ന്യൂഡൽഹി: കേരള നിയമസഭാ തിരഞ്ഞെടുപ്പ് ഫലം വന്ന് ഒരാഴ്ച പിന്നിട്ടിട്ടും മുഖ്യമന്ത്രിയെ തീരുമാനിക്കാനാവാതെ കോൺഗ്രസ് നേതൃത്വം കുഴങ്ങുന്നു (Kerala CM Selection 2026). കോൺഗ്രസ് അധ്യക്ഷൻ മല്ലികാർജുൻ ഖർഗെയും രാഹുൽ ഗാന്ധിയും തമ്മിലുള്ള നിർണ്ണായക ചർച്ചകൾ ഉടൻ ഉണ്ടാകില്ലെന്നാണ് സൂചന. മുതിർന്ന നേതാവ് ഡി. സുധാകറിന്റെ മരണാനന്തര ചടങ്ങുകളിൽ പങ്കെടുക്കാൻ ഖർഗെ ബംഗളൂരുവിലേക്ക് പോയതാണ് ചർച്ചകൾ വീണ്ടും നീളാൻ കാരണം.
മുഖ്യമന്ത്രി സ്ഥാനത്തിനായി അവകാശവാദമുന്നയിച്ച വിഡി സതീശൻ , കെസി വേണുഗോപാൽ , രമേശ് ചെന്നിത്തല എന്നിവരുമായി മല്ലികാർജുൻ ഖർഗെ ചർച്ചകൾ നടത്തിയെങ്കിലും ആർക്കും മുൻതൂക്കം നൽകാനാവാത്ത വിധം തർക്കം തുടരുകയാണ്. അതേസമയം , ഖർഗെ രണ്ട് ദിവസത്തിന് ശേഷം മാത്രമേ ഡൽഹിയിൽ മടങ്ങിയെത്തുകയുള്ളൂ. അതിനുശേഷം മാത്രമേ രാഹുൽ ഗാന്ധിയുമായുള്ള അന്തിമ കൂടിക്കാഴ്ച നടക്കൂ.
തിരഞ്ഞെടുപ്പ് കഴിഞ്ഞ് ഏഴ് ദിവസം പിന്നിട്ടിട്ടും ഭരണത്തലവനെ നിശ്ചയിക്കാത്തതിൽ കോൺഗ്രസ് അണികൾക്കിടയിലും പൊതുസമൂഹത്തിലും പ്രതിഷേധം ശക്തമാണ്. ഭരണവിരുദ്ധ വികാരം വോട്ടായി മാറിയെങ്കിലും നേതൃത്വത്തിലെ തർക്കം പാർട്ടിയുടെ പ്രതിച്ഛായയെ ബാധിക്കുന്നുവെന്ന വിലയിരുത്തലുണ്ട്.
ഡൽഹിയിൽ നടക്കുന്ന ഹൈക്കമാൻഡ് ചർച്ചകളിലൂടെ വരും ദിവസങ്ങളിൽ തന്നെ അന്തിമ തീരുമാനമുണ്ടാകുമെന്നാണ് കേരളത്തിലെ കോൺഗ്രസ് നേതാക്കൾ പ്രതീക്ഷിക്കുന്നത്.
Story Summary: The Congress High Command remains undecided on the Chief Minister of Kerala even a week after the election results. The crucial discussions between Mallikarjun Kharge and Rahul Gandhi have been delayed as Kharge traveled to Bengaluru to attend the funeral rites of senior leader D. Sudhakar. He is expected to return to Delhi in two days. With three prominent leaders staking claim to the top post, the ongoing stalemate has triggered frustration among party workers and the public.
