സോൾ: ദക്ഷിണ കൊറിയൻ ഫുട്ബോളിലെ ഇതിഹാസ താരം സൺ ഹ്യൂങ്-മിന്റെ അവസാന ലോകകപ്പ് പോരാട്ടത്തിന് തൊട്ടുമുൻപ് കടുത്ത ആശങ്കയിലും നിരാശയിലുമാണ് കൊറിയൻ ആരാധകരും ടീമും (Son Heung Min Last World Cup). വരാനിരിക്കുന്ന ലോകകപ്പിനായി ടീം വടക്കേ അമേരിക്കയിലേക്ക് തിരിക്കാനിരിക്കെ, നായകൻ സണിന്റെ ഫോമില്ലായ്മയും മുഖ്യ പരിശീലകൻ ഹോങ് മ്യുങ്-ബോയ്ക്കെതിരെയുള്ള ആരാധകരുടെ കടുത്ത പ്രതിഷേധവും ടീമിന്റെ അന്തരീക്ഷം വഷളാക്കിയിട്ടുണ്ട്. ലോകകപ്പിന് മുന്നോടിയായി നടന്ന സൌഹൃദ മത്സരങ്ങളിൽ ഐവറി കോസ്റ്റിനോട് 4-0 നും ഓസ്ട്രിയയോട് 1-0 നും കൊറിയ ദയനീയമായി പരാജയപ്പെട്ടത് ആരാധകരുടെ അതൃപ്തി ഇരട്ടിയാക്കി. കഴിഞ്ഞ വർഷം പ്രീമിയർ ലീഗ് ക്ലബ്ബായ ടോട്ടനത്തിൽ നിന്ന് അമേരിക്കൻ എം.എൽ.എസ് (MLS) ക്ലബ്ബായ ലോസ് ആഞ്ചലസ് എഫ്.സിയിലേക്ക് മാറിയ 33 കാരനായ സണിന്റെ കരിയറിലെ സുവർണ്ണകാലം അവസാനിച്ചെന്നാണ് ഫുട്ബോൾ നിരീക്ഷകരുടെ വിലയിരുത്തൽ. എന്നാൽ തന്റെ പ്രകടനത്തിൽ യാതൊരു ഇടിവും സംഭവിച്ചിട്ടില്ലെന്നും ഫോമില്ലാത്ത സമയങ്ങളിൽ ഇത്തരം വിമർശനങ്ങൾ സ്വാഭാവികമാണെന്നും സൺ പ്രതികരിച്ചു.
ലോകകപ്പിൽ ഗ്രൂപ്പ് എ-യിൽ ആതിഥേയരായ മെക്സിക്കോ, ചെക് റിപ്പബ്ലിക്, ദക്ഷിണാഫ്രിക്ക എന്നിവർക്കൊപ്പമാണ് ദക്ഷിണ കൊറിയ മത്സരിക്കുന്നത്. ജൂൺ 11-ന് ഗ്വാഡലഹാരയിൽ ചെക് റിപ്പബ്ലിക്കിനെതിരെയാണ് അവരുടെ ആദ്യ മത്സരം. യോഗ്യതാ മത്സരങ്ങളിൽ പരാജയമറിയാതെയാണ് കൊറിയ ലോകകപ്പിന് യോഗ്യത നേടിയതെങ്കിലും മുൻപ് 2014 ലോകകപ്പിൽ ഒരു വിജയം പോലും നേടാനാകാതെ ടീമിനെ പുറത്താക്കിയ ചരിത്രമുള്ള കോച്ച് ഹോങ് മ്യുങ്-ബോയെ ആരാധകർ ഇപ്പോഴും അംഗീകരിച്ചിട്ടില്ല. കൊറിയൻ ഫുട്ബോൾ അസോസിയേഷന്റെ പരിശീലക തെരഞ്ഞെടുപ്പ് രീതികൾക്കെതിരെയും വലിയ വിമർശനമുണ്ട്. ബയേൺ മ്യൂണിക്കിന്റെ പ്രതിരോധ താരം കിം മിൻ-ജെ, പി.എസ്.ജി (PSG) താരം ലീ കാങ്-ഇൻ തുടങ്ങിയ പ്രമുഖ താരങ്ങൾ ടീമിലുണ്ടെങ്കിലും, 2002-ൽ സെമിഫൈനലിൽ എത്തിയതിന് ശേഷം ചരിത്രത്തിൽ ഇതുവരെ പ്രീ-ക്വാർട്ടറിനപ്പുറം കടക്കാൻ സാധിക്കാത്ത കൊറിയ ഇത്തവണ സണിന്റെ നായകത്വത്തിൽ എന്ത് അത്ഭുതമാണ് കാട്ടുകയെന്ന ആശങ്കയിലാണ് ഫുട്ബോൾ ലോകം.
Summary: South Korea faces a sense of foreboding ahead of the 2026 World Cup, which is highly expected to be the final tournament for their iconic captain Son Heung-min. The 33-year-old attacker has faced severe intense scrutiny over his declining form since moving to MLS, compounded by recent demoralizing friendly losses against Ivory Coast and Austria. Furthermore, head coach Hong Myung-bo remains deeply unpopular among fans, creating an immense low-confidence atmosphere for the national team.
