ജോധ്പൂർ: രാജസ്ഥാനിലെ ജോധ്പൂരിൽ പോലീസിന്റെ ഗുരുതരമായ വീഴ്ചയെത്തുടർന്ന് ഒരു കുടുംബത്തിലെ രണ്ട് പെൺകുട്ടികൾക്ക് ദാരുണാന്ത്യം (Jodhpur sisters suicide case). നാല് വർഷത്തോളം നീണ്ട കൂട്ടബലാത്സംഗത്തിനും ബ്ലാക്ക്മെയിലിങ്ങിനും ഇരയായി കഴിഞ്ഞ മാർച്ചിൽ മൂത്ത സഹോദരി ജീവനൊടുക്കിയിരുന്നു. ഈ സംഭവത്തിൽ നിരന്തരം സ്റ്റേഷൻ കയറിയിറങ്ങിയിട്ടും പ്രതികൾക്കെതിരെ നടപടിയെടുക്കാൻ പോലീസ് തയ്യാറാകാത്തതിൽ മനംനൊന്ത് ഇളയ സഹോദരിയും ഇപ്പോൾ ജീവിതം അവസാനിപ്പിച്ചു. സംഭവത്തെ തുടർന്ന് ജോധ്പൂരിലെ ഗ്രാമീണ മേഖലയിൽ കനത്ത ക്രമസമാധാന പ്രശ്നങ്ങളും വൻ ജനരോഷവും ഉയരുകയാണ്.
‘ഹിന്ദുസ്ഥാൻ ഇ-മിത്ര’ എന്ന ഓൺലൈൻ സർവീസ് സെന്റർ നടത്തിപ്പുകാരനായ മഹിപാൽ എന്ന യുവാവാണ് മൂത്ത സഹോദരിയെ ആദ്യം കെണിയിൽ വീഴ്ത്തിയത്. ഇയാൾ പെൺകുട്ടിയുടെ അശ്ലീല ദൃശ്യങ്ങൾ രഹസ്യമായി മൊബൈലിൽ പകർത്തി വെക്കുകയായിരുന്നു. തുടർന്ന് ഈ ദൃശ്യങ്ങൾ കാണിച്ച് ഭീഷണിപ്പെടുത്തി മഹിപാലും ഇയാളുടെ കൂട്ടാളികളായ ശിവരാജ്, ഗോപാൽ, വിജാറാം, ദിനേഷ്, മനോജ്, പുഖ്രാജ് എന്നിവരുൾപ്പെടെ എട്ട് പേർ ചേർന്ന് കഴിഞ്ഞ നാല് വർഷമായി പെൺകുട്ടിയെ കൂട്ടബലാത്സംഗം ചെയ്യുകയായിരുന്നു. ദൃശ്യങ്ങൾ പുറത്തുവിടാതിരിക്കാൻ ഇവർ പെൺകുട്ടിയിൽ നിന്നും വൻതോതിൽ പണവും തട്ടിയെടുത്തു. ഒടുവിൽ പീഡനം സഹിക്കാനാവാതെ മാർച്ച് 20-നാണ് മൂത്ത സഹോദരി ആത്മഹത്യ ചെയ്തത്.
മൂത്ത സഹോദരി മരിച്ചതിന് പിന്നാലെ പ്രതികൾ ഇളയ സഹോദരിക്ക് നേരെ തിരിഞ്ഞു. മരിച്ച പെൺകുട്ടിയുടെ ദൃശ്യങ്ങൾ സോഷ്യൽ മീഡിയയിൽ പ്രചരിപ്പിക്കുമെന്ന് ഭീഷണിപ്പെടുത്തി ഇവർ ഇളയ സഹോദരിയെയും ലൈംഗികമായി പീഡിപ്പിച്ചു. തുടർന്ന് ഏപ്രിൽ 11-ന് യുവതി എട്ട് പ്രതികളുടെയും പേരെടുത്ത് പറഞ്ഞ് പോലീസിൽ പരാതി നൽകി.
