തിരുവനന്തപുരം: യു.ഡി.എഫ് മന്ത്രിസഭാ രൂപീകരണ ചർച്ചകളിൽ നിർണ്ണായക തീരുമാനങ്ങളുമായി കോൺഗ്രസ് നേതൃത്വം. മന്ത്രിസ്ഥാനം പങ്കിടുന്നതുമായി ബന്ധപ്പെട്ട ടേം വ്യവസ്ഥ വേണ്ടെന്ന അനൂപ് ജേക്കബിന്റെ ആവശ്യം കോൺഗ്രസ് പൂർണ്ണമായും അംഗീകരിച്ചതായാണ് സൂചന (Anoop Jacob Full Term Minister Kerala). ഇതോടെ അഞ്ച് വർഷം മുഴുവൻ കാലാവധിയും അനൂപ് ജേക്കബ് തന്നെ മന്ത്രിസ്ഥാനത്ത് തുടരും. അതേസമയം, മുന്നണിയിലെ മറ്റൊരു ഘടകകക്ഷി നേതാവായ മാണി സി. കാപ്പന് ഡെപ്യൂട്ടി സ്പീക്കർ പദവി വാഗ്ദാനം ചെയ്തതായാണ് വിവരം.
നേരത്തെ അനൂപ് ജേക്കബിനും മാണി സി. കാപ്പനും രണ്ടര വർഷം വീതം മന്ത്രിസ്ഥാനം പങ്കിടാമെന്നായിരുന്നു യു.ഡി.എഫിലെ ആദ്യ ധാരണ. എന്നാൽ ഇരുവരും ഈ ഫോർമുലയോട് യോജിച്ചിരുന്നില്ല. പാലായിൽ നടന്ന തിരഞ്ഞെടുപ്പ് കൺവെൻഷനിൽ നിയുക്ത മുഖ്യമന്ത്രി വി.ഡി. സതീശനും രമേശ് ചെന്നിത്തലയും തനിക്ക് നൽകിയ പരസ്യമായ ഉറപ്പ് പാലിക്കണമെന്ന് മാണി സി. കാപ്പൻ ശക്തമായി ആവശ്യപ്പെട്ടിരുന്നു. പാലായിൽ നിന്ന് കൊടിവെച്ച കാറിലായിരിക്കും കാപ്പൻ മടങ്ങുകയെന്ന നേതാക്കളുടെ പ്രസംഗം ചൂണ്ടിക്കാട്ടിയാണ് കാപ്പൻ അവകാശവാദം ഉന്നയിച്ചത്. ഒടുവിൽ കാപ്പന് ഡെപ്യൂട്ടി സ്പീക്കർ പദവി നൽകി അനുനയിപ്പിക്കാനാണ് കോൺഗ്രസ് നീക്കം.
അതേസമയം, രണ്ട് മന്ത്രിസ്ഥാനം വേണമെന്ന ആവശ്യത്തിൽ ഉറച്ചുനിന്ന കേരള കോൺഗ്രസ് ജോസഫ് വിഭാഗം ഒടുവിൽ കോൺഗ്രസിന്റെ ഫോർമുലയ്ക്ക് വഴങ്ങി. ഒരു മന്ത്രിസ്ഥാനവും ചീഫ് വിപ്പ് പദവിയും നൽകിക്കൊണ്ടുള്ള കോൺഗ്രസ് നിർദ്ദേശം ജോസഫ് വിഭാഗം അംഗീകരിച്ചു. പുതിയ മന്ത്രിസഭയിൽ ജലസേചന വകുപ്പായിരിക്കും കേരള കോൺഗ്രസ് ജോസഫ് വിഭാഗത്തിന് ലഭിക്കുക.
Summary: Anoop Jacob is set to secure a full five-year term as minister in the new UDF cabinet, as Congress has reportedly accepted his demand to scrap the term-sharing formula. Consequently, Mani C. Kappan, who previously rejected the two-and-a-half-year split term, is likely to be offered the Deputy Speaker post. Meanwhile, the Kerala Congress Joseph faction has compromised on the Congress formula, accepting one cabinet berth (specifically the Irrigation portfolio) alongside the Chief Whip position, dropping their initial demand for two ministries.
