ബെംഗളൂരു: ആഫ്രിക്കൻ രാജ്യങ്ങളിൽ എബോള വൈറസ് ബാധ പടർന്നുപിടിക്കുന്ന പശ്ചാത്തലത്തിൽ, ഉഗാണ്ടയിൽ നിന്നും ബെംഗളൂരുവിൽ മടങ്ങിയെത്തിയ ഇരുപത്തിയെട്ടുകാരിയായ യുവതിയെ നിരീക്ഷണത്തിനായി സർക്കാർ ആശുപത്രിയിലെ ഐസൊലേഷൻ വാർഡിൽ പ്രവേശിപ്പിച്ചു (Ebola Suspected Case Bengaluru). അഹമ്മദാബാദ് വഴി ചൊവ്വാഴ്ച ബെംഗളൂരുവിൽ എത്തിയ ഇവരെ ഹോട്ടലിൽ നിന്നും പ്രത്യേക നിരീക്ഷണ കേന്ദ്രത്തിലേക്ക് മാറ്റുകയായിരുന്നു. യുവതിക്ക് നേരിയ ശരീരവേദന ഒഴിച്ചാൽ മറ്റ് ഗുരുതരമായ ലക്ഷണങ്ങളൊന്നുമില്ലെന്നും നിലവിൽ ആരോഗ്യാവസ്ഥ തൃപ്തികരമാണെന്നും ആരോഗ്യവകുപ്പ് അധികൃതർ വ്യക്തമാക്കി. യുവതിയുടെ രക്തസാമ്പിളുകൾ കൂടുതൽ പരിശോധനകൾക്കായി പൂനെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിലേക്ക് അയച്ചിട്ടുണ്ട്. നിലവിൽ ഇന്ത്യയിൽ എവിടെയും എബോള സ്ഥിരീകരിച്ചിട്ടില്ലെന്നും ആശങ്കപ്പെടേണ്ട സാഹചര്യമില്ലെന്നും കേന്ദ്ര ആരോഗ്യ-കുടുംബക്ഷേമ മന്ത്രാലയം ഔദ്യോഗികമായി അറിയിച്ചു.
ആഫ്രിക്കൻ രാജ്യങ്ങളായ കോംഗോ, ഉഗാണ്ട, ദക്ഷിണ സുഡാൻ എന്നിവിടങ്ങളിൽ എബോള വൈറസിന്റെ അപൂർവ്വ ഇനമായ ‘ബുന്ദിബുഗ്യോ’ വകഭേദം പടരുന്ന സാഹചര്യത്തിൽ ലോകാരോഗ്യ സംഘടന അന്താരാഷ്ട്ര ആരോഗ്യ അടിയന്തരാവസ്ഥ പ്രഖ്യാപിച്ചിട്ടുണ്ട്. ഇതിനെത്തുടർന്ന് കേന്ദ്ര സർക്കാർ വിമാനത്താവളങ്ങളിൽ നിരീക്ഷണം ശക്തമാക്കിക്കൊണ്ട് പുതിയ ആരോഗ്യ മാർഗ്ഗനിർദ്ദേശങ്ങൾ പുറപ്പെടുവിച്ചു. രോഗബാധിത രാജ്യങ്ങളിൽ നിന്ന് എത്തുന്ന യാത്രക്കാർക്ക് പനി, ഛർദ്ദി, അകാരണമായ രക്തസ്രാവം, കടുത്ത തലവേദന തുടങ്ങിയ ലക്ഷണങ്ങൾ ഉണ്ടെങ്കിൽ ഇമിഗ്രേഷൻ ക്ലിയറൻസിന് മുൻപ് എയർപോർട്ട് ഹെൽത്ത് ഓഫീസർമാരെ അറിയിക്കണമെന്ന് നിർദ്ദേശമുണ്ട്. വൈറസിന്റെ പരമാവധി ഇൻകുബേഷൻ കാലയളവായ 21 ദിവസത്തേക്ക് ഇത്തരം യാത്രക്കാർ സ്വയം നിരീക്ഷണത്തിൽ തുടരണമെന്നും പൊതുജനാരോഗ്യ സുരക്ഷ ഉറപ്പാക്കാൻ വിമാനത്താവളങ്ങളിലെ തെർമൽ സ്ക്രീനിംഗും പരിശോധനകളും കർശനമാക്കിയതായും അധികൃതർ കൂട്ടിച്ചേർത്തു.
Summary: A 28-year-old woman who recently returned from Uganda has been isolated for observation at a government hospital in Bengaluru amid global Ebola concerns. The Union Health Ministry clarified that no Ebola case has been confirmed in India so far, and the patient is currently stable with mild symptoms. India has intensified airport surveillance and issued a health advisory for travelers from affected African regions following the WHO’s emergency declaration.
