ന്യൂഡൽഹി: നീറ്റ് പരീക്ഷാ ചോദ്യപ്പേപ്പർ ചോർച്ചാ വിവാദത്തിൽ കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജി വെക്കുന്നതുവരെയും, ചോദ്യപ്പേപ്പർ ചോർച്ച തടയാൻ തികച്ചും സുരക്ഷിതമായ പുതിയ സംവിധാനം രാജ്യത്ത് നടപ്പിലാക്കുന്നതുവരെയും കോൺഗ്രസ് വിശ്രമിക്കില്ലെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി. നീറ്റ് ക്രമക്കേടുകൾക്കെതിരെയും കേന്ദ്ര വിദ്യാഭ്യാസ മന്ത്രിയുടെ രാജിയാവശ്യപ്പെട്ടും ഹൈദരാബാദിൽ വിദ്യാർത്ഥികൾ നടത്തിയ വൻ പ്രതിഷേധത്തിന്റെ വീഡിയോ സോഷ്യൽ മീഡിയയിൽ പങ്കുവെച്ചുകൊണ്ടാണ് രാഹുൽ ഗാന്ധി കേന്ദ്ര സർക്കാരിനെതിരെ രംഗത്തെത്തിയത്.(Rahul Gandhi NEET Paper Leak, Rahul Gandhi on Education Minister Dharmendra Pradhan Resignation)
പ്രതിഷേധത്തിനിടെ പ്രധാനമന്ത്രി നരേന്ദ്ര മോദിക്കും വിദ്യാഭ്യാസ മന്ത്രി ധർമ്മേന്ദ്ര പ്രധാനുമെതിരെ വിദ്യാർത്ഥികൾ ശക്തമായ മുദ്രാവാക്യങ്ങൾ ഉയർത്തിയിരുന്നു. ലക്ഷക്കണക്കിന് യുവാക്കൾ തെരുവിലിറങ്ങുമ്പോൾ, രാജ്യത്തെ 22 ലക്ഷത്തോളം കുട്ടികളുടെ ഭാവി അപകടത്തിലായിരിക്കുമ്പോൾ പ്രധാനമന്ത്രി നരേന്ദ്ര മോദി പൂർണ്ണ മൗനം പാലിക്കുകയാണ്. ഈ വിഷയത്തിൽ വ്യക്തമായ മറുപടി നൽകുന്നതിന് പകരം ചോദ്യങ്ങളിൽ നിന്ന് ഒളിച്ചോടാനാണ് കേന്ദ്ര സർക്കാർ ശ്രമിക്കുന്നത്,- രാഹുൽ ഗാന്ധി കുറ്റപ്പെടുത്തി.
നീറ്റ് പരീക്ഷാ ക്രമക്കേട് ദേശീയ തലത്തിൽ വലിയ രാഷ്ട്രീയ ആയുധമാക്കാനാണ് കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികളുടെ തീരുമാനം. വരും ദിവസങ്ങളിൽ പാർലമെന്റിനകത്തും പുറത്തും കേന്ദ്ര സർക്കാരിനെതിരെ പ്രതിഷേധം ശക്തമാക്കുമെന്ന സൂചനയാണ് പ്രതിപക്ഷ നേതാവിന്റെ പ്രസ്താവന നൽകുന്നത്.
Story Summary
Congress leader and Leader of Opposition in the Lok Sabha, Rahul Gandhi, stated that his party will not back down until Education Minister Dharmendra Pradhan resigns over the NEET exam paper leak controversy. Sharing a video of intense student protests in Hyderabad, Rahul criticized Prime Minister Narendra Modi’s silence on the issue, emphasizing that the future of 22 lakh students is at stake. He accused the central government of evading accountability instead of fixing the systemic flaws.
