ഷിംല / ഇറ്റാനഗർ: ഹിമാലയൻ മലനിരകളിലെ ഉയർന്ന പ്രദേശങ്ങളിൽ ഹിമാനി (Glacier) തകരാൻ സാധ്യതയുണ്ടെന്ന മുന്നറിയിപ്പിനെ തുടർന്ന് ടിബറ്റൻ അതിർത്തി പ്രദേശങ്ങളിൽ അരുണാചൽ പ്രദേശ് സർക്കാർ അതീവ ജാഗ്രതാ നിർദ്ദേശം പുറപ്പെടുവിച്ചു (Arunachal Pradesh glacier alert). ഹിമാനി തകരുന്നതിലൂടെ ഉണ്ടായേക്കാവുന്ന പെട്ടെന്നുള്ള വെള്ളപ്പൊക്കവും (Flash Flood) ഉരുൾപൊട്ടലും മുന്നിൽക്കണ്ടാണ് മുൻകരുതൽ നടപടി. തവാംഗ് ഡെപ്യൂട്ടി കമ്മീഷണറും ജില്ലാ ദുരന്തനിവാരണ അതോറിറ്റി ചെയർപേഴ്സണുമായ നംഗ്യാൽ ആംഗ്ലോ ഇത് സംബന്ധിച്ച ഉത്തരവിറക്കി. മാഗോ ചു, തവാംഗ് ചു നദീതടങ്ങളിലെ അപകടസാധ്യതയുള്ള പ്രദേശങ്ങളിലെ താമസക്കാരോടും സന്ദർശകരോടും അടിയന്തരമായി ജാഗ്രത പാലിക്കാൻ ഭരണകൂടം ആവശ്യപ്പെട്ടിട്ടുണ്ട്.
മാഗോ ചു നദീതടത്തിലെ ‘ഖാംഗ്രി ഹിമാനി’ക്ക് (Khamgri Glacier) സമീപമുള്ള ഭൂപ്രകൃതിക്ക് ഗുരുതരമായ രീതിയിൽ ഇളക്കം തട്ടിയിട്ടുണ്ടെന്ന് സെന്റർ ഫോർ എർത്ത് സയൻസസ് ആൻഡ് ഹിമാലയൻ സ്റ്റഡീസ് കണ്ടെത്തിയിരുന്നു. ഹിമാനിയുടെ മുൻഭാഗം ഏതുനിമിഷവും ഇടിഞ്ഞുവിഴാമെന്ന ശാസ്ത്രജ്ഞരുടെ ആശങ്കയെത്തുടർന്നാണ് ഇപ്പോൾ അടിയന്തര ജാഗ്രതാ നിർദ്ദേശം നൽകിയിരിക്കുന്നത്. നദികളുടെ താഴത്തെ പ്രദേശങ്ങളിൽ താമസിക്കുന്നവരും ഉരുൾപൊട്ടൽ സാധ്യതയുള്ള മലഞ്ചെരുപ്പുകളിലുള്ളവരും നദീതീരങ്ങളിലേക്കുള്ള യാത്രകൾ പൂർണ്ണമായും ഒഴിവാക്കണമെന്ന് നിർദ്ദേശമുണ്ട്. പ്രത്യേകിച്ച് ശക്തമായ മഴയുള്ളപ്പോഴും മോശം കാലാവസ്ഥയിലും പുഴകളിൽ ഇറങ്ങരുതെന്ന് കർശന മുന്നറിയിപ്പ് നൽകിയിട്ടുണ്ട്.
തവാംഗ് മേഖലയിലേക്ക് എത്തുന്ന സഞ്ചാരികളും യാത്രക്കാരും തങ്ങളുടെ യാത്ര തുടങ്ങുന്നതിന് മുൻപ് കാലാവസ്ഥാ വിവരങ്ങളും റോഡുകളിലെ അവസ്ഥയും കൃത്യമായി പരിശോധിക്കണമെന്ന് അധികൃതർ അറിയിച്ചു. കുത്തിയൊഴുക്കുള്ള നദികളോ തോടുകളോ മുറിച്ചുകടക്കാനോ, തകരാറിലായ റോഡുകളിലൂടെയും പാലങ്ങളിലൂടെയും അപകടകരമായി യാത്ര ചെയ്യാനോ ശ്രമിക്കരുത്.
സാഹചര്യം വഷളായാൽ ആളുകളെ ഉടനടി ഒഴുപ്പിക്കുന്നതിനും രക്ഷാപ്രവർത്തനം നടത്തുന്നതിനുമായി സജ്ജരായിരിക്കാൻ പ്രദേശിക ജനപ്രതിനിധികൾക്കും ദുരന്തനിവാരണ സേനകൾക്കും ജില്ലാ ഭരണകൂടം നിർദ്ദേശം നൽകി. പൊതുജനങ്ങൾ പരിഭ്രാന്തരാകരുതെന്നും വ്യാജവാർത്തകൾ പ്രചരിപ്പിക്കരുതെന്നും അഭ്യർത്ഥിച്ച ഡി.സി, നദികളിലെ ജലനിരപ്പ് ഉയർന്നാലോ ഉരുൾപൊട്ടൽ ശ്രദ്ധയിൽപ്പെട്ടാലോ ഉടൻ തന്നെ കൺട്രോൾ റൂമിൽ വിവരമറിയിക്കണമെന്നും വ്യക്തമാക്കി.
Story Summary : The Arunachal Pradesh government has issued a high alert in areas bordering Tibet due to the risk of a flash flood and landslides triggered by a potential glacier collapse. Residents and tourists near the Mago Chu and Tawang Chu river basins have been advised to avoid travel, as the Khamgri glacier shows signs of instability.
