ന്യൂഡൽഹി: ഭാരതവും അമേരിക്കയും തമ്മിലുള്ള ഉഭയകക്ഷി ബന്ധം കൂടുതൽ ശക്തമാക്കുന്നതിന്റെ ഭാഗമായി യു.എസ് സ്റ്റേറ്റ് സെക്രട്ടറിയും ദേശീയ സുരക്ഷാ ഉപദേശകനുമായ മാർക്കോ റൂബിയോ മേയ് 23 മുതൽ 26 വരെ ഇന്ത്യ സന്ദർശിക്കും. ഡൊണാൾഡ് ട്രംപ് ഭരണകൂടം അധികാരമേറ്റ ശേഷം ഒരു മുതിർന്ന യു.എസ് ക്യാബിനറ്റ് പ്രതിനിധി ഇന്ത്യയിലെത്തുന്നത് ഇതാദ്യമായാണ്.(Marco Rubio India visit, US Secretary Of State Marco Rubio To Visit India )
യു.എസ് സ്റ്റേറ്റ് ഡിപ്പാർട്ട്മെന്റ് വക്താവ് തോമസ് ‘ടോമി’ പിഗോട്ട് പുറത്തുവിട്ട ഔദ്യോഗിക പ്രസ്താവന പ്രകാരം, നാല് ദിവസത്തെ സന്ദർശനത്തിനിടയിൽ മാർക്കോ റൂബിയോ കൊൽക്കത്ത, ആഗ്ര, ജയ്പൂർ, ന്യൂഡൽഹി എന്നീ നഗരങ്ങൾ സന്ദർശിക്കും. ഡൽഹിക്ക് പുറമെയുള്ള മറ്റ് നഗരങ്ങളിലെ സന്ദർശനം റൂബിയോയുടെ യാത്രാരേഖയിൽ പുതുതായി ഉൾപ്പെടുത്തിയതാണ്. ഡൽഹിയിൽ വെച്ച് നടക്കുന്ന മുതിർന്ന ഇന്ത്യൻ നയതന്ത്ര ഉദ്യോഗസ്ഥരുമായുള്ള കൂടിക്കാഴ്ചയിൽ ഊർജ്ജ സുരക്ഷ, വ്യാപാരം, പ്രതിരോധ സഹകരണം എന്നിവ അദ്ദേഹം ചർച്ച ചെയ്യും. കൂടാതെ, ഡൽഹിയിൽ വെച്ച് നടക്കുന്ന അമേരിക്കൻ സ്വാതന്ത്ര്യത്തിന്റെ 250-ാം വാർഷിക ആഘോഷങ്ങളിലും അദ്ദേഹം പങ്കാളിയാകും.
ഇന്ത്യൻ വിദേശകാര്യ മന്ത്രി എസ്. ജയശങ്കറുമായി റൂബിയോ ചർച്ചകൾ നടത്തും. ഇതിനൊപ്പം ഡൽഹിയിൽ വെച്ച് നടക്കുന്ന ‘ക്വാഡ്’ രാജ്യങ്ങളിലെ വിദേശകാര്യ മന്ത്രിമാരുടെ നിർണ്ണായക യോഗത്തിലും അദ്ദേഹം പങ്കെടുത്തേക്കും. ഇതിന്റെ ഭാഗമായി ഓസ്ട്രേലിയ, ജപ്പാൻ എന്നീ രാജ്യങ്ങളിലെ വിദേശകാര്യ മന്ത്രിമാരുടെ സന്ദർശനവും ഇതേ സമയത്ത് തന്നെ ക്രമീകരിക്കാനുള്ള ഒരുക്കങ്ങൾ നടക്കുകയാണ്.
Story Summary
US Secretary of State and NSA Marco Rubio will pay an official visit to India from May 23 to 26, covering Kolkata, Agra, Jaipur, and New Delhi. Rubio’s visit will focus on defense, energy security, and trade agreements, alongside a potential Quad Foreign Ministers’ meeting.
