വാഷിംഗ്ടൺ: വൈറ്റ് ഹൗസ് കറസ്പോണ്ടന്റ്സ് ഡിന്നറിനിടെയുണ്ടായ വധശ്രമത്തിൽ നിർണ്ണായക വിവരങ്ങൾ പുറത്ത്. പിടിയിലായ കോൾ തോമസ് അലൻ തയ്യാറാക്കിയ വധശിക്ഷാ പട്ടികയിൽ ട്രംപ് ഭരണകൂടത്തിലെ മിക്ക ഉന്നതരും ഉൾപ്പെട്ടപ്പോൾ എഫ്ബിഐ ഡയറക്ടർ കാഷ് പട്ടേലിനെ ഇയാൾ ഒഴിവാക്കിയിരുന്നു (Trump Event Shooter Kash Patel Hit List). ആക്രമണത്തിന് പത്ത് മിനിറ്റ് മുൻപ് ഇയാൾ കുടുംബത്തിന് അയച്ച ‘മാനിഫെസ്റ്റോ’യിലാണ് ഇക്കാര്യങ്ങളുള്ളത്.
“ഭരണകൂട ഉദ്യോഗസ്ഥരെ (കാഷ് പട്ടേൽ ഒഴികെ) ഉയർന്ന റാങ്ക് മുതൽ താഴോട്ട് എന്ന ക്രമത്തിൽ ലക്ഷ്യം വെക്കുന്നു” എന്നാണ് ഇയാൾ കുറിച്ചത്. കാഷ് പട്ടേലിനെ മാത്രം എന്ത് കാരണത്താലാണ് പട്ടികയിൽ നിന്ന് ഒഴിവാക്കിയതെന്ന് വ്യക്തമല്ല. ഭരണകൂടത്തിന്റെ നയങ്ങൾ മൂലം കഷ്ടപ്പെടുന്നവരെ സംരക്ഷിക്കാനാണ് താൻ ഈ വഴി തിരഞ്ഞെടുത്തതെന്ന് അലൻ അവകാശപ്പെടുന്നു. ക്രൈസ്തവ മൂല്യങ്ങൾ ഉദ്ധരിച്ചുകൊണ്ട്, മറ്റുള്ളവർ പീഡിപ്പിക്കപ്പെടുമ്പോൾ പ്രതികരിക്കാതിരിക്കുന്നത് കുറ്റമാണെന്നും ഇയാൾ മാനിഫെസ്റ്റോയിൽ കുറിച്ചു.
ജനക്കൂട്ടത്തിനിടയിൽ മരണം കുറയ്ക്കാൻ ‘ബക്ക്ഷോട്ട്’ വെടിയുണ്ടകളാണ് താൻ ഉപയോഗിക്കുന്നതെന്നും ഭിത്തികൾ തുളച്ചുപോകാൻ സാധ്യതയുള്ള വെടിയുണ്ടകൾ ഒഴിവാക്കിയെന്നും ഇയാൾ അവകാശപ്പെട്ടു. ശനിയാഴ്ച രാത്രി വാഷിംഗ്ടൺ ഹിൽട്ടണിലെ സുരക്ഷാ മേഖലയിലേക്ക് തോക്കുമായി ഓടിക്കയറിയ ഇയാളെ സീക്രട്ട് സർവീസ് ഉടൻ കീഴടക്കിയിരുന്നു. ഫെഡറൽ ഉദ്യോഗസ്ഥനെ വധിക്കാൻ ശ്രമിച്ചതടക്കമുള്ള കുറ്റങ്ങൾ ചുമത്തി തിങ്കളാഴ്ച അലനെ കോടതിയിൽ ഹാജരാക്കും. ട്രംപ് ഭരണകൂടത്തിലെ ഉന്നതരെല്ലാം ലക്ഷ്യസ്ഥാനത്തായിരുന്നപ്പോഴും കാഷ് പട്ടേലിനോടുള്ള ഈ മൃദുസമീപനം അന്വേഷണ ഏജൻസികളെ അത്ഭുതപ്പെടുത്തിയിട്ടുണ്ട്.
Summary: Cole Tomas Allen, the suspect in the shooting incident at the White House Correspondents’ Dinner, explicitly excluded FBI Director Kash Patel from his hit-list of top Trump administration officials. In a manifesto sent to his family, Allen prioritized targets from highest to lowest rank but noted Patel as an exception. He justified the attack as a response to the administration’s policies, citing a twisted interpretation of Christian duty. Allen remains in custody and faces multiple federal charges.
