ന്യൂഡൽഹി: ഒരു ഓർഡർ ഡെലിവറി ചെയ്ത ശേഷം വീടിന് മുന്നിലിരുന്ന ക്രിക്കറ്റ് ബാറ്റ് എടുത്ത് പ്രൊഫഷണൽ കളിക്കാരെപ്പോലെ വായുവിൽ ഷോട്ടുകൾ പായിക്കുകയും, ഒടുവിൽ ആ ബാറ്റിന് ഒരു ചെറിയ ചുംബനം നൽകി മടങ്ങുകയും ചെയ്യുന്ന ഡെലിവറി ബോയിയുടെ സിസിടിവി ദൃശ്യങ്ങൾ സോഷ്യൽ മീഡിയയിൽ ലക്ഷക്കണക്കിന് ആളുകളുടെ കണ്ണുനിറയ്ക്കുന്നു (Viral Video Deliveryman Cricket Bat). ജീവിത പ്രാരാബ്ധങ്ങൾക്കിടയിൽ എവിടെയോ ഉപേക്ഷിക്കേണ്ടി വന്ന വലിയൊരു സ്വപ്നത്തിന്റെ ഓർമ്മപ്പെടുത്തലാണ് ഈ ദൃശ്യങ്ങളെന്നാണ് നെറ്റിസൺസ് കുറിക്കുന്നത്.
കസ്റ്റമറുടെ വീട്ടുപടിക്കൽ സാധനങ്ങൾ എത്തിച്ച ശേഷം തിരികെ നടക്കുമ്പോഴാണ് ഇയാൾ അവിടെയിരുന്ന ബാറ്റ് ശ്രദ്ധിക്കുന്നത്. ഒട്ടും ആലോചിക്കാതെ ആ ബാറ്റ് കയ്യിലെടുത്ത് കാലുകളുടെയും കൈത്തണ്ടയുടെയും കൃത്യമായ ചലനങ്ങളോടെ തകർപ്പൻ ഷോട്ടുകൾ ഇയാൾ വായുവിൽ പയറ്റി നോക്കുകയായിരുന്നു. ഒരു പ്രൊഫഷണൽ ക്രിക്കറ്ററുടെ അതേ മികവോടെയായിരുന്നു ആ പ്രകടനം. എന്നാൽ പെട്ടെന്ന് തന്നെ തന്റെ ജോലിയെക്കുറിച്ച് ബോധവാനായ അയാൾ ബാറ്റ് തിരികെ വെക്കുകയും, പോകുന്നതിന് മുൻപ് അതിലൊന്ന് ചുംബിക്കുകയും ചെയ്തു. ഉപജീവനത്തിനായി സ്വന്തം ഇഷ്ടങ്ങളും ഹോബികളും മാറ്റിവെച്ച് ഓടുന്ന മനുഷ്യരുടെ നേർച്ചിത്രമാണ് ഈ വീഡിയോയെന്ന് പലരും കമന്റ് ചെയ്തു. “ആഗ്രഹിച്ച അവസരങ്ങൾ എല്ലാവർക്കും ജീവിതം നൽകാറില്ല” എന്നും, “പൂർത്തിയാക്കാൻ കഴിയാതെ പോയ പ്രണയമാണ് ആ ചുംബനമെന്നും” പലരും വൈകാരികമായി കുറിച്ചു. തിരക്കുപിടിച്ച ജീവിതത്തിനിടയിലും തനിക്ക് സന്തോഷം നൽകിയ ആ ഒരു നിമിഷം സോഷ്യൽ മീഡിയ ഏറ്റെടുത്തു കഴിഞ്ഞു.
A Blinkit delivery partner kissing his cricket bat before work.
Dreams are still alive. 🏏 pic.twitter.com/PusM184hKk
— shibya Sharma (@Shibyash_17) May 19, 2026
