വാഷിംഗ്ടൺ: ഇറാൻ സമർപ്പിച്ച പുതിയ സമാധാന നിർദ്ദേശങ്ങൾ താൻ പരിശോധിച്ചുവരികയാണെന്നും എന്നാൽ അവ അംഗീകരിക്കാൻ സാധ്യതയില്ലെന്നും യുഎസ് പ്രസിഡന്റ് ഡൊണാൾഡ് ട്രംപ്. കഴിഞ്ഞ 47 വർഷമായി ലോകത്തോടും മാനവികതയോടും ചെയ്ത ക്രൂരതകൾക്ക് അർഹമായ “വില” ഇറാൻ ഇതുവരെ നൽകിയിട്ടില്ലെന്ന് ട്രംപ് ശനിയാഴ്ച പറഞ്ഞു.(Donald Trump sceptical as Iran submits 14-point plan to end war)
തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ വഴിയാണ് ട്രംപ് തന്റെ നിലപാട് വ്യക്തമാക്കിയത്. ഇറാന്റെ വാർത്താ ഏജൻസി റിപ്പോർട്ട് ചെയ്തതനുസരിച്ച്, മേഖലയിലെ സംഘർഷങ്ങൾ അവസാനിപ്പിക്കാനായി 14 ഇന പദ്ധതിയാണ് ഇറാൻ മുന്നോട്ടുവെച്ചിരിക്കുന്നത്. താത്കാലിക വെടിനിർത്തലുകൾക്ക് പകരം 30 ദിവസത്തിനുള്ളിൽ ലബനൻ അടക്കമുള്ള എല്ലാ മേഖലകളിലും ശാശ്വതമായ സമാധാനം ഉറപ്പാക്കണമെന്ന് ഇറാൻ ആവശ്യപ്പെടുന്നു.
ഇറാനെതിരെയുള്ള ഭാവി ആക്രമണങ്ങൾ തടയാൻ സുരക്ഷാ ഉറപ്പുകൾ നൽകണം. മേഖലയിൽ നിന്ന് യുഎസ് സൈന്യം പിന്മാറണം. മരവിപ്പിച്ച ഇറാൻ ആസ്തികൾ വിട്ടുനൽകുക, ഉപരോധങ്ങൾ മൂലം ഉണ്ടായ നഷ്ടത്തിന് നഷ്ടപരിഹാരം നൽകുക, എല്ലാ അന്താരാഷ്ട്ര ഉപരോധങ്ങളും നീക്കം ചെയ്യുക. ഹോർമുസ് കടലിടുക്കിലെ കപ്പൽ ഗതാഗതം സുഗമമാക്കാൻ പുതിയൊരു മേൽനോട്ട സംവിധാനം ഏർപ്പെടുത്തുക.
പാകിസ്ഥാൻ മധ്യസ്ഥതയിലാണ് ഇറാൻ ഈ നിർദ്ദേശങ്ങൾ കൈമാറിയത്. “പന്ത് ഇപ്പോൾ അമേരിക്കയുടെ കോർട്ടിലാണ്. നയതന്ത്രം വേണോ അതോ ഏറ്റുമുട്ടൽ വേണോ എന്ന് അവർക്ക് തീരുമാനിക്കാം,” എന്ന് ഇറാന്റെ ഉപവിദേശകാര്യ മന്ത്രി കാസിം ഗരീബാബാദി പറഞ്ഞു. ഇറാൻ ഒരു കരാറിന് ആഗ്രഹിക്കുന്നുണ്ടെന്ന് സമ്മതിക്കുമ്പോഴും, അവിടുത്തെ നേതൃത്വം പരസ്പര ബന്ധമില്ലാത്ത അവസ്ഥയിലാണെന്ന് ട്രംപ് കുറ്റപ്പെടുത്തി. ഇറാൻ തെറ്റായ രീതിയിൽ പെരുമാറിയാൽ സൈനിക നടപടി ഉണ്ടാകാനുള്ള സാധ്യതയും അദ്ദേഹം തള്ളിക്കളഞ്ഞില്ല. ഇറാന്റെ മിസൈൽ ശേഷിയെക്കുറിച്ച് പ്രതികരിച്ച ട്രംപ്, അത് പൂർണ്ണമായും ഇല്ലാതാക്കാനാണ് താൻ ആഗ്രഹിക്കുന്നതെന്ന് പറഞ്ഞു. രണ്ട് വർഷം കഴിഞ്ഞോ അഞ്ച് വർഷം കഴിഞ്ഞോ വീണ്ടും ഇതേ വിഷയത്തിൽ ഇടപെടേണ്ടി വരാത്ത തരത്തിലുള്ള, ദീർഘകാലാടിസ്ഥാനത്തിലുള്ള ഒരു കരാറാണ് താൻ ലക്ഷ്യമിടുന്നതെന്നും അദ്ദേഹം വ്യക്തമാക്കി.
