മുള്ളൻപൂർ: ഐപിഎൽ 2026-ൽ പഞ്ചാബ് കിങ്സും രാജസ്ഥാൻ റോയൽസും തമ്മിൽ നടന്ന മത്സരത്തിനിടെ ആരാധകന് ദാരുണ പരിക്ക്. പഞ്ചാബ് താരം പ്രിയാൻഷ് ആര്യ അടിച്ച പന്ത് ഗാലറിയിലുണ്ടായിരുന്ന വൃദ്ധന്റെ മുഖത്താണ് ഇടിച്ചത് (Fan Injured by Six IPL). പന്ത് തട്ടിയതോടെ മുഖത്ത് നിന്ന് രക്തം വാർന്നൊഴുകുകയും ഇദ്ദേഹത്തിന്റെ വസ്ത്രങ്ങളിൽ രക്തം പടരുകയും ചെയ്തു.
മത്സരത്തിന്റെ രണ്ടാം ഓവറിൽ നന്ദ്രെ ബർഗർ എറിഞ്ഞ പന്ത് പ്രിയാൻഷ് ആര്യ സിക്സറിലേക്ക് പായിച്ചിരുന്നു. അതിവേഗത്തിൽ ഗാലറിയിലേക്ക് പാഞ്ഞെത്തിയ പന്ത് വൃദ്ധന്റെ മുഖത്ത് ആഞ്ഞടിക്കുകയായിരുന്നു. പരിക്കേറ്റ ഉടൻ തന്നെ സഹയാത്രികരും മറ്റ് കാണികളും ചേർന്ന് ഇദ്ദേഹത്തിന് പ്രാഥമിക ശുശ്രൂഷ നൽകി. പിന്നീട് ഇദ്ദേഹത്തെ അടുത്തുള്ള ആശുപത്രിയിലേക്ക് മാറ്റി.
Priyansh Arya six badly injured a man’s head in stands. pic.twitter.com/csNqEadB92
— Selfless⁴⁵ (@SelflessCricket) April 28, 2026
ആവേശകരമായ മത്സരത്തിൽ രാജസ്ഥാൻ റോയൽസ് വിജയം നേടി. ആദ്യം ബാറ്റ് ചെയ്ത പഞ്ചാബ് കിങ്സ് മാർക്കസ് സ്റ്റോയിനിസ് (62*), പ്രഭ്സിമ്രാൻ സിംഗ് (59) എന്നിവരുടെ മികവിൽ 222 റൺസെന്ന കൂറ്റൻ സ്കോർ ഉയർത്തി. എന്നാൽ വൈഭവ് സൂര്യവംശി (43), യശസ്വി ജയ്സ്വാൾ (51), ഡോണോവൻ ഫെരേര (52*) എന്നിവരുടെ ബാറ്റിംഗ് കരുത്തിൽ നാല് പന്തുകൾ ബാക്കി നിൽക്കെ രാജസ്ഥാൻ ലക്ഷ്യം മറികടന്നു. ഈ തോൽവിയിലും 13 പോയിന്റോടെ പഞ്ചാബ് കിങ്സ് പട്ടികയിൽ ഒന്നാം സ്ഥാനത്ത് തുടരുകയാണ്. 12 പോയിന്റുള്ള രാജസ്ഥാൻ റോയൽസ് മൂന്നാം സ്ഥാനത്തേക്ക് ഉയർന്നു.
Summary: An elderly fan was hospitalized after being struck in the face by a six hit by PBKS batter Priyansh Arya during a match against Rajasthan Royals. The incident occurred in the second over, leaving the fan bleeding profusely before spectators and medical teams intervened. Despite a massive 222-run target set by PBKS, Rajasthan Royals secured a victory with contributions from Yashasvi Jaiswal and Donovan Ferreira.
