തിരുവനന്തപുരം: മൂന്ന് സീറ്റുകൾ നേടി കേരള നിയമസഭാ തിരഞ്ഞെടുപ്പിൽ വിജയം കുറിച്ചതിന്റെ ആവേശം നിലനിൽക്കെ, ബി.ജെ.പിയിൽ നിയമസഭാ കക്ഷി നേതാവിനെച്ചൊല്ലി കടുത്ത ഭിന്നത. പാർട്ടി സംസ്ഥാന അധ്യക്ഷൻ രാജീവ് ചന്ദ്രശേഖറും വി. മുരളീധരനും പദവിക്കായി ഉറച്ചുനിൽക്കുന്നതാണ് പാർട്ടിയിൽ പുതിയ പ്രതിസന്ധി സൃഷ്ടിച്ചിരിക്കുന്നത്.(Kerala BJP Turf War Rajeev Chandrasekhar V Muraleedharan Legislative Party Leader)
പുതിയ നിയമസഭാ സമ്മേളനം ആരംഭിച്ചിട്ടും കക്ഷിനേതാവിനെ ഇതുവരെയും നിശ്ചയിക്കാൻ ബി.ജെ.പി നേതൃത്വത്തിന് സാധിച്ചിട്ടില്ല. കേന്ദ്ര നേതാക്കൾ കേരളത്തിലെത്തി ജനപ്രതിനിധികളുമായും പ്രമുഖ നേതാക്കളുമായും നടത്തിയ പ്രാഥമിക ആലോചനയിൽ ഭൂരിപക്ഷ പിന്തുണ വി. മുരളീധരനായിരുന്നു.
സംസ്ഥാന അധ്യക്ഷൻ കൂടിയായ രാജീവ് ചന്ദ്രശേഖർ നിയമസഭാ കക്ഷി നേതൃപദവി കൂടി ഏറ്റെടുത്താൽ അത് പാർട്ടിയുടെ ‘ഒരാൾക്ക് ഒരു പദവി’ എന്ന നയത്തിന് വിരുദ്ധമാകുമെന്നാണ് വി. മുരളീധരനെ അനുകൂലിക്കുന്നവർ ചൂണ്ടിക്കാണിക്കുന്നത്. അതേസമയം, പാർലമെന്ററി രാഷ്ട്രീയത്തിൽ ദീർഘകാലത്തെ പരിചയസമ്പന്നനായ വി. മുരളീധരനെ നിയമസഭാ കക്ഷിനേതാവാക്കാൻ പാർട്ടിക്കുള്ളിൽ വലിയ രീതിയിലുള്ള സമ്മർദ്ദമുണ്ട്. തർക്കം മുറുകിയതോടെ അന്തിമ തീരുമാനത്തിനായി വിഷയം ബി.ജെ.പി കേന്ദ്ര നേതൃത്വത്തിന്റെ മുന്നിലെത്തിച്ചിരിക്കുകയാണ്. രണ്ട് ദിവസത്തിനുള്ളിൽ ഹൈക്കമാൻഡ് ഇതിൽ വ്യക്തത വരുത്തുമെന്നാണ് സൂചന.
Story Summary
A rift has emerged within the Kerala BJP over the selection of its Legislative Party Leader. State President Rajeev Chandrasekhar and National Executive Member V Muraleedharan are vying for the post, delaying the decision even after the assembly session began. The matter has now been referred to the central leadership, with a decision expected in two days.
