ചൈന: ചൈനയിലെ അൻഹുയി പ്രവിശ്യയിൽ വാഹനാപകടത്തിൽ പരിക്കേറ്റ ഒരു തെരുവുനായയും അവനെ ജീവിതത്തിലേക്ക് തിരികെ കൊണ്ടുവന്ന ഒരു കൂട്ടം ടാക്സി ഡ്രൈവർമാരും ഇന്ന് സോഷ്യൽ മീഡിയയിലെ താരങ്ങളാണ്. ഷുവാൻചെങ് ഹൈസ്പീഡ് റെയിൽവേ സ്റ്റേഷനിലെ സ്ഥിരം സാന്നിധ്യമായ ‘സ്റ്റേഷൻ മാസ്റ്റർ ഹുവാങ്’ എന്ന് ഡ്രൈവർമാർ സ്നേഹത്തോടെ വിളിക്കുന്ന നായയ്ക്കാണ് ഈ കരുതൽ ലഭിച്ചത്. ( Stationmaster Huang dog China)
കഴിഞ്ഞ കുറേ മാസങ്ങളായി സ്റ്റേഷനിലെ ടാക്സി ഡ്രൈവർമാരുടെ പ്രിയങ്കരനായിരുന്നു ഈ നായ. തങ്ങളുടെ വിശ്രമവേളകളിൽ അവനൊപ്പം സമയം ചെലവഴിക്കുന്നതും ഭക്ഷണം നൽകുന്നതും ഡ്രൈവർമാരുടെ പതിവായിരുന്നു. എന്നാൽ ഏപ്രിൽ പകുതിയോടെ ഒരു കാറിടിച്ച് നായയ്ക്ക് ഗുരുതരമായി പരിക്കേറ്റു. ഒന്നിലധികം എല്ലുകൾ ഒടിയുകയും എഴുന്നേൽക്കാൻ പോലുമാകാത്ത അവസ്ഥയിലാവുകയും ചെയ്ത നായയെ കണ്ട ഡ്രൈവർമാർ ഉടൻ തന്നെ തങ്ങളുടെ ജോലികൾ നിർത്തിവെച്ച് സഹായത്തിനായി ഓടിയെത്തി.
10,000 യുവാൻ (ഏകദേശം 1.15 ലക്ഷം രൂപ) ചികിത്സാച്ചെലവ് വരുമെന്ന് മൃഗഡോക്ടർമാർ അറിയിച്ചതോടെ, 56 ടാക്സി ഡ്രൈവർമാർ ചേർന്ന് പണം സമാഹരിക്കാൻ തീരുമാനിച്ചു. ഏതാനും ദിവസങ്ങൾക്കുള്ളിൽ അവർ 5,000 യുവാൻ സമാഹരിച്ചു. അപകടമുണ്ടാക്കിയ ഡ്രൈവർ 2,000 യുവാൻ നൽകി. ഡ്രൈവർമാരുടെ ഈ സ്നേഹത്തിന് മുന്നിൽ മൃഗശുപത്രി അധികൃതരും വഴങ്ങി, അവർ ലേബർ ചാർജ് ഒഴിവാക്കി ശസ്ത്രക്രിയാ ചെലവ് 4,000 യുവാനായി കുറച്ചു നൽകി.
ഏപ്രിൽ 20-ന് ശസ്ത്രക്രിയ വിജയകരമായി പൂർത്തിയായി. ആശുപത്രിയിൽ കഴിയുന്ന നായയെ ഊഴമിട്ടാണ് ഡ്രൈവർമാർ സന്ദർശിക്കുന്നത്. ഒരാഴ്ചത്തെ ചികിത്സയ്ക്ക് ശേഷം നായ ഇപ്പോൾ സ്വന്തമായി നിൽക്കാൻ തുടങ്ങിയിട്ടുണ്ട്. ഒരു മാസത്തിനുള്ളിൽ അവൻ പൂർണ്ണ ആരോഗ്യവാനാകുമെന്ന് ഡോക്ടർമാർ അറിയിച്ചു. പലരും നായയെ ദത്തെടുക്കാൻ സന്നദ്ധത പ്രകടിപ്പിച്ചിട്ടുണ്ടെങ്കിലും, അവന്റെ സുരക്ഷ ഉറപ്പാക്കുന്ന നല്ലൊരു ഉടമയ്ക്ക് മാത്രമേ കൈമാറൂ എന്ന നിലപാടിലാണ് ഡ്രൈവർമാർ.
മനുഷ്യനും മൃഗങ്ങളും തമ്മിലുള്ള ആഴത്തിലുള്ള ബന്ധത്തിന്റെ ഈ കഥ ചൈനീസ് സോഷ്യൽ മീഡിയയിൽ വലിയ ചർച്ചയായിട്ടുണ്ട്. നായയെ നഗരത്തിന്റെ ‘ചെറിയ ഹീറോ’ എന്നാണ് പലരും വിശേഷിപ്പിക്കുന്നത്. തെരുവുനായ്ക്കളോട് ഒരു നഗരം എങ്ങനെ പെരുമാറുന്നു എന്നത് ആ നഗരത്തിന്റെ സംസ്കാരത്തിന്റെ അടയാളമാണെന്ന് പലരും കുറിച്ചു.
Summary: A stray dog nicknamed “Stationmaster Huang” in Xuancheng, China, has become a viral sensation after 56 taxi drivers pooled money for its life-saving surgery. The dog, a favorite among local cabbies, suffered multiple fractures in a car accident in mid-April. The drivers raised nearly 5,000 yuan, and touched by their gesture, the pet hospital reduced the surgical costs. The dog is now on the path to recovery, highlighting a heartwarming bond between humans and animals.