പരാതിയുടെ അടിസ്ഥാനത്തിൽ എഫ്ഐആർ (FIR) രജിസ്റ്റർ ചെയ്തതല്ലാതെ, അടുത്ത ഒരു മാസത്തേക്ക് പ്രതികളെ തൊടാൻ പോലും പോലീസ് തയ്യാറായില്ല. ഇതിനിടയിൽ പ്രതികൾ പെൺകുട്ടിയെ പരസ്യമായി ഭീഷണിപ്പെടുത്തുന്നത് തുടർന്നു. “പൊലീസിന് ഞങ്ങളെ ഒന്നും ചെയ്യാൻ കഴിയില്ല” എന്ന് പ്രതികൾ തങ്ങളോട് അഹങ്കാരത്തോടെ പറഞ്ഞതായി പെൺകുട്ടിയുടെ പരാതിയിലുണ്ടായിരുന്നു. നീതി ലഭിച്ചില്ലെങ്കിൽ താനും ജീവനൊടുക്കുമെന്ന് പെൺകുട്ടി പോലീസിന് കത്തു നൽകിയിട്ടും ഉദ്യോഗസ്ഥർ അനങ്ങിയില്ല.
പോലീസിന്റെ ഭാഗത്തുനിന്ന് യാതൊരു നടപടിയും ഉണ്ടാകാത്തതിനെ തുടർന്ന് കഴിഞ്ഞ വെള്ളിയാഴ്ച പെൺകുട്ടി പ്രദേശത്തെ ഒരു വാട്ടർ ടാങ്കിന് മുകളിൽ കയറി പ്രതികളെ അറസ്റ്റ് ചെയ്യണമെന്ന് ആവശ്യപ്പെട്ട് പ്രതിഷേധിച്ചു. ഇതിനിടെ പെൺകുട്ടി വിഷം കഴിക്കുകയായിരുന്നു. ഉടൻ തന്നെ ആശുപത്രിയിലേക്ക് കൊണ്ടുപോയെങ്കിലും യാത്രാമധ്യേ മരണപ്പെട്ടു.
യുവതിയുടെ മരണവാർത്ത പുറത്തുവന്നതോടെ ജോധ്പൂരിലെ എംഡിഎം ആശുപത്രിക്ക് മുന്നിൽ വൻ ജനക്കൂട്ടം തടിച്ചുകൂടി പ്രതിഷേധിച്ചു. ആദ്യഘട്ടത്തിൽ മൃതദേഹം ഏറ്റുവാങ്ങാൻ കുടുംബം തയ്യാറായില്ല.
സംഭവം വിവാദമായതോടെ മുഖ്യപ്രതി മഹിപാൽ ഉൾപ്പെടെ രണ്ട് പേരെ കസ്റ്റഡിയിലെടുത്തതായും ഇവരുടെ അറസ്റ്റ് ഉടൻ രേഖപ്പെടുത്തുമെന്നും ജോധ്പൂർ റൂറൽ പോലീസ് സൂപ്രണ്ട് (SP) പി.ഡി. നിത്യ അറിയിച്ചു. മറ്റുള്ളവരെ ചോദ്യം ചെയ്തുവരികയാണ്. കൂടാതെ, കേസ് കൈകാര്യം ചെയ്യുന്നതിൽ ഗുരുതരമായ വീഴ്ച വരുത്തിയ ഉദ്യോഗസ്ഥർക്കെതിരെ വകുപ്പുതല അന്വേഷണം പ്രഖ്യാപിച്ചതായും പോലീസ് അറിയിച്ചു.
Story Summary : In a shocking incident in Jodhpur, Rajasthan, a younger sister ended her life by consuming poison after the police failed to act against eight men who had gang-raped and blackmailed her elder sister, leading to her suicide in March. Despite multiple complaints stating that the accused were now targeting the younger sister and boasting about police immunity, no timely arrests were made, triggering massive public protests against police negligence.
