ന്യൂഡൽഹി : തമിഴ്നാട് മുഖ്യമന്ത്രിയായി അധികാരമേറ്റ സി. ജോസഫ് വിജയെ അഭിനന്ദിക്കുമ്പോഴും, അദ്ദേഹത്തിന്റെ സഖ്യകക്ഷിയായ കോൺഗ്രസിനെതിരെ കടുത്ത ഭാഷയിൽ ആഞ്ഞടിച്ച് പ്രധാനമന്ത്രി നരേന്ദ്ര മോദി. അധികാരത്തിന് വേണ്ടി കോൺഗ്രസ് സ്വന്തം സഖ്യകക്ഷികളെ പിന്നിൽ നിന്ന് കുത്തുന്ന ‘പരാദ’ പാർട്ടിയാണെന്ന് മോദി പരിഹസിച്ചു. (PM Modi Attacks Congress For Betraying DMK After Vijay Sworn In)
കഴിഞ്ഞ 25-30 വർഷമായി കോൺഗ്രസിനെ പ്രതിസന്ധികളിൽ സഹായിച്ച പാർട്ടിയാണ് ഡിഎംകെ. 2014-ന് മുൻപുള്ള പത്തുവർഷം കേന്ദ്രത്തിൽ കോൺഗ്രസ് ഭരണം നിലനിർത്തിയത് ഡിഎംകെയുടെ പിന്തുണയോടെയാണ്. എന്നാൽ രാഷ്ട്രീയ സാഹചര്യം മാറിയപ്പോൾ, അധികാരത്തോടുള്ള അത്യാർത്തി കാരണം കോൺഗ്രസ് ഡിഎംകെയെ ചതിച്ചു, പ്രധാനമന്ത്രി പറഞ്ഞു. പ്രസംഗത്തിലുടനീളം കോൺഗ്രസിനെ ‘വിശ്വാസവഞ്ചകർ’ എന്നാണ് അദ്ദേഹം വിശേഷിപ്പിച്ചത്. നിലനിൽപ്പിനായി മറ്റൊരു പാർട്ടിയുടെ തോളിൽ കയറി സവാരി ചെയ്യാനാണ് കോൺഗ്രസ് എപ്പോഴും ശ്രമിക്കുന്നതെന്നും അദ്ദേഹം കൂട്ടിച്ചേർത്തു.
കോൺഗ്രസിനെതിരെ ഡിഎംകെയും രംഗത്തെത്തി. തിരഞ്ഞെടുപ്പ് വിജയത്തിന് ശേഷം തങ്ങളെ നേരിട്ട് കണ്ട് നന്ദി പറയാൻ പോലും കോൺഗ്രസ് തയ്യാറായില്ലെന്നും, വെറും മൂന്ന് ദിവസത്തിനുള്ളിൽ വിജയ്യുടെ പാർട്ടിയുമായി സഖ്യമുണ്ടാക്കിയത് വലിയ വഞ്ചനയാണെന്നും എം.കെ. സ്റ്റാലിന്റെ അധ്യക്ഷതയിൽ ചേർന്ന യോഗം പാസാക്കിയ പ്രമേയത്തിൽ പറയുന്നു. ബിജെപി മറ്റു സംസ്ഥാനങ്ങളിൽ ചെയ്യുന്ന അതേ വഞ്ചനയാണ് തമിഴ്നാട്ടിൽ കോൺഗ്രസ് ചെയ്തതെന്നാണ് ഡിഎംകെയുടെ ആരോപണം.
കേരളത്തിലെയും കർണാടകയിലെയും കോൺഗ്രസ് രാഷ്ട്രീയത്തെയും മോദി കടന്നാക്രമിച്ചു. “കേരളത്തിൽ ജയിച്ചെങ്കിലും മുഖ്യമന്ത്രി സ്ഥാനത്തെച്ചൊല്ലി തർക്കത്തിലാണ് കോൺഗ്രസ്. അഞ്ചു വർഷത്തിനിടെ അഞ്ചു മുഖ്യമന്ത്രിമാരെന്ന വിചിത്രമായ ഫോർമുലയാണോ അവിടെയെന്ന് സംശയമാണ്. കർണാടകയിലും ഹിമാചലിലും ഭരണം താളംതെറ്റിയിരിക്കുകയാണ്,” മോദി പരിഹസിച്ചു. ബംഗാളിലും കേരളത്തിലും ബിജെപിയുടെ വളർച്ചയെക്കുറിച്ചും മോദി പരാമർശിച്ചു. കേരളത്തിൽ ഒരു സീറ്റിൽ നിന്ന് മൂന്ന് സീറ്റിലേക്ക് ഉയർന്ന ബിജെപി, വരുംകാലത്ത് അവിടെ സർക്കാർ രൂപീകരിക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
Story Summary
Prime Minister Narendra Modi launched a scathing attack on Congress during a rally in Bengaluru, labeling it a “parasite” and a “backstabber” for ditching its long-term ally DMK to join hands with Vijay’s TVK. PM Modi’s comments came as Vijay took oath as Tamil Nadu CM, while DMK also expressed deep betrayal over Congress’s sudden shift in loyalty.
