ഷാർജ: യുഎഇയിലെ ഷാർജ അൽ നഹ്ദയിലുള്ള ഫ്ലാറ്റ് സമുച്ചയത്തിൽ മലയാളി യുവതിയും അഞ്ചുവയസ്സുകാരിയായ മകളും കെട്ടിടത്തിൽ നിന്ന് വീണ് മരിച്ച സംഭവത്തിൽ ഞെട്ടിക്കുന്ന കൂടുതൽ വിവരങ്ങൾ പുറത്ത് (Sharjah Al Nahda apartment death case). കണ്ണൂർ അഴീക്കോട് പുതിയകാവ് ‘ആർഷ അഷിത’ ഭവനത്തിൽ ആർഷ (32), മകൾ റൂഹി (5) എന്നിവരാണ് മരിച്ചത്. കഴിഞ്ഞ ബുധനാഴ്ച രാവിലെ 7.15-ഓടെയായിരുന്നു കേരളത്തെ നടുക്കിയ ഈ ദാരുണ സംഭവം നടന്നത്.
32 നിലകളുള്ള കൂറ്റൻ അപ്പാർട്ട്മെന്റ് കെട്ടിടത്തിന്റെ 15-ാം നിലയിലെ ബാൽക്കണിയിൽ നിന്ന് അഞ്ചുവയസ്സുകാരിയായ മകളെ താഴേക്ക് എറിഞ്ഞ ശേഷം യുവതി സ്വയം ചാടി ജീവനൊടുക്കുകയായിരുന്നു എന്നാണ് ദൃക്സാക്ഷികളും കെട്ടിടത്തിലെ ജീവനക്കാരും നൽകുന്ന പ്രാഥമിക വിവരം. അഴീക്കോട് സ്വദേശി ടി.കെ. പുരുഷോത്തമൻ-ഗീത ദമ്പതികളുടെ മകളാണ് മരിച്ച ആർഷ.
വലിയൊരു ശബ്ദം കേട്ട് ഓടിയെത്തിയ കെട്ടിടത്തിലെ സെക്യൂരിറ്റി ഗാർഡാണ് താഴെ റോഡിൽ രക്തത്തിൽ കുളിച്ചുകിടന്ന കുട്ടിയുടെയും അമ്മയുടെയും മൃതദേഹങ്ങൾ ആദ്യം കണ്ടത്. ഉടൻ തന്നെ ഷാർജ പൊലീസിനെയും ആംബുലൻസിനെയും വിവരമറിയിക്കുകയായിരുന്നു. തുടർന്ന് സ്ഥലത്തെത്തിയ പോലീസ് പ്രദേശം പൂർണ്ണമായും വളഞ്ഞ് ശാസ്ത്രീയ പരിശോധനകൾ നടത്തിയ ശേഷം മൃതദേഹങ്ങൾ ഫോറൻസിക് മോർച്ചറിയിലേക്ക് മാറ്റി.
ദുബായിൽ എയർക്രാഫ്റ്റ് റിസോഴ്സ് അലോക്കേഷൻ ഓഫീസറായി ജോലി ചെയ്യുന്ന ഭർത്താവ് നിഹാലിനൊപ്പം വർഷങ്ങളായി ഷാർജ അൽ നഹ്ദയിലെ സഹാറ മാളിന് സമീപമുള്ള ഫ്ലാറ്റിലായിരുന്നു ആർഷയുടെ താമസം. വിവാഹം കഴിഞ്ഞിട്ട് 12 വർഷമായ ഈ ദമ്പതികൾ കഴിഞ്ഞ ഏഴ് വർഷത്തിലേറെയായി ഇതേ അപ്പാർട്ട്മെന്റിലാണ് താമസിച്ചിരുന്നത്. ആർഷ സ്വന്തമായി ഒരു ഓൺലൈൻ ബിസിനസ്സും നടത്തിവരികയായിരുന്നു.
ഇവരുമായി അടുത്ത ബന്ധമുള്ള പലരും യുഎഇയിൽ തന്നെയുണ്ട്. ആർഷയുടെ സഹോദരിയുടെ കുടുംബം ഇതേ കെട്ടിടത്തിലെ തൊട്ടടുത്ത അപ്പാർട്ട്മെന്റിലും, ഭർത്താവിന്റെ പിതാവും സഹോദരന്റെ കുടുംബവും സമീപപ്രദേശങ്ങളിലുമാണ് താമസിക്കുന്നത്. എന്നാൽ, ദുരന്തം നടക്കുന്നതിന്റെ തലേദിവസം രാത്രി ഈ ഫ്ലാറ്റിൽ കടുത്ത കുടുംബവഴക്ക് നടന്നിരുന്നതായും വിവരമറിഞ്ഞ് പോലീസ് സ്ഥലത്ത് എത്തിയിരുന്നതായും അയൽവാസികൾ വെളിപ്പെടുത്തിയിട്ടുണ്ട്. തന്റെ ഭാര്യയ്ക്ക് ചില മാനസികാരോഗ്യ പ്രശ്നങ്ങൾ ഉണ്ടായിരുന്നതായി സംഭവത്തിന് തൊട്ടുമുൻപ് ഭർത്താവ് കെട്ടിടത്തിലെ സെക്യൂരിറ്റിയോട് പറഞ്ഞിരുന്നതായും സൂചനകളുണ്ട്.
നിലവിൽ ഈ ദാരുണ സംഭവം ആത്മഹത്യയായി രജിസ്റ്റർ ചെയ്ത് തുടർനിയമ നടപടികൾക്കായി ഷാർജ പബ്ലിക് പ്രോസിക്യൂഷന് കൈമാറിയതായി ഷാർജ പോലീസ് അറിയിച്ചു. എങ്കിലും, മരണത്തിന് പിന്നിലെ യഥാർത്ഥ കാരണങ്ങളെക്കുറിച്ചും ഗാർഹിക പീഡന സാധ്യതകളെക്കുറിച്ചും കൂടുതൽ വ്യക്തത വരുത്തുന്നതിനായി യുവതിയുടെ ഭർത്താവ് നിഹാലിനെ പോലീസ് കസ്റ്റഡിയിലെടുത്ത് നിലവിൽ ചോദ്യം ചെയ്തുവരികയാണ്. കടുത്ത മാനസിക സമ്മർദ്ദമാണോ അതോ മറ്റെന്തെങ്കിലും ബാഹ്യപ്രേരണയാണോ ഈ ക്രൂരമായ കടുംകൈയിലേക്ക് നയിച്ചതെന്ന കാര്യത്തിൽ വിശദമായ അന്വേഷണം തുടരുകയാണ്.
Story Summary: A 32-year-old Malayali woman named Aarsha and her 5-year-old daughter Ruhi died after falling from the 15th floor of a building in Al Nahda, Sharjah. Witnesses claim she threw her daughter before jumping. Sharjah police detained her husband Nihal for questioning following reports of a family dispute.
