അബുദാബി: യുഎഇ വ്യോമപാതയിലെ താൽക്കാലിക നിയന്ത്രണങ്ങൾ നീക്കി പാത പൂർണ്ണമായും തുറന്നു നൽകിയതായി യുഎഇ ഭരണകൂടം അറിയിച്ചു (UAE Airspace Open). മേഖലയിലെ സംഘർഷ സാധ്യതകളെത്തുടർന്ന് ഏർപ്പെടുത്തിയിരുന്ന നിയന്ത്രണങ്ങൾ നീക്കിയതോടെ ഇന്ത്യൻ വിമാനക്കമ്പനികൾ ഉൾപ്പെടെയുള്ളവയ്ക്ക് ഇനി മുതൽ സാധാരണ നിലയിൽ സർവീസ് നടത്താൻ സാധിക്കും. വരാനിരിക്കുന്ന അവധിക്കാലത്ത് നാട്ടിലേക്ക് പോകാനൊരുങ്ങുന്ന പ്രവാസികൾക്ക് വലിയ ആശ്വാസം നൽകുന്നതാണ് ഈ തീരുമാനം.
സർവീസുകൾ പൂർണ്ണതോതിലാകുന്നതോടെ സീറ്റുകളുടെ എണ്ണം വർദ്ധിക്കുകയും നിലവിൽ കുത്തനെ ഉയർന്നു നിൽക്കുന്ന വിമാന ടിക്കറ്റ് നിരക്കിൽ കുറവുണ്ടാകുകയും ചെയ്യും. ഇതുവരെ സ്പെഷ്യൽ ഫ്ലൈറ്റുകളായി സർവീസ് നടത്തിയിരുന്ന ഇന്ത്യൻ വിമാനക്കമ്പനികൾക്ക് ഇനി മുതൽ റെഗുലർ സർവീസുകളിലേക്ക് മാറാം.
പെരുന്നാൾ അവധിയും സ്കൂളുകൾ അടയ്ക്കുന്ന മധ്യവേനലവധിയും അടുത്തിരിക്കെ, യാത്രക്കാർക്ക് കുറഞ്ഞ നിരക്കിൽ ടിക്കറ്റുകൾ ലഭ്യമാകാൻ ഈ തീരുമാനം സഹായിക്കും.
യുഎഇ വിമാനക്കമ്പനികൾ സർവീസ് നടത്തിയിരുന്നെങ്കിലും ഇന്ത്യൻ കമ്പനികളുടെ സർവീസുകൾ പൂർണ്ണതോതിൽ പുനരാരംഭിക്കാത്തതായിരുന്നു പ്രവാസികൾ നേരിട്ടിരുന്ന പ്രധാന വെല്ലുവിളി. വ്യോമപാത തുറന്നതോടെ ഈ പ്രതിസന്ധിക്ക് പരിഹാരമാകും. കൂടാതെ, മേഖലയിലെ സംഘർഷാശങ്കകൾ ഒഴിയുന്നു എന്ന ശുഭസൂചന കൂടിയാണ് യുഎഇയുടെ ഈ നീക്കം നൽകുന്നത്. വരും ദിവസങ്ങളിൽ കൂടുതൽ സർവീസുകൾ എയർ ഇന്ത്യ ഉൾപ്പെടെയുള്ള കമ്പനികൾ പ്രഖ്യാപിക്കുമെന്നാണ് പ്രതീക്ഷിക്കുന്നത്.
Story Summary: The UAE government has announced the full reopening of its airspace, removing all temporary restrictions. This move allows Indian and other international airlines to resume full-scale operations, which is expected to lower the currently high airfare. The decision comes at a crucial time as expatriates prepare for Eid and summer vacations. This also signals a potential easing of regional tensions.
