സിഡ്നി: ഭീകരസംഘടനയായ ഇസ്ലാമിക് സ്റ്റേറ്റുമായി ബന്ധമുള്ള ഓസ്ട്രേലിയൻ സ്ത്രീകളുടെയും കുട്ടികളുടെയും രണ്ടാമത്തെ സംഘം വടക്കുകിഴക്കൻ സിറിയയിലെ അൽ-റോജ് അഭയാർത്ഥി ക്യാമ്പിൽ നിന്ന് പുറപ്പെട്ടതായി ഓസ്ട്രേലിയൻ ബ്രോഡ്കാസ്റ്റിംഗ് കോർപ്പറേഷൻ റിപ്പോർട്ട് ചെയ്തു (Australian ISIS Women Syria Camp Repatriation). സിറിയൻ സർക്കാർ ഉദ്യോഗസ്ഥരുടെ അകമ്പടിയോടെ ഒരു ബസിലാണ് ഇവരെ ക്യാമ്പിൽ നിന്ന് മാറ്റിയത്. ഇവർ ഡമാസ്കസിലേക്ക് തിരിക്കുമെന്നാണ് റിപ്പോർട്ടുകൾ സൂചിപ്പിക്കുന്നതെങ്കിലും എപ്പോൾ ഓസ്ട്രേലിയയിലേക്ക് മടങ്ങുമെന്ന കാര്യത്തിൽ വ്യക്തതയില്ല.
ഐസിസ് ബന്ധമുള്ള സ്ത്രീകളുടെ തിരിച്ചുവരവിനായി രാജ്യത്തെ സുരക്ഷാ-ഇന്റലിജൻസ് ഏജൻസികൾ ഒരു ദശാബ്ദത്തിലേറെയായി തയ്യാറെടുപ്പുകൾ നടത്തുന്നുണ്ടെന്ന് ഓസ്ട്രേലിയൻ ആഭ്യന്തര മന്ത്രി ടോണി ബർക്ക് ഇമെയിൽ വഴി അറിയിച്ചു. തിരികെയെത്തുന്നവർ ഒരേ സ്വഭാവമുള്ളവരല്ലെന്നും, വിദേശത്തായിരുന്നപ്പോൾ ഓരോരുത്തരും ചെയ്ത പ്രവൃത്തികളിൽ വലിയ വ്യത്യാസങ്ങളുണ്ടെന്നും അദ്ദേഹം വ്യക്തമാക്കി. ഇവരെ നേരിട്ട് നാട്ടിലെത്തിക്കാൻ സർക്കാർ ഔദ്യോഗിക സഹായം നൽകില്ലെന്ന് മുൻപ് വ്യക്തമാക്കിയിരുന്നെങ്കിലും, പൗരന്മാർ രാജ്യാതിർത്തിക്കുള്ളിലേക്ക് പ്രവേശിക്കുന്നത് തടയുന്നതിന് നിയമപരമായ ചില പരിമിതികളുണ്ടെന്ന് ഓസ്ട്രേലിയ സമ്മതിക്കുന്നുണ്ട്.
ഈ മാസം ആദ്യം നാല് സ്ത്രീകളും ഒൻപത് കുട്ടികളും ഉൾപ്പെടുന്ന ആദ്യസംഘം ഓസ്ട്രേലിയയിൽ തിരിച്ചെത്തിയിരുന്നു. ഇവരിൽ കൗസർ അഹമ്മദ് (54), മകൾ സൈനബ് അഹമ്മദ് (31) എന്നിവർക്കെതിരെ അടിമത്തവുമായി ബന്ധപ്പെട്ട കുറ്റങ്ങളും, ജനായ് സഫർ (32) എന്ന സ്ത്രീക്കെതിരെ ഭീകരവാദവുമായി ബന്ധപ്പെട്ട കുറ്റങ്ങളും ചുമത്തി പോലീസ് കേസെടുത്തിട്ടുണ്ട്. കുറ്റവാളികളെ തിരികെ കൊണ്ടുവരുന്നതിനെതിരെ ഓസ്ട്രേലിയയിലെ പ്രതിപക്ഷം സർക്കാരിനെതിരെ കടുത്ത വിമർശനം ഉന്നയിക്കുന്നുണ്ട്. 2012-നും 2016-നും ഇടയിൽ ഐസിസ് ഭീകരരായ തങ്ങളുടെ ഭർത്താക്കന്മാർക്കൊപ്പം ചേരാനാണ് ഈ ഓസ്ട്രേലിയൻ സ്ത്രീകൾ സിറിയയിലേക്ക് പോയത്. 2019-ൽ ഇസ്ലാമിക് സ്റ്റേറ്റിന്റെ തകർച്ചയ്ക്ക് ശേഷം ഇവർ വിവിധ ഡിറ്റൻഷൻ ക്യാമ്പുകളിൽ തടവിലായിരുന്നു. എന്നാൽ ഈ വർഷം ജനുവരിയിൽ കുർദിഷ് സേനയുടെ തകർച്ചയെത്തുടർന്ന് യുഎസ് ഇടപെട്ടാണ് ക്യാമ്പുകളിലെ വിദേശികളെ ഉൾപ്പെടെ മാറ്റാൻ തുടങ്ങിയത്.
Summary: A second group of Australian women and children linked to ISIS has left the Al-Roj refugee camp in northeast Syria under a Syrian government escort, possibly bound for repatriation to Australia, ABC reported. Home Affairs Minister Tony Burke stated that security agencies have been preparing for their potential return for over a decade, noting that the individuals represent a diverse spectrum of actions during their time abroad.
