ബംഗളൂരു: ബംഗളൂരുവിലെ വാടക ഫ്ലാറ്റിനുള്ളിൽ 34-കാരിയായ യുവതിയെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി (Bengaluru Woman Found Dead). ജാർഖണ്ഡിലെ ധൻബാദ് സ്വദേശിയായ പൂജ ദത്തയാണ് കൊല്ലപ്പെട്ടത്. ബംഗളൂരുവിൽ സ്വകാര്യ കമ്പനിയിൽ ജോലി ചെയ്തുവരികയായിരുന്നു ഇവർ.
തിങ്കളാഴ്ചയാണ് സംഭവം പുറംലോകമറിയുന്നത്. യുവതി താമസിച്ചിരുന്ന ഫ്ലാറ്റിൽ നിന്ന് ദുർഗന്ധം വമിച്ചതിനെത്തുടർന്ന് അയൽവാസികൾ അധികൃതരെ വിവരം അറിയിക്കുകയായിരുന്നു. പോലീസ് എത്തി വാതിൽ തകർത്ത് അകത്ത് കടന്നപ്പോഴാണ് രക്തത്തിൽ കുളിച്ച നിലയിൽ മൃതദേഹം കണ്ടെത്തിയത്. മൃതദേഹം അഴുകിത്തുടങ്ങിയ നിലയിലായിരുന്നു.
മൃതദേഹം കണ്ടെത്തുന്നതിന് രണ്ട് മൂന്ന് ദിവസം മുമ്പ് മരണം സംഭവിച്ചിരിക്കാമെന്നാണ് ഫോറൻസിക് വിദഗ്ധരുടെ പ്രാഥമിക നിഗമനം. ഫ്ലാറ്റിനുള്ളിൽ കീറിപ്പറിഞ്ഞ പേപ്പറുകൾ ചിതറിക്കിടക്കുന്ന നിലയിൽ കണ്ടെത്തിയിട്ടുണ്ട്. എന്നാൽ ആത്മഹത്യാ കുറിപ്പുകളൊന്നും ലഭിച്ചിട്ടില്ല. വീട് അകത്ത് നിന്ന് പൂട്ടിയ നിലയിലായതിനാൽ ആത്മഹത്യയാണോ എന്നും പോലീസ് സംശയിക്കുന്നുണ്ട്. കഴിഞ്ഞ മൂന്ന് വർഷമായി പൂജ ഇവിടെ വാടകയ്ക്ക് താമസിക്കുകയായിരുന്നു. ഏപ്രിൽ 23-ന് സാധനങ്ങൾ വാങ്ങാൻ പുറത്തുപോയപ്പോഴാണ് പൂജയെ അവസാനമായി കണ്ടതെന്ന് വീട്ടുടമസ്ഥ പോലീസിനോട് പറഞ്ഞു.
സംഭവത്തിൽ അസ്വാഭാവിക മരണത്തിന് കേസെടുത്ത പോലീസ് എല്ലാ വശങ്ങളും പരിശോധിച്ചുവരികയാണ്. പോസ്റ്റ്മോർട്ടം റിപ്പോർട്ട് ലഭിച്ചാൽ മാത്രമേ മരണകാരണത്തിൽ വ്യക്തത വരികയുള്ളൂ എന്ന് അധികൃതർ അറിയിച്ചു.
Summary: A 34-year-old woman, Pooja Dutta, from Jharkhand was found dead in her rented apartment in Bengaluru. Neighbors alerted the police after a foul smell emanated from the flat. Authorities found her body in a semi-decomposed state in a pool of blood. While the door was locked from the inside and torn papers were found, no suicide note was recovered. Police have registered a case of suspicious death and are investigating further.
