attack on Ukraine. The drone explosion caused minor injuries to a woman and a child, leading to the evacuation of 70 residents and prompting Romania to expel the Russian consul. While NATO condemned Moscow’s reckless behavior, regional tensions have escalated amid worries about the Ukraine war spilling further into European borders.
