റോം: അഞ്ച് വിദേശ രാജ്യങ്ങളിലേക്കുള്ള ഔദ്യോഗിക സന്ദർശനത്തിന്റെ അവസാന ഘട്ടമായി ഇറ്റലിയിലെത്തിയ ഇന്ത്യൻ പ്രധാനമന്ത്രി നരേന്ദ്ര മോദിക്ക് വൻ സ്വീകരണം. ഇറ്റാലിയൻ പ്രധാനമന്ത്രി ജോർജിയ മെലോണിയുടെ നേതൃത്വത്തിൽ റോമൻ ചരിത്രത്തിന്റെ ഭാഗമായ വിഖ്യാത കൊളോസിയത്തിൽ വെച്ചായിരുന്നു സ്വീകരണ ചടങ്ങുകൾ നടന്നത്. ഇരു നേതാക്കളും തമ്മിലുള്ള കൂടിക്കാഴ്ചയുടെ ദൃശ്യങ്ങളും സെൽഫിയും സോഷ്യൽ മീഡിയയിൽ ഇതിനകം തന്നെ വൻ തരംഗമായി മാറിയിട്ടുണ്ട്.(PM Modi Italy Visit Meloni Melody Chocolate Selfie Viral Nordic Summit)
കൂടിക്കാഴ്ചയ്ക്കിടെ ജോർജിയ മെലോണിക്ക് നരേന്ദ്ര മോദി ഇന്ത്യയിൽ നിന്നുള്ള ‘മെലഡി’ മിഠായി പാക്കറ്റ് സമ്മാനമായി നൽകിയതാണ് ഇപ്പോൾ സൈബർ ഇടങ്ങളിലെ പ്രധാന ചർച്ചാവിഷയം. ഇന്ത്യയും ഇറ്റലിയും തമ്മിലുള്ള ഉഭയകക്ഷി-വ്യാപാര ബന്ധങ്ങൾ കൂടുതൽ ശക്തമാക്കുന്നതിനെക്കുറിച്ച് ഇരു നേതാക്കളും വിശദമായ ചർച്ചകൾ നടത്തി. ഇന്ത്യ – യൂറോപ്യൻ യൂണിയൻ വ്യാപാര കരാർ യാഥാർത്ഥ്യമാക്കുന്നതിൽ ഫ്രഞ്ച് പ്രസിഡന്റ് ഇമ്മാനുവൽ മക്രോണിനൊപ്പം ജോർജിയ മെലോണിയും നിർണ്ണായക പങ്ക് വഹിച്ചിരുന്നു. അതേസമയം, മോദിയുടെ റോം സന്ദർശനത്തിനിടെ വത്തിക്കാനിൽ വെച്ച് ലിയോ പതിനാലാമൻ മാർപ്പാപ്പയുമായി കൂടിക്കാഴ്ച നടത്തുമെന്ന് മുൻപ് സൂചനകൾ ഉണ്ടായിരുന്നെങ്കിലും, നിലവിൽ അങ്ങനെയൊരു കൂടിക്കാഴ്ച പ്രധാനമന്ത്രിയുടെ ഔദ്യോഗിക അജണ്ടയിൽ ഇല്ലെന്ന് വിദേശകാര്യ മന്ത്രാലയം വ്യക്തമാക്കി.
അഞ്ച് നോർഡിക് രാജ്യങ്ങളുമായുള്ള തന്ത്രപ്രധാന ഉച്ചകോടിയിൽ പങ്കെടുത്ത ശേഷമാണ് നോർവേയിൽ നിന്നും പ്രധാനമന്ത്രി നരേന്ദ്ര മോദി ഇറ്റലിയിലെത്തിയത്. നോർഡിക് രാജ്യങ്ങളുമായി സാങ്കേതികവിദ്യ കൈമാറ്റം ഉൾപ്പെടെയുള്ള മേഖലകളിൽ വലിയ പങ്കാളിത്തത്തിന് ഇന്ത്യ ധാരണയിലെത്തിയിട്ടുണ്ട്. ഭീകരവാദത്തെ ആഗോളതലത്തിൽ ഒന്നിച്ച് നേരിടുമെന്ന് ഇരുവിഭാഗവും സംയുക്ത പ്രസ്താവനയിലൂടെ വ്യക്തമാക്കി. എന്നാൽ, സന്ദർശനത്തിനിടെ നോർവേയിൽ വെച്ച് നടത്തിയ വാർത്താസമ്മേളനത്തിൽ മാധ്യമപ്രവർത്തകരുടെ ചോദ്യങ്ങൾ സ്വീകരിക്കാൻ പ്രധാനമന്ത്രി തയ്യാറാകാതിരുന്നത് അവിടെ വലിയ രാഷ്ട്രീയ വിവാദങ്ങൾക്ക് വഴിവെച്ചിട്ടുണ്ട്.
Story Summary
Prime Minister Narendra Modi arrived in Italy on the final leg of his five-nation tour and received a warm welcome from Italian PM Giorgia Meloni at the historic Colosseum in Rome. A video of Modi gifting a packet of ‘Melody’ chocolates to Meloni and their selfies have gone viral on social media. While bilateral trade talks progressed, the Ministry of External Affairs clarified that a meeting with Pope Leo XIV is not currently on the agenda. Modi reached Italy after attending the Nordic Summit in Norway, where his decision to skip questions at a press conference sparked a controversy.
