ഭോപ്പാൽ: ഭോപ്പാലിൽ വിരമിച്ച ജഡ്ജിയുടെ മരുമകൾ ട്വിഷ ശർമ്മ (33) ദുരൂഹ സാഹചര്യത്തിൽ മരിച്ച സംഭവത്തിൽ പുനർ പോസ്റ്റ്മോർട്ടം നടത്തണമെന്ന ആവശ്യവുമായി കുടുംബം കോടതിയിലേക്ക് (Twisha Sharma death case). നോയിഡ സ്വദേശിയായ ട്വിഷയെ മേയ് 12-നാണ് ഭോപ്പാലിലെ ഭർതൃവീട്ടിൽ തൂങ്ങിമരിച്ച നിലയിൽ കണ്ടെത്തിയത്. മരണത്തിൽ ഭർതൃവീട്ടുകാർക്കെതിരെ സ്ത്രീധന പീഡനവും മാനസിക ക്രൂരതയും ആരോപിച്ച് യുവതിയുടെ കുടുംബം രംഗത്തെത്തിയിരുന്നു.
എയിംസ് (AIIMS) ഭോപ്പാലിൽ നടത്തിയ ആദ്യ പോസ്റ്റ്മോർട്ടം നടപടികളിൽ ഗുരുതരമായ വീഴ്ചകൾ സംഭവിച്ചതായി കുടുംബം ആരോപിക്കുന്നു. തൂങ്ങിമരിക്കാൻ ഉപയോഗിച്ചുവെന്ന് പോലീസ് അവകാശപ്പെടുന്ന ബെൽറ്റ് പോസ്റ്റ്മോർട്ടം സമയത്ത് മെഡിക്കൽ ബോർഡിന് മുന്നിൽ ഹാജരാക്കാൻ അന്വേഷണ ഉദ്യോഗസ്ഥന് കഴിഞ്ഞിരുന്നില്ല. ഇതുമൂലം കഴുത്തിലെ പാടുകളും ബെൽറ്റും തമ്മിൽ ശാസ്ത്രീയമായി ഒത്തുനോക്കാൻ ഡോക്ടർമാർക്ക് സാധിച്ചില്ലെന്ന് പോസ്റ്റ്മോർട്ടം റിപ്പോർട്ട് വ്യക്തമാക്കുന്നു. കൂടാതെ ട്വിഷയുടെ ശരീരത്തിൽ മരണത്തിന് മുൻപ് സംഭവിച്ച ചില പരിക്കുകളുടെ അടയാളങ്ങളും കണ്ടെത്തിയിട്ടുണ്ട്.
അന്വേഷണം അട്ടിമറിക്കാൻ സാധ്യതയുണ്ടെന്ന് ഭയക്കുന്ന കുടുംബം, മൃതദേഹം സംസ്കരിക്കാൻ വിസമ്മതിച്ച് ഭോപ്പാൽ എയിംസിലെ മോർച്ചറിയിൽ തന്നെ സൂക്ഷിച്ചിരിക്കുകയാണ്. ഡൽഹി എയിംസിൽ വെച്ച് രണ്ടാമതൊരു പോസ്റ്റ്മോർട്ടം നടത്തണമെന്നും കേസ് മധ്യപ്രദേശിന് പുറത്തുള്ള സ്വതന്ത്ര ഏജൻസി അന്വേഷിക്കണമെന്നുമാണ് കുടുംബത്തിന്റെ ആവശ്യം.
ട്വിഷയുടെ ഭർത്താവും അഭിഭാഷകനുമായ സമർത്ഥ് സിംഗ് നിലവിൽ ഒളിവിലാണ്. ഇയാളുടെ മുൻകൂർ ജാമ്യാപേക്ഷ ഭോപ്പാൽ കോടതി തള്ളി. പ്രതിയെക്കുറിച്ച് വിവരം നൽകുന്നവർക്ക് പോലീസ് പ്രതിഫലം പ്രഖ്യാപിച്ചിട്ടുണ്ട്. അതേസമയം, കേസിൽ പ്രതിയായ മുൻ ജില്ലാ ജഡ്ജി കൂടിയായ ഭർതൃമാതാവ് ഗിരിബാല സിംഗിന് കോടതി നേരത്തെ മുൻകൂർ ജാമ്യം അനുവദിച്ചിരുന്നു. കേസ് അന്വേഷിക്കാൻ പ്രത്യേക അന്വേഷണ സംഘത്തെ (SIT) നിയോഗിച്ചിട്ടുണ്ട്.
Short Story Summary: The family of 33-year-old Twisha Sharma, who was found dead at her marital home in Bhopal, has moved court seeking a second post-mortem examination at AIIMS Delhi. The family alleges foul play, dowry harassment, and severe procedural lapses in the initial autopsy at AIIMS Bhopal, where the police failed to produce the alleged hanging material (a belt) before the medical board. While Twisha’s mother-in-law, a retired judge, secured anticipatory bail, the court rejected the bail plea of her absconding husband, Samarth Singh, as a Special Investigation Team (SIT) continues its probe.
