ന്യൂഡൽഹി: കേരളം ഉൾപ്പെടെയുള്ള അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പിന്റെ എക്സിറ്റ് പോൾ ഫലങ്ങൾ പുറത്തുവന്നു (Exit Poll 2026). കേരളത്തിൽ യുഡിഎഫ് (UDF) അധികാരം തിരിച്ചുപിടിക്കുമെന്നാണ് പ്രമുഖ സർവേകൾ പ്രവചിക്കുന്നത്. ടൈംസ് നൗ സർവേ പ്രകാരം യുഡിഎഫ് 85 മുതൽ 90 വരെ സീറ്റുകൾ നേടി അധികാരത്തിൽ വരുമെന്നാണ് സൂചന. ഭരണവിരുദ്ധ തരംഗമുണ്ടായാൽ സീറ്റ് നില 90-ന് മുകളിലേക്ക് ഉയരാമെന്നും സർവേ വ്യക്തമാക്കുന്നു. നിലവിലെ ഭരണകക്ഷിയായ എൽഡിഎഫിന് (LDF) 49 മുതൽ 62 വരെ സീറ്റുകൾ മാത്രമേ ലഭിക്കാനിടയുള്ളൂ എന്നാണ് പ്രവചനം. ബിജെപി 0 മുതൽ 3 വരെ സീറ്റുകൾ നേടിയേക്കാം.
പശ്ചിമ ബംഗാളിൽ മമതാ ബാനർജിയുടെ തൃണമൂൽ കോൺഗ്രസിനെ അട്ടിമറിച്ച് ബിജെപി (BJP) അധികാരം പിടിച്ചെടുക്കുമെന്ന് പോൾ ഡയറി (Poll Diary), പി-മാർക്ക് (P-MARQ) തുടങ്ങിയ സർവേകൾ പ്രവചിക്കുന്നു. പി-മാർക്ക് സർവേ പ്രകാരം ബിജെപി 150 മുതൽ 175 വരെ സീറ്റുകൾ നേടി വ്യക്തമായ ഭൂരിപക്ഷം ഉറപ്പാക്കും. തൃണമൂൽ കോൺഗ്രസിന് 118 മുതൽ 138 വരെ സീറ്റുകൾ മാത്രമേ ലഭിക്കൂ എന്നാണ് പ്രവചനം.
കേരളം, തമിഴ്നാട്, അസം, പുതുച്ചേരി എന്നിവിടങ്ങളിൽ നേരത്തെ തന്നെ വോട്ടെടുപ്പ് പൂർത്തിയായിരുന്നു. ബംഗാളിലെ രണ്ടാം ഘട്ട വോട്ടെടുപ്പ് ഇന്ന് അവസാനിച്ചതോടെയാണ് ഔദ്യോഗികമായി എക്സിറ്റ് പോൾ ഫലങ്ങൾ പ്രസിദ്ധീകരിക്കാൻ അനുമതി ലഭിച്ചത്. മെയ് 4-നാണ് വോട്ടെണ്ണൽ നടക്കുന്നത്.
Story Summary: The 2026 Exit Polls predict a major political shift, with UDF expected to return to power in Kerala with 85-90 seats. In West Bengal, surveys like P-MARQ suggest a BJP victory, ending TMC’s rule, while official results for all states will be announced on May 4.
