കാസർകോട്: ജില്ലയിലെ ബദിയടുക്കയിൽ ക്രിക്കറ്റ് കളിയെച്ചൊല്ലിയുണ്ടായ തർക്കത്തെ തുടർന്ന് യുവാവ് കുത്തേറ്റ് മരിച്ചു (Kasaragod Badiyadka cricket fight murder). മാർപ്പനടുക്ക സ്വദേശി ബി.കെ. സുരേഷാണ് (കൊറഗയുടെ മകൻ) കൊല്ലപ്പെട്ടത്. മാർപ്പനടുക്ക ബദ്രു കുഡ്ലുവിലാണ് നാടിനെ നടുക്കിയ ഈ ക്രൂരമായ കൊലപാതകം നടന്നത്. സംഭവത്തിൽ മാർപ്പനടുക്ക സ്വദേശികളായ കിരൺ, അഖിലേഷ് എന്നിവർക്കെതിരെ ബദിയടുക്ക പോലീസ് കൊലക്കുറ്റത്തിന് കേസെടുത്തു.
കഴിഞ്ഞ ദിവസം കുമ്പഡാജെ ഗ്രാമപഞ്ചായത്ത് ഗ്രൗണ്ടിൽ നടന്ന പ്രാദേശിക ക്രിക്കറ്റ് ടൂർണമെന്റിനിടെ സുരേഷും പ്രതികളും തമ്മിൽ കളിസ്ഥലത്ത് വെച്ച് കടുത്ത വാക്കുതർക്കമുണ്ടായിരുന്നു. കളി കഴിഞ്ഞിട്ടും ഈ തർക്കം നിലനിൽക്കുകയും, ഇതേത്തുടർന്നുണ്ടായ മുൻവൈരാഗ്യമാണ് ഒടുവിൽ കൊലപാതകത്തിൽ കലാശിച്ചതെന്നുമാണ് പോലീസ് വ്യക്തമാക്കുന്നത്.
മാർപ്പിനടുക്ക ജംഗ്ഷനിലെ ഹൈമാസ്റ്റ് ലൈറ്റിന് സമീപത്ത് വെച്ചാണ് സുരേഷിന് നേരെ ആക്രമണം ഉണ്ടായത്. പ്രതിയായ കിരൺ കൈയിൽ കരുതിയിരുന്ന കത്തി ഉപയോഗിച്ച് സുരേഷിനെ ക്രൂരമായി കുത്തിവീഴ്ത്തുകയായിരുന്നു. ഈ കൊലപാതകത്തിന് അഖിലേഷ് ഒത്താശയും സഹായവും ചെയ്തതായി പോലീസിന്റെ പ്രഥമ വിവര റിപ്പോർട്ടിൽ (FIR) വ്യക്തമാക്കുന്നുണ്ട്.
ഗുരുതരമായി പരിക്കേറ്റ സുരേഷിനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ ബദിയടുക്ക പോലീസ് പ്രത്യേക സംഘമായി തിരിഞ്ഞ് അന്വേഷണം ആരംഭിച്ചിട്ടുണ്ട്. നിലവിൽ ഒളിവിൽ പോയ പ്രതികളായ കിരൺ, അഖിലേഷ് എന്നിവർക്കായുള്ള തെരച്ചിൽ പോലീസ് ഊർജിതമാക്കിയിരിക്കുകയാണ്.
Story Summary : A youth named B.K. Suresh was stabbed to death in Badiyadka, Kasaragod, following a dispute over a local cricket match. The incident occurred near the Marpinadka junction light, stemming from an argument during a tournament at Kumbadaje panchayat ground. Badiyadka police have registered a murder case against two locals, Kiran and Akhilesh, and a manhunt has been launched to capture the absconding suspects.
