പാലക്കാട്: ടിവി റിമോട്ട് ചോദിച്ചിട്ട് നൽകാത്തതിനെച്ചൊല്ലി സഹോദരനുമായി ഉണ്ടായ പിണക്കത്തിന് പിന്നാലെ പന്ത്രണ്ടുകാരൻ ജീവനൊടുക്കി (Palakkad boy ends life TV remote). പാലക്കാട് തച്ചമ്പാറ മുതുകുറിശി ഭഗവതിപ്പറമ്പിൽ പ്രമോദിന്റെ മകൻ പ്രദോഷ് ആണ് മരിച്ചത്. വീടിന്റെ തട്ടിൻപുറത്ത് തൂങ്ങിയ നിലയിൽ കണ്ടെത്തിയ കുട്ടിയെ ഉടൻ തന്നെ തച്ചമ്പാറയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഈ വർഷം എട്ടാം ക്ലാസിലേക്ക് ജയിച്ച വിദ്യാർത്ഥിയാണ് പ്രദോഷ്.
ഇന്ന് രാവിലെയാണ് നാടിനെ നടുക്കിയ ദാരുണമായ സംഭവമുണ്ടായത്. പ്രദോഷിന് രണ്ട് വയസ്സിന് മൂത്ത ഒരു സഹോദരൻ കൂടിയുണ്ട്. രാവിലെ സഹോദരൻ ടിവിയിൽ ഒരു പരിപാടി കണ്ടുകൊണ്ടിരിക്കുകയായിരുന്നു. ഈ സമയത്താണ് പ്രദോഷ് വന്ന് റിമോട്ട് തരാൻ ആവശ്യപ്പെട്ടത്. എന്നാൽ സഹോദരൻ റിമോട്ട് നൽകാൻ കൂട്ടാക്കിയില്ല. ഇതിൽ സങ്കടപ്പെട്ട് പിണങ്ങിയ പ്രദോഷ് നേരെ വീടിന്റെ തട്ടിൻപുറത്ത് കയറി ഇരിക്കുകയായിരുന്നു. കുട്ടികൾ തമ്മിലുള്ള സാധാരണ പിണക്കമാണെന്ന് കരുതി വീട്ടുകാർ ആദ്യം ഇത് കാര്യമാക്കിയില്ല. പിണക്കം മാറി കുട്ടി തനിയെ താഴെയിറങ്ങി വരുമെന്നാണ് എല്ലാവരും കരുതിയത്.
എന്നാൽ കുറേസമയം കഴിഞ്ഞിട്ടും കുട്ടിയെ കാണാതെ വന്നതോടെ വീട്ടുകാർ തട്ടിൻപുറത്ത് ചെന്ന് തിരക്കുകയായിരുന്നു. ഈ സമയത്താണ് പ്രദോഷിനെ തൂങ്ങിയ നിലയിൽ കണ്ടെത്തിയത്.ഉടൻ തന്നെ കെട്ടഴിച്ച് ആശുപത്രിയിൽ എത്തിച്ചെങ്കിലും അതിനോടകം തന്നെ മരണം സംഭവിച്ചിരുന്നു. ചെറിയൊരു പിണക്കത്തിന്റെ പേരിൽ ഒരു കുരുന്നിന്റെ ജീവൻ നഷ്ടപ്പെട്ടതിന്റെ ഞെട്ടലിലും വിതുമ്പലിലുമാണ് ഈ ഗ്രാമം.
Story Summary (English): In a tragic incident at Tachampara in Palakkad, a 12-year-old boy named Pradosh ended his life following a dispute with his elder brother over a TV remote. Pradosh, son of Pramod, was a student promoted to the 8th standard this academic year. The incident occurred on Thursday morning when Pradosh’s request for the remote was denied by his brother. An upset Pradosh went up to the attic, which the family initially dismissed as a minor childhood tantrum. He was later found hanging and was rushed to a private hospital in Tachampara, but was declared brought dead.
