വാഷിംഗ്ടൺ: പശ്ചിമേഷ്യയിൽ വിന്യസിച്ചിരിക്കുന്ന ആയിരക്കണക്കിന് യുഎസ് മറീനുകളുടെ സ്വകാര്യ വിവരങ്ങൾ ഇറാൻ പിന്തുണയുള്ള ഹാക്കർമാർ ചോർത്തിയതായി റിപ്പോർട്ട്. സംഭവത്തിൽ യുഎസ് പ്രതിരോധ വകുപ്പ് അന്വേഷണം ആരംഭിച്ചു. ചോർന്ന വിവരങ്ങളിൽ ചിലത് ഔദ്യോഗികമാണെന്ന് പ്രാഥമിക അന്വേഷണത്തിൽ വ്യക്തമായതായി റിപ്പോർട്ട് ചെയ്തു.(Iran-linked hackers claim they leaked data of over 2,000 US marines)
‘ഹൻഡല’ എന്ന ഹാക്കർ ഗ്രൂപ്പാണ് ഈ സൈബർ ആക്രമണത്തിന് പിന്നിലെന്ന് അറബ് വാർത്താ വെബ്സൈറ്റ് റിപ്പോർട്ട് ചെയ്യുന്നു. പശ്ചിമേഷ്യയിലുള്ള 2,379 യുഎസ് മറീനുകളുടെ വിവരങ്ങളാണ് ഇവർ ടെലിഗ്രാം ചാനലുകൾ വഴി പുറത്തുവിട്ടത്. തങ്ങളുടെ നിരീക്ഷണ പാടവം തെളിയിക്കാനാണ് ഈ നീക്കമെന്ന് ഹാക്കർമാർ അവകാശപ്പെടുന്നു.
സൈനികരുടെ പേര് വിവരങ്ങൾക്ക് പുറമെ അവരുടെ കുടുംബാംഗങ്ങളെക്കുറിച്ചുള്ള വിവരങ്ങൾ, വീട്ടുപേരുകൾ, ദിനചര്യകൾ എന്നിവയും തങ്ങളുടെ പക്കലുണ്ടെന്ന് ഇവർ അവകാശപ്പെടുന്നു. സൈനികർക്ക് വാട്സാപ്പ് വഴി ഭീഷണി സന്ദേശങ്ങൾ ലഭിച്ചതായും റിപ്പോർട്ടുകളുണ്ട്. എന്നാൽ ഈ അവകാശവാദങ്ങൾ പൂർണ്ണമായും സ്ഥിരീകരിക്കപ്പെട്ടിട്ടില്ല.
ഇറാൻ ഭരണകൂടം വലിയ തകർച്ചയെ നേരിടുകയാണെന്നും ഹോർമൂസ് കടലിടുക്ക് എത്രയും വേഗം തുറന്നുനൽകാൻ അവർ അഭ്യർത്ഥിച്ചതായും യുഎസ് പ്രസിഡന്റ് ഡോണാൾഡ് ട്രംപ് വെളിപ്പെടുത്തി. ട്രൂത്ത് സോഷ്യലിലൂടെയാണ് അദ്ദേഹം ഇക്കാര്യം അറിയിച്ചത്. “ഇറാൻ തകർച്ചയുടെ വക്കിലാണെന്ന് അവർ ഞങ്ങളെ അറിയിച്ചു. അവരുടെ നേതൃത്വവുമായി ബന്ധപ്പെട്ട പ്രശ്നങ്ങൾ പരിഹരിക്കാൻ ശ്രമിക്കുന്നതിനിടെ ഹോർമൂസ് കടലിടുക്ക് തുറന്നുനൽകണമെന്നാണ് അവരുടെ ആവശ്യം,” ട്രംപ് കുറിച്ചു.
യുദ്ധം അവസാനിപ്പിക്കാനുള്ള ഇറാന്റെ പുതിയ നിർദ്ദേശങ്ങൾ വരും ദിവസങ്ങളിൽ പാകിസ്താൻ മധ്യസ്ഥർ വഴി യുഎസിന് സമർപ്പിക്കുമെന്നാണ് സൂചന. ഇറാന്റെ എണ്ണ വരുമാനം പൂർണ്ണമായും തടയുക എന്ന ലക്ഷ്യത്തോടെ ഇറാനിയൻ തുറമുഖങ്ങളിലേക്കുള്ള കപ്പൽ ഗതാഗതം യുഎസ് നാവികസേന നിലവിൽ തടഞ്ഞിരിക്കുകയാണ്.
