ശ്രീനഗർ: ജമ്മു കശ്മീരിലെ ബുഡ്ഗാം ജില്ലയിൽ പന്ത്രണ്ട് വയസ്സുകാരിയായ പെൺകുട്ടി ക്രൂരമായ പീഡനത്തിന് ഇരയായി കൊല്ലപ്പെട്ട നിലയിൽ കണ്ടെത്തി (Jammu Kashmir Budgam Minor Girl Case). ശനിയാഴ്ച വൈകുന്നേരം മതപഠന ക്ലാസിലേക്ക് പോയ പെൺകുട്ടിയെ കാണാതാവുകയായിരുന്നു. തുടർന്ന് ഞായറാഴ്ച രാവിലെ വീടിന് ഇരുനൂറ് മീറ്റർ മാത്രം അകലെയുള്ള പാടശേഖരത്തിൽ നിന്നാണ് മൃതദേഹം കണ്ടെത്തിയത്. പ്രാഥമിക അന്വേഷണത്തിലും പോസ്റ്റ്മോർട്ടം നടപടികളിലും കുട്ടി ക്രൂരമായ ബലാത്സംഗത്തിനിരയായി കൊല്ലപ്പെട്ടതാണെന്ന് വ്യക്തമായതായി ബുഡ്ഗാം എസ്.എസ്.പി ഹരിപ്രസാദ് കെ.കെ അറിയിച്ചു. പ്രദേശത്തെ ജനങ്ങളെയും രാഷ്ട്രീയ നേതൃത്വങ്ങളെയും ഒരുപോലെ പ്രകോപിപ്പിച്ച ഈ ദാരുണമായ സംഭവം താഴ്വരയിൽ വലിയ രീതിയിലുള്ള പ്രതിഷേധങ്ങൾക്ക് കാരണമായിട്ടുണ്ട്. പ്രതികളെ എത്രയും വേഗം നിയമത്തിന് മുന്നിൽ കൊണ്ടുവരണമെന്ന് ആവശ്യപ്പെട്ട് ജനങ്ങൾ തെരുവിൽ പ്രതിഷേധിക്കുകയാണ്.
സംഭവത്തിൽ സമഗ്രമായ അന്വേഷണം ഉറപ്പാക്കാൻ കശ്മീർ പോലീസ് പ്രത്യേക അന്വേഷണ സംഘത്തിന് രൂപം നൽകിയിട്ടുണ്ട്. കുറ്റവാളികൾക്ക് മാതൃകാപരമായ ശിക്ഷ ഉറപ്പാക്കാൻ സാധ്യമായ എല്ലാ കോണുകളിലൂടെയും അന്വേഷണം പുരോഗമിക്കുകയാണെന്ന് പോലീസ് വ്യക്തമാക്കി. അതേസമയം, ക്രൂരമായ ഈ കൊലപാതകത്തെ ജമ്മു കശ്മീർ മുഖ്യമന്ത്രി ഒമർ അബ്ദുള്ള ശക്തമായി അപലപിച്ചു. നമ്മുടെ പിഞ്ചുകുട്ടികൾക്ക് പോലും സുരക്ഷിതമായി ജീവിക്കാൻ സാധിക്കാത്ത വിധം സമൂഹം എങ്ങോട്ടാണ് പോകുന്നതെന്ന് എല്ലാവരും ഗൗരവമായി ചിന്തിക്കേണ്ട നിമിഷമാണിതെന്ന് അദ്ദേഹം അഭിപ്രായപ്പെട്ടു. ദുഃഖത്തിൽ കഴിയുന്ന കുടുംബത്തിന് എല്ലാവിധ സഹായങ്ങളും നീതിയും ഉറപ്പാക്കുമെന്നും അന്വേഷണ ഏജൻസികൾക്ക് സർക്കാർ പൂർണ്ണ പിന്തുണ നൽകുമെന്നും മുഖ്യമന്ത്രി കൂട്ടിച്ചേർത്തു. വിദ്യാഭ്യാസ മന്ത്രി സകീന യാതൂ ഉൾപ്പെടെയുള്ള പ്രമുഖ നേതാക്കൾ പെൺകുട്ടിയുടെ വസതി സന്ദർശിച്ചു.
Summary: A horrific incident has triggered widespread outrage in Jammu and Kashmir’s Budgam district after a 12-year-old missing girl was found raped and murdered near her home. The local police have constituted a Special Investigation Team (SIT) to ensure a transparent and swift probe into the heinous crime. Chief Minister Omar Abdullah strongly condemned the brutal act, calling for serious societal introspection and assuring exemplary punishment for the culprits.
