ന്യൂഡൽഹി: വരുന്ന സെപ്റ്റംബർ 12, 13 തീയതികളിൽ ന്യൂഡൽഹിയിൽ വെച്ച് നടക്കുന്ന ‘ബ്രിക്സ്’ ഉച്ചകോടിയിൽ റഷ്യൻ പ്രസിഡന്റ് വ്ലാഡിമിർ പുടിനും ചൈനീസ് പ്രസിഡന്റ് ഷി ജിൻപിങ്ങും പങ്കെടുത്തേക്കുമെന്ന് റിപ്പോർട്ട്. ഇരു നേതാക്കളും ഉച്ചകോടിക്കായി ഇന്ത്യയിലെത്തുമെന്ന സൂചന ഔദ്യോഗിക വൃത്തങ്ങൾ നൽകിയതായി ദേശീയ മാധ്യമങ്ങൾ റിപ്പോർട്ട് ചെയ്തു.(Vladimir Putin And Xi Jinping Likely To Visit New Delhi For BRICS Summit In September)
റഷ്യൻ വാർത്താ ഏജൻസി പുറത്തുവിട്ട വിവരങ്ങൾ പ്രകാരം ക്രെംലിൻ വക്താക്കൾ പുടിന്റെ സന്ദർശനം ഇതിനകം സ്ഥിരീകരിച്ചിട്ടുണ്ട്. ഇതിന് മുന്നോടിയായി ഓഗസ്റ്റ് 31, സെപ്റ്റംബർ 1 തീയതികളിൽ കിർഗിസ്ഥാനിലെ ബിഷ്കെക്കിൽ നടക്കുന്ന ഷാങ്ഹായ് കോപ്പറേഷൻ ഓർഗനൈസേഷൻ ഉച്ചകോടിയിലും പുടിനും പ്രധാനമന്ത്രി നരേന്ദ്ര മോദിയും പങ്കെടുത്തേക്കും. ബ്രിക്സ് ഉച്ചകോടിയുടെ ഭാഗമായി ചൈനീസ് പ്രസിഡന്റ് ഷി ജിൻപിങ് ഡൽഹിയിലെത്തുന്നതിനെയാണ് നയതന്ത്ര ലോകം ഏറെ ഉറ്റുനോക്കുന്നത്.
2020-ൽ കിഴക്കൻ ലഡാക്കിലെ യഥാർത്ഥ നിയന്ത്രണ രേഖയിൽ ഇന്ത്യ-ചൈന സൈനികർ തമ്മിലുണ്ടായ അതിർത്തി സംഘർഷത്തിന് ശേഷം ഇതാദ്യമായാണ് ഷി ജിൻപിങ് ഇന്ത്യ സന്ദർശിക്കുന്നത്. ഇതിനു മുൻപ് 2019 ഒക്ടോബറിൽ ചെന്നൈയ്ക്ക് സമീപമുള്ള മാമല്ലപുരത്ത് നടന്ന ഉച്ചകോടിക്കാണ് അദ്ദേഹം അവസാനമായി ഇന്ത്യയിലെത്തിയത്. 2024 ഒക്ടോബറിൽ റഷ്യയിലെ കസാനിൽ നടന്ന ബ്രിക്സ് ഉച്ചകോടിയുടെ പശ്ചാത്തലത്തിൽ പ്രധാനമന്ത്രി മോദിയും ഷി ജിൻപിങ്ങും തമ്മിൽ നടത്തിയ കൂടിക്കാഴ്ചയാണ് ഇരുരാജ്യങ്ങളും തമ്മിലുള്ള ബന്ധം വീണ്ടും സജീവമാക്കാൻ വഴിതുറന്നത്.
കഴിഞ്ഞ ഒന്നരവർഷത്തിനിടെ വിസ നടപടികൾ പുനരാരംഭിക്കൽ, നേരിട്ടുള്ള വിമാന സർവീസുകൾ, കൈലാസ മാനസസരോവർ യാത്രയുടെ പുനരുജ്ജീവിപ്പിക്കൽ എന്നിവയിലൂടെ ഇരുരാജ്യങ്ങളും നയതന്ത്ര ബന്ധം മെച്ചപ്പെടുത്തി വരികയാണ്. ഡൽഹിയിലെ ‘ഭാരത് മണ്ഡപം’ ഉച്ചകോടിയുടെ വേദിയാകാനാണ് സാധ്യതയെങ്കിലും ഇതിൽ ഔദ്യോഗിക പ്രഖ്യാപനം വന്നിട്ടില്ല. കഴിഞ്ഞ ആഴ്ച ഡൽഹിയിൽ ചേർന്ന ബ്രിക്സ് വിദേശകാര്യ മന്ത്രിമാരുടെ യോഗത്തിൽ ഉച്ചകോടിയുടെ അജണ്ടകളെക്കുറിച്ച് വിശദമായ ചർച്ചകൾ നടന്നിരുന്നു. റഷ്യൻ വിദേശകാര്യ മന്ത്രി സെർജി ലാവ്റോവ് യോഗത്തിൽ പങ്കെടുത്തപ്പോൾ, ചൈനീസ് വിദേശകാര്യ മന്ത്രി വാങ് യിക്ക് യുഎസ് പ്രസിഡന്റുമായുള്ള ബെയ്ജിങ്ങിലെ സുപ്രധാന ചർച്ചകൾ കാരണം യോഗത്തിനെത്താൻ സാധിച്ചിരുന്നില്ല.
Story Summary
Russian President Vladimir Putin and Chinese President Xi Jinping are highly likely to visit New Delhi for the upcoming BRICS Summit scheduled for September 12 and 13. This marks Xi Jinping’s first visit to India since the 2020 LAC border standoff, signaling a significant phase in the stabilization of India-China bilateral relations.
